[1] Matigi y'a fɔ ne ye ko: «I ka taa bɔgɔn daga dɔ san daga dilala ka so. O kɔ, i ka cɛkɔrɔba dɔw ni sarakalasebaa cɛkɔrɔba dɔw wele ka taa i fɛ.
[2] Aw ka taa Ben-Hinom jɛkɛnɛ la, o bɛ daga dilala ka donda kɔ fɛ. Ne na kuma minw fɔ i ye, i ka olu fɔ yen,
[3] ko Juda bɔnsɔn ka masakɛw ni Jerusalɛmkaw ka Matigi ka kuma lamɛn.» Kɛlɛbolow Matigi, Israɛl ka Ala ko: «Ne na bɔnɛ lase nin dugu ma, o na a mɛnbaaw tulo kɔrɔ gwan.
[4] Sabu a kɔnɔ mɔgɔw ye ne bila, u ye nin yɔrɔ nɔgɔ. U yɛrɛw ni u bɛnbaw ani Juda bɔnsɔn ka masakɛw ma bato fɛn minw dɔn, u ye suma diyalanw wusu olu ye.
[5] U ye nin yɔrɔ bɛɛ fa ni mɔgɔ jalakibaliw joli ye. U ye batoli kɛ yɔrɔw jɔ Baal ye ka u denkɛw kɛ saraka jenitaw ye Baal boli ye, ne tun ma min fɔ u ye, ne tun ma kuma o ko la ka kɔrɔ, o tun tɛ ne kɔnɔ fewu.
[6] O de kosɔn Matigi ka don bɛ na, nin yɔrɔ tɛna wele ko Tofɛt wala Ben-Hinom ka jɛkɛnɛ, nka a na wele ko mɔgɔ faga yɔrɔ jɛkɛnɛ.
[7] Ne na Juda bɔnsɔn ni Jerusalɛmkaw ka ko latigɛlenw tiɲɛn nin yɔrɔ la. Ne n'a to u juguw ni u la ɲinibaaw ka u faga ni npan ye. Ne na u suw kɛ sanfɛ kɔnɔw ni kungo waraw ka dumuni ye.
[8] Ne na nin dugu kɛ kabako fɛn ni dala file fyɛ fɛn ye. Tɛmɛnbaaw na kabakoya ka yɛlɛ u ka tɔɔrɔw bɛɛ kosɔn.
[9] Ne n'a to u ka u denkɛw ni u denmusow sogo dun. Ni u juguw ni u la ɲinibaaw dagara u da la ka u degun tuma min na, u bɛ naɲɔgɔn sogo dun.
[10] «O kɔ, i ni mɔgɔ minw taaraɲɔgɔn fɛ, i ka daga ci olu ɲɛ na,
[11] k'a fɔ u ye ko Kɛlɛbolow Matigi ko: ‹Ne na nin mɔgɔw ani nin dugu ci i ko bɔgɔn daga cilen min tɛ se ka dila tun. Mɔgɔw suw na don Tofɛt, sabu su don yɔrɔ wɛrɛ tɛna sɔrɔ.›
[12] Ayiwa Matigi y'a fɔ ko a na nin yɔrɔ ni a kɔnɔ mɔgɔw kɛ cogo min na, o filɛ o ye. Ne na nin dugu kɛ i ko Tofɛt.
[13] Tiɲɛ la, Jerusalɛm dugu sow ni Juda bɔnsɔn ka masakɛw ka masaya sow na nɔgɔ i ko nin Tofɛt yɔrɔ, katuguni u ye wusulan suma duman wusu sankolola dolow ye ka saraka bɔntaw bɔn bato fɛn fufafuw ye o sow kun na.»
[14] O kɔ, Matigi tun ye Jeremi bila ka taa kiraya kɛ Tofɛt yɔrɔ min na, a bɔra yen ka kɔsegin ka taa i jɔ Matigi batosoba dukɛnɛ la k'a fɔ mɔgɔw bɛɛ ye ko,
[15] Kɛlɛbolow Matigi, Israɛl ka Ala ko: «Ne ye bɔnɛ minw ko fɔ, ne na olu bi nin dugu ni a lamini duguw bɛɛ kan, k'a masɔrɔ u kɔnɔ mɔgɔw ye u tulo gɛlɛya, u ma sɔn ka ne ka kumaw lamɛn.»