[1] Ayiwa Matigi ka kuma sera Jeremi ma ja ko la ko:
[2] «Juda bɔnsɔn bɛ kasi la. Duguw kɔnɔ mɔgɔw ye cafu fini don ka u da duguma. Jerusalɛm kasikan yɛlɛnna fo sankolo la.
[3] Mɔgɔbaw bɛ u ka baaradenw ci ka taa ji ɲini. U bɛ taa ji dingɛw da la, nka u tɛ ji sɔrɔ. U maloyalen, kun suulilen bɛ kɔsegin ni u ka ji dagaw lankolon ye. U bɛ u ɲɛda da tugu.
[4] Sɛnɛkɛlaw maloyara, u kun suulilen don, katuguni dugukolo pɛrɛnpɛrɛnna, katuguni sanji ma na jamana la.
[5] Kungo sogo yɛrɛ bɛ jigin ka taa k'a den to yen, sabu bin dɛsɛra.
[6] Kungo faliw jɔlen tora kulu walawalamaw kan, u bɛ fiɲɛ foron i ko kungo wuluw. Dibi donna u ɲɛw kɔrɔ sabu bin nugu tɛ yen.»
[7] Hali ni an yɛrɛw ka tilenbaliya bɛ an jalaki, Matigi, i ka an kisi i tɔgɔ kosɔn, k'a masɔrɔ an ye ko jugu kɛ i la ka i hakɛ ta.
[8] E min ye Israɛl bɔnsɔn jigi ni u kunmabɔbaa ye u tɔɔrɔ waati la, mun kosɔn i bɛ kɛ i ko dunan an ka jamana la, i ko taamabaa min bɛ finiso jɔ ka si yen ka taa?
[9] Mun kosɔn i bɛ i yɛrɛ kɛ i ko mɔgɔ naalo talen, i ko kɛlɛkɛ cɛ farin min tɛ se ka an tila? O bɛɛ n'a ta Matigi, i bɛ an cɛma, an ye i ka mɔgɔw ye, i kana an bila.
[10] Ayiwa Matigi y'a fɔ nin mɔgɔw ko la, ko: «A ka di u ye ka boliboli yan fɛ ni yen fɛ, u tɛ to yɔrɔ kelen.» O de kosɔn Matigi tɛna makari u la. A ye a hakili jigin u ka tilenbaliya kow la sisan. A na u sara u ka jurumuw kosɔn.
[11] Matigi y'a fɔ ne ye ko kura ko: «I kana ko ɲuman deli nin mɔgɔw ye.
[12] Ni u ye sun don, ne tɛna u nwunankan mɛn. Ni u ye saraka jenitaw ni mugu sarakaw bɔ ne ye, ne tɛna olu minɛ, nka ne na u halaki ni npan ni kɔngɔba ani fiɲɛbana ye.»
[13] O tuma la ne ye Matigi jaabi ko: «Matigi Ala, kiraw b'a fɔ u ye ko u tɛna kɛlɛ ye, ko kɔngɔ tɛna don jamana kɔnɔ, nka Ala na hɛrɛba kɛ u ye nin yɔrɔ la.»
[14] Matigi y'a fɔ ne ye ko: «O kiraw ye nkalon kiraya kɛ ne tɔgɔ la, k'a sɔrɔ ne ma u ci, ne ma ci si di u ma, ne ma kuma u fɛ. U bɛ ko minw fɔ aw ye, olu ye yeli fɛn nkalontigɛlaw ni kiraya kuma fufafuw ani u dusukun na miirili lafililenw ye.»
[15] O de kosɔn Matigi ko: «O kiraw bɛ kiraya kɛ ne tɔgɔ la k'a sɔrɔ ne ma u ci, nka u b'a fɔ ko kɛlɛ ni kɔngɔba tɛna don nin jamana kɔnɔ. O kiraw yɛrɛw na faga npan ni kɔngɔba fɛ.
[16] Ayiwa, u ye kiraya kuma fɔ mɔgɔ minw ye, olu na sa kɔngɔba ni npan fɛ Jerusalɛm dugu bɔlɔnw na. U ni u musow ni u denkɛw ni u denmusow suw tɛna don, k'a masɔrɔ ne na u ka ko jugu kɛlenw bi u yɛrɛw kan.
[17] «I ka nin kuma fɔ u ye, ko: ‹Neɲɛji bɛ to ka woyo su fara tile kan, a tɛ jɔ, sabu ne ka mɔgɔw, ne denmuso npogotigima gosira kosɛbɛ, a jogindaw ka jugu.
[18] Ni ne bɔra ka taa kungo kɔnɔ, ne bɛ npan ka mɔgɔ fagalenw ye. Ni ne donna dugu kɔnɔ, ne bɛ kɔngɔ ka mɔgɔ halakilenw ye. Kiraw ni sarakalasebaaw bɛ yaalayaala jamana kɔnɔ, sabu u tɛ u taa yɔrɔ dɔn.›»
[19] Yala i banna Juda bɔnsɔn bɛɛ la wa? I dusukunɲiginna Sion na wa? Mun kosɔn i bɛ an jogin tan fo an tɛ se ka kɛnɛya? An tun bɛ hɛrɛ makɔnɔ, nka bɔnɛ sera an ma. An tun bɛ kɛnɛyali makɔnɔ, nka siranba sera an ma.
[20] Matigi, an bɛ an ka nɔgɔlenya ni an bɛnbaw ka tilenbaliya kow dɔn, k'a masɔrɔ an ye ko jugu kɛ i la.
[21] I tɔgɔ bonya kosɔn, i kana an mafiɲɛya. I kana i ka masasigilan nɔɔrɔma maloya. I ka i hakili to i ka layidu talen na an ye. I kana o tiɲɛn.
[22] Bato fɛn dɔ bɛ siyaw ka bato fɛn fufafuw cɛma min bɛ se ka sanji lana wa? Yala sankolow bɛ sanji di wa? yala o ko ɲumanw tɛ na ka bɔ e, Matigi an ka Ala fɛ wa? An jigi bɛ e de kan, k'a masɔrɔ e de ye fɛn bɛɛ da.