[1] Matigi ka kuma sera Jeremi ma ko:
[2] «I ka nin layidu kumaw lamɛn ka u fɔ Juda bɔnsɔn ni Jerusalɛmkaw ye,
[3] ko Matigi, Israɛl ka Ala ko: ‹Ni mɔgɔ min m'a tulo majɔ nin layidu kumaw la, o ka danga.
[4] Ne ye aw bɛnbaw labɔ Misira jamana la don min na, i n'a fɔ u bɔra gwantugu tasuma cɛma, ne ye ci fɔ u ye ko u ka ne kan lamɛn. Ne bɛ ci minw fɔ u ye, u ka olu bɛɛ kɛ. Ni o kɛra, u na kɛ ne ka mɔgɔw ye, ne na kɛ u ka Ala ye.
[5] Ne ye ne kali aw bɛnbaw ye ko ne na jamana di u ma, o falen bɛ nɔnɔ ni di la, ne ye o kɛ, a bɛ ten halibi.›» O tuma la ne y'a jaabi ko: «Matigi, amiina.»
[6] Matigi y'a fɔ ne ye ko: «I ka nin kuma welewele da Juda bɔnsɔn ka duguw ni Jerusalɛm dugu bɔlɔnw na, i k'a fɔ u ye ko: ‹Aw ka nin layidu kuma lamɛn k'a kɛ.
[7] Kabini ne ye aw bɛnbaw labɔ Misira jamana la don min na, ne ye u lasɔmi ko u ka ne kan lamɛn. Ne tora ka u lasɔmi fo ka na se bi ma ko: «Aw ka ne kan minɛ.»
[8] Nka u ma ne kan minɛ, u ma u tulo majɔ. U tugura u dusukunw ka lafili kow nɔ fɛ u ka dusukun gɛlɛya kosɔn. Ne ye ne ka layidu kuma tɔɔrɔ kow bɛɛ bi u kan, sabu ne tun y'a fɔ ko, u ka sira min taama, u ma sɔn ka o taama.›»
[9] Matigi ko: «Juda bɔnsɔn ni Jerusalɛmkaw ye jɛ siri.
[10] U segira u bɛnbaw ka tilenbaliya kow kan, olu minw banna ne ka kuma la. U tugura bato fɛn wɛrɛw nɔ fɛ ka baara kɛ olu ye. Ne tun ye layidu min ta u bɛnbaw ye, Israɛl bɔnsɔn ni Juda bɔnsɔn ka sow ye o tiɲɛn.»
[11] O de kosɔn Matigi ko: «Ne na bɔnɛ bi u kan, u tɛna kisi o ma fewu. Ni u kasira ne nɔ fɛ, ne tɛna u jaabi.
[12] Ayiwa Juda bɔnsɔn ka duguw ani Jerusalɛmkaw bɛ tugu bato fɛn wɛrɛ minw nɔ fɛ, ka wusulan suma duman wusu olu ye, u na kasi olu nɔ fɛ, nka o bato fɛnw tɛna se ka u kisi bɔnɛ don na.
[13] Ayiwa, Juda bɔnsɔn, aw ka bato fɛnw caya ni aw ka duguw ka kan. Aw ka bato fɛn haramulen Baal ka wusulan suma duman saraka bɔlan caya bɛ Jerusalɛm dugu bɔlɔnw caya bɔ.
[14] E Jeremi, i kana i makasi ne la nin mɔgɔw ye, i kana delilikan si bɔ u kosɔn, i kana ne deli u ye, k'a masɔrɔ ni u kasira ne nɔ fɛ u ka tɔɔrɔw kosɔn, ne tɛna u lamɛn.
[15] «Ne ka kanulen bɛ mun kɛ ne batosoba kɔnɔ? A ye ko jugu haramulen caman kɛ. A ka dafale sarakaw ni saraka sogow bɛ se ka bɔnɛ mabɔ a la wa? I bɛɲagali i ka ko jugu kosɔn.»
[16] Matigi ye i tɔgɔ da ko «Olive sun kɛnɛ,» min den ka ɲi haali. Golobogalaba mankanba kɛra, a ye tasuma tugu o jiri la, a bolow karila.
[17] Kɛlɛbolow Matigi min ye i turu, ale ye i halakili latigɛ, Israɛl bɔnsɔn ni Juda bɔnsɔn ka sow ka fililiw kosɔn. U ye ne dusu dimin ni suma diyalanw wusuli ye Baal ye.
[18] Jɛ min sirila ne kama, Matigi ye o jira ne la. Ne ye o dɔn. Ɔwɔ, i ye ne juguw ka kɛwale juguw jira ne la.
[19] Ne kɔni kɛra i ko baro sagaden min bɛ taa faga yɔrɔ la. Jɛ min sirila ne kama, ne tun ma o dɔn. U ko: «An ka o jirisun ni a denw bɛɛ halakiɲɔgɔn fɛ. An ka a ban ka bɔ diɲɛ kɔnɔ, walisa a ko kana tɔ mɔgɔw kɔnɔ tun.»
[20] Nka Kɛlɛbolow Matigi ye kiritigɛla tilennen de ye. Ale bɛ dusukun na kow ni miiriliw dɔn. Ne na kɛ u ka tɔɔrɔw seere ye, k'a masɔrɔ ne ye ne koɲɛ kalifa i la.
[21] O de kosɔn Matigi bɛ kuma Anatɔtkaw kama, olu minw b'a fɛ ka ne faga. U ko: «I kana kiraya kɛ Matigi tɔgɔ la, ni o tɛ, an bolo na se i ma ka i faga.»
[22] Ayiwa Kɛlɛbolow Matigi ko: «Ne na u gosi. Kamalenw na faga npan fɛ. U denkɛw ni u denmusow na sa kɔngɔ fɛ.
[23] U tɔ si tɛna to, sabu ne na bɔnɛ bi Anatɔtkaw kan u ka hakɛw sara san na.»