[1] Juda bɔnsɔn ka masakɛ Josiasi denkɛ Jojakim ka masaya daminɛ tuma la, Matigi ka kuma sera Jeremi ma.
[2] Matigi ko: «I ka i jɔ Matigi batosoba dukɛnɛ la. Mɔgɔ minw bɛ bɔ Juda bɔnsɔn ka duguw la ka na batoli kɛ Matigi ka so kɔnɔ, i ka ne ka nin kumaw fɔ olu ye. I kana hali kuma kelen bɔ a la.
[3] A dɔrɔ u na i lamɛn, u bɛɛ kelen-kelen na u ka sira juguw bila. Ni o kɛra ne yɛrɛ tun ye ko jugu min latigɛ u kama u ka juguya ni u ka kɛwale juguw kosɔn, ne na o dabila.
[4] «Ayiwa, i k'a fɔ u ye ko, Matigi ko: ‹Ni aw ma ne kan minɛ, ne ye sariya min sigi aw ye, ni aw ma o sira taama,
[5] ne ye ne ka baaraden kira minw ci aw ma siɲɛ caman, ni aw ma sɔn ka olu ka kuma lamɛn,
[6] ayiwa, ne ye min kɛ Silo la, ne na o ɲɔgɔn kɛ nin batosoba la ka nin dugu kɛ dangalen ye dugukolo kan siyaw bɛɛ cɛma.›»
[7] Sarakalasebaaw ni kiraw ani mɔgɔw bɛɛ ye o kumaw fɔkan mɛn Jeremi fɛ Matigi batosoba kɔnɔ.
[8] Ayiwa, Jeremi tilalen kɔ Matigi ka kumaw bɛɛ fɔli la mɔgɔw bɛɛ ye tuma min na, sarakalasebaaw ni kiraw ni mɔgɔw bɛɛ ye Jeremi minɛ k'a fɔ a ye ko: «I na faga.
[9] Mun kosɔn i ye kiraya kɛ Matigi tɔgɔ la k'a fɔ ko nin batosoba na kɛ i ko Silo, ko nin dugu na ci ka lankolonya fo mɔgɔ si tɛ sigi a kɔnɔ tun?» O tuma la u ye ɲɔgɔn lajɛ ka Jeremi lamini Matigi batosoba kɔnɔ.
[10] Juda bɔnsɔn kuntigiw ye o kuma mɛn minkɛ, u bɔra masaya so kɔnɔ ka yɛlɛn ka taa don Matigi batosoba kɔnɔ ka u sigi Matigi batosoba donda kura la.
[11] O tuma la sarakalasebaaw ni kiraw y'a fɔ kuntigiw ni mɔgɔw bɛɛ ye, ko: «Nin cɛ ka kan ni fagali ye, sabu a ye kiraya kɛ nin dugu kama i ko aw yɛrɛw tulo y'a mɛn cogo min na.»
[12] Nka Jeremi ye kuntigiw bɛɛ ni mɔgɔw bɛɛ jaabi ko: «Aw ye kuma minw bɛɛ mɛn, Matigi de ye ne ci ka o kuma fɔ nin batosoba ni nin dugu kama.
[13] Ayiwa sisan, aw ka aw taama cogo ni aw ka kɛwalew yɛlɛma, aw ka Matigi aw ka Ala kan lamɛn. Ni o kɛra, Matigi na nimisa a ka ko latigɛlen na aw kama.
[14] Ne kɔni, ne bɛ aw bolo.
[15] Nka aw k'a dɔn ko ni aw ye ne faga, aw na joli jalakibali hakɛ lase nin dugu ni a kɔnɔ mɔgɔw ma. K'a masɔrɔ Matigi de ye ne ci aw ma ka nin kuma fɔ aw ye, siga t'a la.»
[16] O tuma la kuntigiw ni mɔgɔw bɛɛ y'a fɔ sarakalasebaaw ni kiraw ye ko: «Nin cɛ man kan ka faga sabu a kumana an fɛ Matigi an ka Ala tɔgɔ la.»
[17] Jamana kɔnɔ cɛkɔrɔba dɔw wulila k'a fɔ jamaɲɛ na ko:
[18] «Mise min bɔra Moreset, o ye kiraya kɛ Juda bɔnsɔn ka masakɛ Ezekiasi tile la k'a fɔ ko Kɛlɛbolow Matigi ko: ‹Sion na sɛnɛ i ko foro, Jerusalɛm na kɛ tomon ye. Matigi batosoba bɛ kulu min kan, o na kɛ jiritu ye tintin kun na.›
[19] Juda bɔnsɔn ka masakɛ Ezekiasi ani Juda mɔgɔw bɛɛ ye o faga wa? Ezekiasi ma Ala bato ka makari deli a fɛ wa? Matigi tun ye ko min latigɛ u kama, a nimisara o la. An kɔni, ni an ye nin cɛ jalaki, an na kojuguba kɛ an yɛrɛw la.»
[20] Cɛ wɛrɛ fana ye kiraya kɛ Matigi tɔgɔ la. O tun ye Semaɛja denkɛ Uri ye ka bɔ Kirjat-Jearim. O ye kiraya kɛ nin dugu ni nin jamana ko la i ko a kɛra Jeremi fɛ cogo min na.
[21] Masakɛ Jojakim ni a ka kɛlɛkɛ cɛw bɛɛ ni a ka kuntigiw ye o kumaw mɛn minkɛ, masakɛ tun b'a fɛ ka Uri faga, nka Uri y'a mɛn minkɛ, a siranna. A bolila ka taa Misira.
[22] Masakɛ Jojakim ye Akbor denkɛ Elnatan ni mɔgɔ dɔw ci ka taa Misira.
[23] Olu ye Uri minɛ ka bɔ Misira ka taa n'a ye masakɛ Jojakim yɔrɔ. O y'a faga ni npan ye k'a su fili dingɛ kɔnɔ, mɔgɔ gwansanw su don yɔrɔ la.
[24] Nka Safan denkɛ sarakalasebaa Ahikam ye Jeremi dɛmɛ walisa a kana don mɔgɔw bolo ka faga.