[1] Matigi ka kuma sera ne ma, ko:
[2] «I kana muso furu, i kana denkɛw wala denmusow bange nin yɔrɔ la.
[3] Katuguni denmuso ni denkɛ minw bɛna bange yan, ni u baw ni u fa minw ye u bange nin jamana kɔnɔ, Matigi y'a fɔ olu ko la,
[4] ko bana na u sɔrɔ ka u faga. Mɔgɔw tɛna u suw kasi, u suw tɛna don. U suw na to duguma ka kɛ dugukolo nɔgɔ ye. Npan ni kɔngɔba na u faga. U suw na kɛ sanfɛ kɔnɔw ni kungo waraw ka dumuni ye.»
[5] Matigi ko: «I kana don su kasi bon kɔnɔ. I kana kasi mɔgɔ tɔɔrɔlenw fɛ, sabu ne ye ne ka hɛrɛ ni ne ka hinɛ ni ne ka makari mabɔ nin mɔgɔw la.» Matigi ko ten.
[6] «U la mɔgɔbaw ni u la mɔgɔ dɔgɔmanniw na sa nin jamana kɔnɔ. U suw tɛna don. U suw tɛna kasi. Mɔgɔ si tɛna a yɛrɛ tigɛtigɛ wala k'a kun di u kosɔn.
[7] Dumuni tɛna kɛ u ka saŋabondaw la kaɲɔgɔn dusu saalo mɔgɔ salenw kosɔn. U tɛna u faw ni u baw saŋafo dɛgɛji min.
[8] «I kana don u ka dumuniba kɛ so kɔnɔ ka i sigi yen ka dumuni ni minni kɛ u fɛ.»
[9] K'a masɔrɔ Kɛlɛbolow Matigi, Israɛl ka Ala ko: «Ne na ɲagalikan ni barika dakan ni kɔɲɔcɛ ni kɔɲɔmuso dɔnkili dakan ban nin yɔrɔ la aw yɛrɛw ɲɛ na aw ka waati la.
[10] «Ni i taara nin kumaw fɔ o mɔgɔw ye, u na i ɲininka ko: ‹Mun kosɔn Matigi bɛ nin bɔnɛ kow bɛɛ fɔ an kama? An ka ko jugu kɛlen ye mun ye sa? An ye mun jurumu kɛ Matigi an ka Ala la?›
[11] I na u jaabi ko, Matigi ko: ‹Aw bɛnbaw ye ne bila ka nɔrɔ bato fɛn wɛrɛw la ka baara kɛ olu ye ka u biri olu kɔrɔ. U banna ne la, u ma ne ka sariya mara.
[12] Aw taama cogo juguyara ka tɛmɛn aw bɛnbaw ta kan. Aw bɛɛ kelen-kelen tugulen bɛ aw dusukun miirili juguw nɔ fɛ ka aw dusukun gɛlɛya fo ne lamɛnni hami si tɛ aw la.
[13] O de kosɔn ne na aw gɛn ka bɔ nin jamana kɔnɔ ka taa jamana wɛrɛ la, aw ni aw bɛnbaw tɛ min dɔn. Aw na baara kɛ bato fɛn wɛrɛw ye su fara tile kan, k'a masɔrɔ ne tɛna hinɛ aw la.›»
[14] O de kosɔn Matigi ko: «Don bɛ na, u tɛna a fɔ ne ko la tun ko: ‹Matigi min ye Israɛl bɔnsɔnw labɔ Misira jamana la, o ɲɛnama don,›
[15] nka u n'a fɔ ko: ‹Matigi ɲɛnama don, o min ye Israɛl bɔnsɔn labɔ saheli yanfan jamana kɔnɔ, a tun ye u gɛn ka taa o yɔrɔ min na.› Ne tun ye jamana min di u bɛnbaw ma, ne na u lasegin yen.»
[16] Matigi ko: «Ne na mɔnnikɛla caman ci, olu na u ka jɔw kɛ ka u minɛ. O kɔ, ne na donso caman ci, olu na u ɲini ka bɔ kuluw ni tintinw kan ani faraw cɛma,
[17] k'a masɔrɔ neɲɛ bɛ u ka kɛwalew bɛɛ la, u si ma dogo ne la. U ka tilenbaliya tɛ se ka dogo ne la fana.
[18] «Ne na fɔlɔ ka u ka tilenbaliya ni u ka jurumu kafari siɲɛ fila, k'a masɔrɔ u ye ne ka jamana nɔgɔ ni u ka bato fɛnw suw ye ka ne ka ciyɛn fa u ka ko haramulenw na.»
[19] E Matigi, i ye ne barika ni ne kɛlɛ kunbɛn so ni ne dogo yɔrɔ ye degun don na. Siyaw bɛ na ka bɔ dugukolo dan na ka na i sɛgɛrɛ, k'a fɔ ko: «An faw ka diinɛ sira tun tɛ foyi ye bato fɛn fufafu barikantanw batoli kɔ.
[20] Mɔgɔ bɛ se ka bato fɛn dila a yɛrɛ ye wa? Mɔgɔw ka fɛn dilalenw tɛ bato fɛn sɛbɛw ye.»
[21] Matigi ko: «Nin sen in na, ne na ne barika ni ne ka sebaaya jira u la. Ɔwɔ, u n'a dɔn ko ne ye Matigi de ye.»