[1] Matigi ka kuma sera Jeremi ma Juda bɔnsɔn ka masakɛ Sedesiasi ka masaya san tannan la. O kɛra Babilonɛ masakɛ Nebukadnezar ka masaya san tan ni seginnan la.
[2] Babilonɛ masakɛ ka kɛlɛbolow dagalen tun bɛ Jerusalɛm da la, o y'a sɔrɔ kira Jeremi datugulen tun bɛ kaso la Juda bɔnsɔn ka masaya so du kɔnɔ.
[3] Juda bɔnsɔn ka masakɛ Sedesiasi tun ye Jeremi bila kaso la kira Jeremi ka kiraya kuma kosɔn, ko Matigi ko a na nin dugu don Babilonɛ masakɛ bolo, o na a minɛ.
[4] Ko Juda bɔnsɔn ka masakɛ Sedesiasi tɛna kisi Kaldekaw ma nka a na don Babilonɛ masakɛ bolo. A na kuma a fɛ da ni da, u ɲɛw na kɛ naani ye.
[5] O masakɛ na Sedesiasi minɛ ka taa n'a ye Babilonɛ. A na to yen fo ni ne hakili jiginna a la tuma min na. Hali ni aw ye Kaldekaw kɛlɛ, aw tɛna se sɔrɔ.
[6] Jeremi ko: «Matigi ka kuma sera ne ma, ko:
[7] ‹A filɛ, i balimakɛ Salum denkɛ Hanameɛl bɛ na i sɛgɛrɛ k'a fɔ i ye, ko: «Ne ka foro min bɛ Anatɔt, i ka o san, sabu a sanni jo bɛ i fɛ, i bɛ se k'a san.» ›
[8] «O tuma la ne balimakɛ denkɛ Hanameɛl nana ne sɛgɛrɛ kɔlɔsilikɛlaw ka dukɛnɛ la ka kɛɲɛ ni Matigi ka kuma fɔlen ye. A y'a fɔ ne ye ko, a ka foro min bɛ Anatɔt, Benjamɛn jamana la, ko ne ka o san, sabu a sanni jo bɛ ne fɛ ka kɛɲɛ ni ciyɛn kunmabɔli ye. Ko ne ka o san ne yɛrɛ ye. Ayiwa, ne y'a dɔn ko Matigi ka ci don.
[9] «O cogo la ne balimakɛ denkɛ ka foro min bɛ Anatɔt, ne ye o san warijɛ sikle tan ni wolonwula la.
[10] Ne ye ne tɔgɔ sɛbɛn sannikɛ sɛbɛn la ka taamashyɛn nɔrɔ o la seerew ɲɛ na ka warijɛ suma ja la.
[11] Ne ye o sannikɛ sɛbɛn ta, taamashyɛn nɔrɔla min na, a kɛ cogo bɛɛ bɛ min kɔnɔ ani dɔ min dayɛlɛlen tun don.
[12] Ne ye o sannikɛ sɛbɛnw di Nerija denkɛ Baruk ma ne balimakɛ denkɛ Hanameɛl ɲɛ na ani seerew ni Yahutu minw tun bɛ kasobon dukɛnɛ la yen.
[13] O kɔ, ne y'a fɔ Baruk ye u ɲɛ na ko:
[14] ‹Kɛlɛbolow Matigi, Israɛl ka Ala ko, i ka nin sannikɛ sɛbɛnw ta, taamashyɛn nɔrɔla sɛbɛn min na ani min dayɛlɛlen don. I ka olu ta ka taa u bila bɔgɔ daga kɔnɔ walisa u maralen ka to ka mɛn.
[15] K'a masɔrɔ Kɛlɛbolow Matigi, Israɛl ka Ala ko, sow ni forow ni rezɛn nakɔw na san nin jamana kɔnɔ tun.›»
[16] Ne ye o sannikɛ sɛbɛn di Nerija denkɛ Baruk ma tuma min na, ne ye Matigi deli ko:
[17] «Sebaayabɛɛtigi Matigi, e min ye sankolo ni dugukolo da ni i ka barikaba ni i ka sebaaya ye, i tɛ kɛɲɛ foyi la.
[18] I ka ɲumaya bɛ se bɔnsɔn nata waa caman ma. I bɛ faw ka tilenbaliya hakɛ bɔ u denw la u kɔ. I ye Alaba Sebaayabɛɛtigi ye, i tɔgɔ ko Kɛlɛbolow Matigi.
[19] I ka ko latigɛlenw ye kabako ye, i ka kɛwalew ka bon. I bɛ i ɲɛ yɛlɛ ka Hadamadenw ka siraw bɛɛ filɛ ka mɔgɔw bɛɛ sara ka kɛɲɛ ni u ka siraw ni u ka kɛwalew ye.
[20] «I ye kabakow ni taamashyɛnw kɛ Misira jamana kɔnɔ ani Israɛl bɔnsɔn ni siyaw bɛɛ cɛma ka tɔgɔba sɔrɔ fo ka na se bi ma. A bɛ ten halibi.
[21] I ye i barikaba ni i ka setigiya jira ka taamashyɛn kabakomaw kɛ ka Israɛl bɔnsɔn labɔ Misira jamana kɔnɔ.
[22] I ye i kali u bɛnbaw ye jamana min ko la, i ye o di u ma. O falen bɛ nɔnɔ ni di la fo ka woyo.
[23] U ye u sigi yen, nka u ma i kan minɛ, u ma i ka sariya sira taama. I tun ye ci minw fɔ u ye, u ma o si kɛ. O de kosɔn i ye nin bɔnɛw bɛɛ lase u ma.
[24] «A filɛ, yɛlɛnyɛlɛnnanw sera nin dugu kogo ma, dugu bɛ ɲini ka minɛ. Kaldeka minw b'a kɛlɛ, a donna olu bolo npan ni kɔngɔba ani fiɲɛbana kosɔn. I tun ye kuma min fɔ, o selen filɛ.
[25] O bɛɛ n'a ta, e Matigi Ala tun y'a fɔ ne ye ko ne ka foro san warijɛ la ka seerew ɲini a la. Ayiwa dugu filɛ Kaldekaw bolo.»
[26] O tuma la Matigi ka kuma sera Jeremi ma, ko:
[27] «Ne ye Matigi, Hadamadenw bɛɛ Dabaa Ala de ye. Yala ko bɛ ne kɛɲɛ wa?»
[28] O de kosɔn Matigi ko: «Ne na nin dugu don Kaldekaw ani Babilonɛ masakɛ Nebukadnezar bolo. O na a minɛ.
[29] Kaldeka minw sigilen bɛ dugu da la, olu na don ka tasuma tugu dugu la k'a jeni. Baal ka sarakaw tun bɛ lase yɔrɔ minw na ka wusulan suma duman wusu bato fɛn wɛrɛw ye ka ne ka dimiya lawuli, u na o yɔrɔw bɛɛ jeni.»
[30] Matigi ko: «Kabini Israɛl bɔnsɔn ni Juda bɔnsɔn daminɛ tuma, u ma foyi kɛ ne ɲɛ kɔrɔ ko jugu dama kɔ. Ɔwɔ, Israɛl bɔnsɔn bɛ fɛn o fɛn kɛ, u bɛ o bɛɛ kɛ ka ne dusu dimin.
[31] Nin Jerusalɛm dugu kɛra ne ka dimiya lawuli sababu ni ne dusu bɔ sababu ye kabini u y'a sigi fo ka na se bi ma. O de kosɔn ne na a bɔ ne ɲɛ kɔrɔ.
[32] Ne dusu diminna Israɛl bɔnsɔn ni Juda bɔnsɔn ka ko jugu kɛlenw kosɔn, u yɛrɛw ni u ka masakɛw ni u kuntigiw ni u ka sarakalasebaaw ni u ka kiraw ni Juda bɔnsɔn ani Jerusalɛmkaw bɛɛ.
[33] U ye u kɔ sin ne ma, u ma sɔn ka u ɲɛ sin ne ma. Ne tun b'a fɛ ka u kalan. Ne ma u lasɔmili dabila nka u ma sɔn ka lamɛnni kɛ. Ne ka kalan ma don u hakili la.
[34] U ye u ka boli haramulenw bila ne batosoba kɔnɔ k'a nɔgɔ.
[35] U ye batoli kɛ yɔrɔw jɔ Baal ye Ben-Hinom jɛkɛnɛ la ka u denkɛw ni u denmusow kɛ saraka jenitaw ye Molɔk ye, k'a sɔrɔ ne ma miiri o la ko u bɛ o ko haramulenw kɛ ka Juda bɔnsɔn nɔgɔ.
[36] «Aw b'a fɔ nin dugu ko la ko a donna Babilonɛ masakɛ bolo npan ni kɔngɔba ani fiɲɛbana kosɔn, nka sisan Matigi Israɛl ka Ala b'a fɔ a ko la, ko:
[37] ‹Ne diminnen tun ye o dugu kɔnɔ mɔgɔ minw jɛnsɛn ka taa jamana bɛɛ la ne dusu bɔlenba kosɔn, nka ne na u lasegin ka na nin yɔrɔ yɛrɛ la walisa u sigilen ka to hɛrɛ la.
[38] U na kɛ ne ka mɔgɔw ye, ne na kɛ u ka Ala ye.
[39] Ne na dusukun kelen don u kɔnɔ walisa u ka siran neɲɛ tuma bɛɛ, u ni u denw ka hɛrɛ kosɔn.
[40] Ne na layidu wulibali ta u ye ko ne tɛna u bila. Ne na ko ɲuman kɛ u ye ka neɲɛsiran kɛ u dusukun na walisa u kana ne bila.
[41] A na diya ne ye ka ko ɲuman kɛ u ye. Ne na u sabati o jamana kɔnɔ ni ne dusukun bɛɛ ani ne ni bɛɛ ye.›»
[42] Ayiwa Matigi ko: «Ne ye nin bɔnɛbaw bɛɛ bi nin mɔgɔw kan cogo min na, o cogo la ne ye ko ɲumanba minw fɔ u ko la, ne na olu bɛɛ dafa.
[43] Forow na san nin jamana kɔnɔ, hali ni aw b'a fɔ ko kungokolon don, ko mɔgɔ ni bagan si tɛ a kɔnɔ, ko u bɛɛ donna Kaldekaw bolo.»
[44] Ne ko: «Forow na san warijɛ la. Sannikɛ sɛbɛnw na dila ka taamashyɛnw nɔrɔ u la seerew ɲɛ na. O na kɛ Benjamɛn jamana ni Jerusalɛm lamini la ani Juda bɔnsɔn ka duguw kɔnɔ ani kuluw kan ani jɛkɛnɛ la duguw la ani worodugu yanfan duguw la, k'a masɔrɔ ne na u la mɔgɔ cɛlenw kɔsegin.» Matigi ko ten.