[1] Ayiwa Matigi ko: «A filɛ, ne na halakili fiɲɛba ci Babilonɛ dugu ni Kaldekaw kama.
[2] Ne na fyɛlikɛlaw lawuli Babilonɛ kama, u na u fyɛ i koɲɔ, ka a kɔnɔ mɔgɔw halaki, k'a masɔrɔ u bɛ bɔ fan bɛɛ la ka na a kama bɔnɛ don na.
[3] Aw kan'a to kalatigiw ka kalaw ta, kɛlɛkɛ cɛw kana nɛgɛ dulɔkiw don. Aw kana hinɛ Babilonɛ kamalenw na. Aw ka a ka kɛlɛkɛ cɛw bɛɛ faga ka u ban.
[4] U na faga ka bi Kaldekaw ka jamana la, u na sɔgɔ ka bi Babilonɛ dugu bɔlɔnw na.»
[5] Israɛl bɔnsɔn ni Juda bɔnsɔn ma bila Kɛlɛbolow Matigi u ka Ala fɛ, nka Kaldekaw ka jamana fara jurumuw la Israɛl ka Senuma kama.
[6] Aw ka boli ka bɔ Babilonɛ, aw bɛɛ kelen-kelen ka aw yɛrɛw ni kisi, walisa aw kana halaki u ka juguya kosɔn, k'a masɔrɔ nin ye Matigi ka mɔnɛbɔ don ye. A ka kan ni min ye, a na o kɛ a la.
[7] Babilonɛ tun kɛra i ko sanu jifilen Matigi bolo, dugukolo kan mɔgɔw bɛɛ bɛ minni kɛ min na. Siyaw ye a ka diwɛn min fo ka fa don u la.
[8] O yɔrɔ nin bɛɛ, Babilonɛ bira, a ɲɔɲɔna. Aw ka nwunan a kɔsɔn ka joli fura tulu ta a jogindaw kosɔn yala ni a bɛ se ka kɛnɛya.
[9] An tun b'a fɛ Babilonɛ ka kɛnɛya, nka a ma se ka kisi. A' ye a to yen, an bɛɛ kelen-kelen ka taa an ka jamana kɔnɔ, sabu a kaɲankata sera fo sankolo la, a yɛlɛnna ka se fo sankabaw ma.
[10] Matigi ye an ka tilennenya jira. A' ye na, an ka Matigi an ka Ala ka kɛwalew lakali Sion.
[11] Aw ka biɲɛw nun bɔ ka nɛgɛ bɛnnanw minɛ aw bolo. Matigi ye Medi jamana masakɛw lawuli, sabu a y'a latigɛ ka Babilonɛ halaki. Matigi na a mɔnɛbɔ. A na a mɔnɛbɔ a ka batosoba cili kosɔn.
[12] Aw ka darapo siri Babilonɛ dugu kogow kama. A' ye kɔlɔsilikɛlaw lajɔ u ka yɔrɔw la ka yɛrɛkun dogo yɔrɔw jɔ. Matigi ye a ka dabaliw siri, Matigi ye kuma minw fɔ Babilonɛkaw ko la, a na olu kɛ.
[13] E duguba, min sigilen bɛ jiba da la, e dugu nafolotigi, i laban tuma sera. I ka ko sera a dan na.
[14] Kɛlɛbolow Matigi y'a kali a yɛrɛ la, ko: «Ne na i yɔrɔw bɛɛ fa i juguw la i ko ntɔnw. Olu na se sɔrɔli pɛrɛnkan bɔ i kama.»
[15] Matigi ye dugukolo da a ka sebaaya barika la, ka diɲɛ ju sigi ni a ka hakilitigiya ye, ka sankolo fɛnsɛ ni a ka dɔnniya ye.
[16] Sanji bɛɲɔgɔn lajɛ sankolo la ale kan kosɔn. A bɛ sankabaw lawuli ka bɔ dugukolo dan na. A bɛ san yɛgɛyɛgɛ kɛ sanji cɛma, a bɛ fiɲɛ labɔ o mara yɔrɔw la.
[17] O la sa, Hadamadenw bɛɛ kɛra hakilintanw ye a ɲɛ na. Sanu faga numuw bɛɛ bɛ maloya u ka boliw ko la, sabu nɛgɛ yeelelen jaw bɛɛ ye nkalontigɛlaw ye. U tɛ ninakili.
[18] Fɛn fufafuw don, lafilili fɛnw don. O boliw na halaki bɔnɛ don na.
[19] Nka Yakuba ka Ala tɛ i ko o boliw, sabu ale de ye fɛn bɛɛ da. Israɛl bɔnsɔn ye ale ta ye. A tɔgɔ ko, Kɛlɛbolow Matigi.
[20] Matigi ko: «I kɛra ne ka marito ni ne ka kɛlɛkɛ minan ye. Ne ye i kɛ ka siyaw ɲɔɲɔ, ne ye i kɛ ka masayaw halaki.
[21] Ne ye yɛlɛnkan sow ni sotigiw faga ni e ye, ka wotorow ni wotoro bolibaaw tiɲɛn ka u halaki.
[22] Ne y'a to i ka cɛw ni musow halaki, ka mɔgɔkɔrɔbaw ni denmisɛnw halaki. Ne y'a to i ka kamalenw ni npogotigiw faga.
[23] Ne y'a to i ka saga gɛnnaw ni u ka sagaw halaki, k'a to i ka sɛnɛkɛlaw ni u ka sɛnɛkɛ minanw tiɲɛn ka u halaki, ne y'a to i ka jamana kuntigiw ni u ka faamaw halaki.»
[24] Nka Matigi ko: «Babilonɛ ni Kaldekaw ye ko jugu min kɛ Jerusalɛm dugu la aw ɲɛ na, ne na o ɲɔgɔn kɛ u la.
[25] Ne bɛ na i kama, kulu tiɲɛnnikɛla, e min ye dugukolo yɔrɔw bɛɛ tiɲɛn. Ne na ne bolo se i ma ka i kolonkolon ka bɔ farakurunw san fɛ ka i bi duguma ka i kɛ kulu jeninen ye.
[26] Seleke la fara tɛna bɔ i la tun wala ju sigi kabakurunw, sabu i na kɛ tomon ye badaa.
[27] «Aw ka darapo siri jamana kɔnɔ ka buru fyɛ siyaw cɛma ka siyaw lawuli Babilonɛ kama. A' ye Ararat masaya ni Minni ani Askenaz masayaw lajɛ a kama. Aw ka kɛlɛbolo kuntigi ci ka taa a kama. Aw ka yɛlɛnkan so caman ci ka taa a kama i ko ntɔn kuluba.
[28] Aw ka siyaw ni Medi masakɛw ni u ka jamana kuntigiw ni u ka faamaw ci ka taa u kama.
[29] Dugukolo lamagara ka yɛrɛyɛrɛ, sabu Matigi ye ko minw latigɛ Babilonɛ kama ka Babilonɛ jamana halaki ka kɛ tomon ye, o sera.
[30] Babilonɛ kɛlɛkɛ cɛw ye kɛlɛ dabila, u tora u ka kɛlɛ kunbɛn sow kɔnɔ. U barika banna, u kɛra i ko musow. Tasuma tugura Babilonɛ sow la ka dugu donda la konw kari.
[31] Kibaru laselaw ni cidenw bolitɔ ye ɲɔgɔn kunbɛn ka taa a fɔ Babilonɛ masakɛ ye ko a ka dugu fan bɛɛ minɛna,
[32] ko ba senna tigɛ yɔrɔw bɛɛ minɛna, ko burukuw jenina ni tasuma ye. Kɛlɛkɛ cɛw ja tigɛra.»
[33] K'a masɔrɔ Kɛlɛbolow Matigi, Israɛl ka Ala ko: «Babilonɛ dugu na kɛ i koɲɔ gosi gendekɛnɛ. Sɔɔni suman tigɛ tuma na se a ma.»
[34] Babilonɛ masakɛ Nebukadnezar ye ne halaki ka ne tiɲɛn. A ye ne kɛ i ko daga lankolon. A ye ne kunun i ko dragon, ka a kɔnɔ fa ni ne ka fɛnɲumanw ye ka ne gɛn ka taa yɔrɔ jan.
[35] «Babilonɛkaw ye ne tɔɔrɔ kosɛbɛ cogo min na, ne hakɛ ka bi Kaldekaw kan o cogo la.» Sion ko ten. Jerusalɛm ko: «Ne joli hakɛ ka bi Kaldekaw kan.»
[36] O de kosɔn Matigi ko: «Ne na i lafasa ka i mɔnɛbɔ. Ne na Babilonɛ baji ja ka a ji woyo tigɛ.
[37] Babilonɛ na kɛ tomon ye ka kɛ kungo wuluw sigi yɔrɔ ni kabakoya yɔrɔ ni dala file fyɛ fɛn ye. Mɔgɔ si tɛna sigi a kɔnɔ tun.
[38] A kɔnɔ mɔgɔw bɛ gɔrɔntɔɲɔgɔn fɛ i ko warabaw. U bɛ kuloɲɔgɔn fɛ i ko warabadenw.
[39] Ni u jarabira, ne na minni fɛn di u ma, ne na u ɲɛnamini, walisa u kaɲɛnajɛ. O kɔ, u na sunɔgɔ badaa, u tɛna wuli tun.» Matigi ko ten.
[40] «Ne na taa ni u ye fagali yɔrɔ la i ko sagadenw ni sagajigiw ni bakɔrɔw bɛ taa fagali yɔrɔ la cogo min na.
[41] «Sesak minɛna dɛ. O dugu min barika tun ka bon dugukolo kan, o minɛna cogo di? Babilonɛ dugu kɛra kabako fɛn ye siyaw cɛma cogo di?
[42] Kɔgɔji woyora ka se Babilonɛ dugu ma, jikuru caman ye a tunun.
[43] A duguw kɛra tomon ni dugukolo jalan jintan ye fo mɔgɔ si tɛ sigi a kɔnɔ tun, fo Hadamaden si tɛ tɛmɛn a fɛ tun.
[44] Ne na Babilonɛkaw ka bato fɛn Bel tiɲɛn. A ye fɛn minw kunun ka ban, ne na olu sama ka bɔ a da fɛ. Siyaw tɛna taa a sɛgɛrɛ k'a bato tun. Babilonɛ dugu lamini kogow yɛrɛ na bi.
[45] «Ne ka mɔgɔw, aw bɛɛ ka bɔ a kɔnɔ ka aw niw kisi Matigi ka dimiya ma.
[46] Aw na kibaru min mɛn o jamana la, o kana aw ja tigɛ, aw kana siran o kosɔn. K'a masɔrɔ mankan dɔ na cun u kanɲinan, san wɛrɛ mankan farinma wɛrɛ na cun o jamana kan. Kuntigiw na wuliɲɔgɔn kama.
[47] O de kosɔn waati bɛ na, ne na Babilonɛ kɔnɔ boliw sara. U ka jamana kɔnɔ mɔgɔw bɛɛ na maloya ka a kun suuli. A kɔnɔ mɔgɔw na sa.»
[48] Matigi ko: «Sankolo ni a kɔnɔ fɛnw bɛɛ ani dugukolo ni a kan fɛnw bɛɛ na ɲagalikanba bɔ Babilonɛ kosɔn, sabu halakilikɛlaw bɛ bɔ saheli yanfan fɛ ka na a kama.
[49] Babilonɛ na bi Israɛl mɔgɔ fagalenw kosɔn i ko a yɛrɛ ye jamanaw bɛɛ kɔnɔ mɔgɔ faga cogo min na.
[50] Aw minw kisira npan ma, a' ye taa, aw kana aw jɔ. Ka aw to yɔrɔ jan na, aw ka aw hakili to Matigi la ka miiri Jerusalɛm ko la.»
[51] Aw b'a fɔ ko: «An maloyara an ka mafiɲɛyali kuma mɛnnenw bɛɛ kosɔn, an kun suulila. Dunanw donna Matigi ka yɔrɔ senuma kɔnɔ.»
[52] O de kosɔn Matigi ko: «Don bɛ na, ne na Babilonɛ boliw sara. Mɔgɔ joginnenw na nwunan a ka jamana yɔrɔw bɛɛ la.
[53] Hali ni Babilonɛ yɛlɛnna fo sankolo la, hali ni a ka kɛlɛ kunbɛn so barika bonyara fo mɔgɔ si tɛ se ka don a kɔnɔ, ne na halakilikɛlaw ci a kama.» Matigi ko ten.
[54] Kulokan bɔra Babilonɛ dugu kɔnɔ. Halakiliba mankan bɔra Kaldekaw ka jamana la.
[55] Katuguni Matigi bɛ Babilonɛ ci, mankan minw bɛ mɛn a kɔnɔ, olu tɛna mɛn tun. Halakilikɛlaw bɛ mankanba bɔ, o mankan bɛ i ko jikuruba mankan.
[56] Ɔwɔ, halakilikɛlaw dagara Babilonɛ da la, a dɛmɛbaaw minɛna, olu ka bonnikɛ kalaw karila, k'a masɔrɔ Matigi ye fɛn bɛɛ sarabaa Ala ye. A na mɔgɔw bɛɛ kelen-kelen sara ka kɛɲɛ ni u ka kɛwalew ye.
[57] Ne na Babilonɛ faamaw ni a hakilitigiw lamin ka u ɲɛnamini. A jamana kuntigiw ni a mɔgɔ tɔgɔbaw ani a kɛlɛkɛ cɛw bɛɛ na sunɔgɔ, u tɛna wuli tun. Masaba min tɔgɔ ko Kɛlɛbolow Matigi, o ko ten.
[58] Kɛlɛbolow Matigi ko: «Babilonɛ lamini kogo jan na cɛ ka bɔ yen, tasuma na dugu dala kon janw jeni. Siyaw ka baara na kɛ fuu ye, siyaw ye u yɛrɛ sɛgɛn tasuma kosɔn.»
[59] Maseja denkɛ Nerija denkɛ Seraja tun ye Juda masakɛ Sedesiasi si yɔrɔ kuntigi ye. Masakɛ Sedesiasi ka masaya san naaninan la, a taara o fɛ Babilonɛ.
[60] Bɔnɛ minw na bi Babilonɛ kan, Jeremi ye olu sɛbɛn kitabu kɔnɔ, olu bɛɛ tun fɔra Babilonɛ ko la.
[61] Jeremi y'a fɔ Seraja ye ko: «Ni i sera Babilonɛ tuma min na, i ka nin kumaw kalan ni kanba ye.
[62] O kɔ, i k'a fɔ ko: ‹Matigi, e de y'a jira ko i na nin dugu halaki, ko mɔgɔ si wala bagan si tɛna to nin yɔrɔ la tun, nka a na kɛ tomon ye.›
[63] Ni i tilara o sɛbɛn kɔnɔ kuma kalanni la tuma min na, i ka o siri kabakurun dɔ la ka o fili Ufrata ba dun na k'a fɔ ko:
[64] ‹Babilonɛ dugu na halaki ka ban nin cogo la. A dugu tɛna jɔ tun ne ka bɔnɛw kosɔn, a kɔnɔ mɔgɔw barika bannen na bi.›» Ayiwa Jeremi ka kuma banna yan.