[1] Matigi ye toro mɔ segi fila jira ne la, olu sigilen tun bɛ Matigi batosoba da la. O kɛra Juda bɔnsɔn ka masakɛ Jojakim denkɛ Jekoniya ni mɔgɔw kuntigiw minɛli kɔ Babilonɛ masakɛ Nebukadnezar fɛ ka taa ni u ye. A taara ni jiri dɛsɛlaw ni maɲɛrɛ dɔnnaw ye Babilonɛ.
[2] Segi kelen kɔnɔ toro mɔ tun ka ɲi, olu tun bɛ i ko toro mɔ kun fɔlɔw. Segi filanan toro mɔ tun manɲi hali dɔɔnin, mɔgɔ tun tɛ se ka u dun.
[3] Matigi y'a fɔ ne ye ko: «Jeremi, i ɲɛ bɛ mun na?» Ne y'a jaabi ko: «Toro mɔ. U dɔw ka ɲi kosɛbɛ, dɔw manɲi, u tiɲɛnna, hali u tɛ se ka dun.»
[4] O tuma la Matigi ka kuma sera ne ma, ko:
[5] «Kɛlɛbolow Matigi, Israɛl ka Ala ko: ‹A ka di i ye ka nin toro mɔɲumanw ye cogo min na, ne ye Juda bɔnsɔn minw gɛn ka bɔ yan ka bila ka taa jɔnya la Kalde jamana la, ne na olu jate ka ko ɲuman kɛ u ye ten.
[6] Ne na neɲɛɲuman jɔ u la ka ko ɲuman kɛ u ye ka u lasegin nin jamana kɔnɔ ka u lasigi walisa u kana halaki. Ne na u turu, ne tɛna u bɔ ka bɔ yen.
[7] Ne na dusukun di u ma walisa u k'a ne dɔn, ko ne de ye Matigi ye. U na kɛ ne ka mɔgɔw ye, ne na kɛ u ka Ala ye, k'a masɔrɔ u na segin ne ma ni u dusukun bɛɛ ye.
[8] ‹Juda ka masakɛ Sedesiasi ni a ka faamaw ani Jerusalɛmka tɔ tolen minw tora nin jamana la, ani minw sigilen bɛ Misira jamana la, ne na olu kɛ i ko nin toro mɔ jugu minw tɛ se ka dumu u juguya kosɔn.
[9] Ne na u don dugukolo kan masayaw bolo, olu ka u tɔɔrɔ. Ne na u jɛnsɛn jamana minw kɔnɔ, ne na u kɛ mafiɲɛyali fɛn ni ntalen da fɛn ni yɛlɛbɔ fɛn ni dangali fɛn ye olu cɛma.
[10] Ne na npan ni kɔngɔba ani fiɲɛbana lase u ma fo ka u bɛɛ halaki ka u ban ka bɔ ne ka jamana kɔnɔ, ne ye o min di u ni u bɛnbaw ma.›»