[1] Ayiwa Matigi y'a fɔ ne ye ko: «Hali ni Musa ni Samuɛl jɔlen tun bɛ ne ɲɛ kɔrɔ ka ne deli, ne dusukun tun tɛna yɛlɛma nin mɔgɔw ta fan fɛ. I ka nin mɔgɔ nɔgɔlenw gɛn ka bɔ ne ɲɛ kɔrɔ, u ka bɔ yan.
[2] Ni u ye i ɲininka ko u bɛ taa min, o tuma la i k'a fɔ u ye ko, Matigi ko: Minw ka kan ka sa, olu na sa, minw ka kan ka faga ni npan ye, olu na faga ni npan ye, minw ka kan ka faga kɔngɔba fɛ, kɔngɔba na olu faga, minw ka kan ka taa jɔnya la, olu na minɛ ka taa jɔnya la.»
[3] Matigi ko: «Ne na tɔɔrɔ sifa naani lase u ma, npan na u faga, wuluw na u suw sama, sanfɛ kɔnɔw ni kungo waraw na u farafara ka u sogo dun ka u ban pewu.
[4] Ne na u kɛ siranfɛnba ye dugukolo kan masayaw bɛɛ ɲɛ. O na kɛ Ezekiasi denkɛ Manase, Juda ka masakɛ ka ko jugu kɛlenw kosɔn, a ye olu minw kɛ Jerusalɛm.»
[5] Jerusalɛm, jɔn na hinɛ i la? Jɔn na i tɔɔrɔ kow kasi? Jɔn na a jɔ ka ɲininkali kɛ i ko la?
[6] Matigi ko: «I ye ne janfa, i seginna kɔ. O de kosɔn ne ye ne bolo mɔɔnɔbɔ i kama ko ne bɛ i halaki. Ne hinɛna fo ka se a dan na.
[7] Ne ye ne ka mɔgɔw fyɛ ka taa fo jamana dan na. Ne ye ne ka mɔgɔw bɔnɛ u denw na. Ne ye u halaki, nka u ma u ka filili siraw bila.
[8] U ka muso cɛ salenw cayara ka tɛmɛn kɔgɔji dala cɛncɛn kan. Ne ye halakilikɛla ci kamalen ni a woloba ma tile gwan fɛ. Ne ye siran ko ni halakili ko cun u kan yɔrɔ nin kelen.
[9] «Muso min ye denkɛ wolonwula bange, o tora a kelenna. Dibi donna a ɲɛ la tile gwan fɛ, a maloyara ka a kun suuli. A den tɔ minw tora, ne na olu don u juguw ka npan bolo.» Matigi ko ten.
[10] Bɔnɛ bɛ ne ye, ne ba, katuguni i ye ne bange. I ye mɔgɔ dɔ bange diɲɛ la, o kɛra kɛlɛtigɛla ni sɔsɔlikɛla ye jamana mɔgɔw bɛɛ fɛ. Ne ma juru don, ne ma juru ta mɔgɔ si fɛ, o bɛɛ n'a ta, u bɛɛ bɛ ne danga.
[11] Nka Matigi ko: «Sɛbɛ la, ne na i ka sini kɛ hɛrɛ ye. I juguw na i deli tɔɔrɔ ni degun don na.
[12] «Nɛgɛfin wɛrɛ bɛ se ka saheli yanfan fɛ nɛgɛfin ni nsiranɛgɛ kari wa?
[13] Juda, ne na i bolo fɛnw ni i ka nafolo maralen di cɛlikɛlaw ma gwansan i ka jurumu kɛlenw bɛɛ kosɔn, i ka jamana fan bɛɛ la.
[14] I tɛ jamana min dɔn, ne n'a to i juguw ka taa ni i ye o la, sabu ne ka dimiya tasuma manalen don, o na aw jeni.»
[15] Matigi, i bɛ kow bɛɛ dɔn. I ka i hakili to ne ka kow la ka ne mɔnɛbɔ ne juguw la. I kana a to ne ka halaki ka i to ne juguw muɲuli la. I k'a dɔn ko ne bɛ mafiɲɛya e de kosɔn.
[16] Kabini i ka kuma sera ne ma, ne y'a dumu. I ka kuma ye ne dusukunɲagali k'a sewa, k'a masɔrɔ ne bɛ wele i tɔgɔ la, Matigi, Kɛlɛbolowtigi Ala.
[17] Ne ma sigi nparabɔlaw cɛma ka neɲɛnajɛ yen, nka ne sigira ne kelenna i bolo ka tɔɔrɔw cɛma, k'a masɔrɔ i ye i ka dimiya yɛlɛma ne kan.
[18] Mun y'a to ne ka tɔɔrɔ bɛ juguya tuma bɛɛ? Mun kosɔn ne joginda bɛ juguya fo a tɛ kɛnɛya? Sɛbɛ la, i na ne janfa i ko kɔji min tɛ to a cogo la tuma bɛɛ wa, mɔgɔ tɛ se ka i jigi da a kan?
[19] O de kosɔn Matigi ko: «Ni i kɔseginna ne ma, ne na i ta ka kɛ ne ka baaraden ye tun. Ni i bɛ fɛnɲumanw fara ka bɔ fɛn jaasilenw na, i na kɛ ne dalaminɛ ye. Mɔgɔ wɛrɛw ka kɔsegin i ma, nka i kana kɔsegin u ma.
[20] Ne na i jɔ nin mɔgɔw cɛma i ko nsiranɛgɛ kogo, ka i kɛ i ko kɛlɛ kunbɛn so. Ni u ye i kɛlɛ, u tɛna se sɔrɔ i kan, sabu ne bɛ i fɛ ka i tila.» Matigi ko ten.
[21] «Ɔwɔ, ne na i sama ka bɔ mɔgɔ juguw bolo ka i tila i tɔɔrɔbaaw la.»