[1] Juda bɔnsɔn ka masakɛ Sedesiasi ka masaya san kɔnɔntɔnnan kalo tannan la, Babilonɛ masakɛ Nebukadnezar ni a ka kɛlɛbolow bɛɛ nana daga Jerusalɛm da la.
[2] Masakɛ Sedesiasi ka masaya san tan ni kelennan kalo naaninan tile kɔnɔntɔnnan don, dugu lamini kogo sɔgɔra.
[3] Babilonɛ masakɛ ka kuntigiw bɛɛ donna dugu kɔnɔ ka u sigi cɛmancɛ donda la. O kuntigiw tun ye Nergal-Sarezɛr ni Samgar-Nebɔ ni so kɔnɔ baaradenw kuntigi Sarsekim ani dɔnbaaw kuntigi Nergal-Sarezɛr ye ani Babilonɛ masakɛ ka kuntigi tɔw bɛɛ.
[4] Juda bɔnsɔn ka masakɛ Sedesiasi ni a ka kɛlɛkɛ cɛw ye o ye tuma min na, u bolila o yɔrɔ nin kelen ka bɔ kogo fila cɛ da fɛ ka taa masakɛ ka nakɔ sira fɛ su fɛ. U ye sira minɛ ka taa jɛkɛnɛ fan fɛ.
[5] Nka Kaldekaw ka kɛlɛbolow ye u nɔgɛn. Juguw kura Sedesiasi la Jeriko jɛkɛnɛ la. U y'a minɛ ka taa n'a ye Babilonɛ masakɛ Nebukadnezar yɔrɔ Hamat jamana la Ribla. Masakɛ Nebukadnezar ye kiri tigɛ a kan yen.
[6] Babilonɛ masakɛ ye Sedesiasi denkɛw faga a ɲɛ kɔrɔ Ribla. A ye Juda bɔnsɔn la mɔgɔbaw bɛɛ faga yen.
[7] O kɔ, a ye masakɛ Sedesiasiɲɛ fila ci k'a don nsiranɛgɛ jɔlɔkɔw la ka taa n'a ye Babilonɛ.
[8] Kaldekaw ye masaya so ni mɔgɔw ka sow jeni ka Jerusalɛm kogow ci.
[9] Mɔgɔ tɔ tolen minw tun bɛ dugu kɔnɔ ani minw tun taara u yɛrɛw di Babilonɛ masakɛ ma ani jamana kɔnɔ mɔgɔ tɔ tolenw, garadiw kuntigi Nebuzar-Adan ye o mɔgɔ minɛlenw bɛɛ cɛ ka taa ni u ye Babilonɛ.
[10] Foyi tun tɛ mɔgɔ dɛsɛnen minw bolo, garadiw kuntigi Nebuzar-Adan ye olu to Juda jamana la ka rezɛn nakɔ ni foro tilatila u cɛ o waati yɛrɛ la.
[11] Babilonɛ masakɛ Nebukadnezar ye ci di garadiw kuntigi Nebuzar-Adan ma ko:
[12] «I ka i janto Jeremi la k'a minɛ ko ɲuman. I kana ko jugu si kɛ a la. Ka fara o kan, ni a ye fɛn min deli i fɛ, i ka o kɛ a ye.»
[13] Ayiwa garadiw kuntigi Nebuzar-Adan ni so kɔnɔ baarakɛlaw kuntigi Nebusazban ni dɔnbaaw kuntigi Nergal-Sarezɛr ani Babilonɛ masakɛ ka kuntigiw bɛɛ
[14] ye ci bila ka taa Jeremi nɔ fɛ ka a labɔ kasobon dukɛnɛ la k'a kalifa Safan denkɛ Ahikam denkɛ Gedaliya ma ko o ka taa n'a ye a ka so k'i janto a la. A tora mɔgɔw fɛ yen.
[15] Ka Jeremi to kasobon dukɛnɛ la, Matigi ka kuma sera a ma, ko,
[16] a k'a fɔ Etiopi Ebɛd-Melɛk ye ko Kɛlɛbolow Matigi, Israɛl ka Ala ko: «Ne na bɔnɛ lase nin dugu ma i yɛrɛɲɛ na. A tɛna kɛ hɛrɛ ye fɔ ne ye kuma minw fɔ a kama.»
[17] Matigi ko: «Nka o don na ne na i hɔrɔnya. I bɛ siran minw ɲɛ, i tɛna don olu bolo.
[18] Siga t'a la, ne na i kisi. I tɛna faga npan fɛ. I ni na kɛ i niyɔrɔ ye, sabu i ye i jigi da ne kan.» Matigi ko ten.