[1] Babilonɛ masakɛ Nebukadnezar ye Josiasi denkɛ Sedesiasi sigi masaya la Juda bɔnsɔn kun na Jojakim denkɛ Jekoniya nɔ na.
[2] Nka Matigi tun ye kuma min fɔ kira Jeremi da la, a ni a ka jɔnw ni jamana kɔnɔ mɔgɔ si ma o kuma lamɛn.
[3] Masakɛ Sedesiasi ye Selemiya denkɛ Jukal ni Maseja denkɛ sarakalasebaa Sofoni ci kira Jeremi ma k'a fɔ a ye ko: «I ka Matigi an ka Ala deli an ye.»
[4] O tuma la Jeremi tun ma bila kaso la fɔlɔ, a tun bɛ se ka taa ka segin mɔgɔw cɛma.
[5] Kaldeka minw dagalen tun bɛ Jerusalɛm da la, olu y'a mɛn ko Faraon ka kɛlɛbolow bɔra Misira ka na minkɛ, olu wulila ka bɔ yen.
[6] O tuma la Matigi ka kuma sera kira Jeremi ma, ko:
[7] «Matigi, Israɛl ka Ala ko: ‹Juda bɔnsɔn ka masakɛ min ye aw ci ka na ne ɲininka, aw k'a fɔ o ye, ko Faraon ka kɛlɛbolo minw nana aw dɛmɛni kama, olu na segin ka taa u ka jamana la Misira.
[8] Kaldekaw na kɔsegin ko kura ka nin dugu kɛlɛ. U na a minɛ k'a jeni ni tasuma ye.›
[9] Matigi ko: ‹Aw kana aw yɛrɛw lafili k'a fɔ ko Kaldekaw taara ka mabɔ aw la, k'a masɔrɔ u tɛna taa yɔrɔ jan.
[10] Hali ni aw ye Kaldekaw ka kɛlɛbolow bɛɛ faga, hali ni u la mɔgɔ joginnenw dama tora, olu bɛɛ kelen-kelen na bɔ u ka finisow kɔnɔ ka aw kɛlɛ ka nin dugu jeni ni tasuma ye.›»
[11] Kaldekaw ka kɛlɛbolow bolila ka bɔ Jerusalɛm, Faraon ka kɛlɛboloɲɛ minkɛ,
[12] Jeremi bɔra Jerusalɛm ka taa i sigi Benjamɛn jamana la, o mɔgɔ tɔ tolenw fɛ yen.
[13] Nka a selen Benjamɛn jamana donda la, garadiw ka kuntigi Hananiya denkɛ Selemiya denkɛ Jireija tun bɛ yen. O ye kira Jeremi minɛ k'a fɔ a ye ko: «I bɛ taa ka kolo Kaldekaw ye.»
[14] Jeremi y'a jaabi ko: «O ye nkalon ye. Ne tɛ taa ka kolo Kaldekaw ye fewu.» Nka Jireija ma sɔn ka a lamɛn. O ye Jeremi minɛ ka taa n'a ye kuntigiw yɔrɔ.
[15] Kuntigiw wulila Jeremi kama k'a gosi ka taa a datugu sɛbɛnnikɛla Jonatan ka so kɔnɔ. U tun ye o kɛ kasobon ye.
[16] Ayiwa, u ye Jeremi bila dingɛ kɔnɔ dogodogo la. A ye waati jan kɛ yen.
[17] O kɔ, masakɛ Sedesiasi ye mɔgɔ dɔ bila ka taa ka na ni Jeremi ye. Masakɛ y'a ɲininka dogo la ko: «Yala Matigi ka ci dɔ bɛ i fɛ ka fɔ ne ye wa?» Jeremi y'a jaabi ko: «Ɔwɔ, i na don Babilonɛ masakɛ bolo.»
[18] O kɔ, Jeremi y'a fɔ masakɛ Sedesiasi ye ko: «Ne ye mun kɛ e ni i ka jɔnw ani nin mɔgɔw la fo aw ye ne bila kaso la?
[19] Aw ka kira minw bɛ kiraya kɛ k'a fɔ ko Babilonɛ masakɛ tɛna na aw ni jamana kama, olu bɛ min?
[20] Ayiwa, ne matigi masakɛ, i ka ne lamɛn sa. Ne ka deliliw ka diya i ye. I kana ne bila ka taa sɛbɛnnikɛla Jonatan ka so tun, walisa ne kana na sa.»
[21] O kɛlen, masakɛ Sedesiasi ye ci di garadiw ma ko u ka Jeremi mara kasobon dukɛnɛ la. Ko u ka buurukun kelen di a ma don o don ka bɔ buuru gosi yɔrɔ la sani buuru ka ban dugu kɔnɔ. Ayiwa Jeremi tora kasobon dukɛnɛ la yen.