[1] Matigi ka kuma sera Jeremi ma a siɲɛ filanan la k'a to kasobon dukɛnɛ la.
[2] Matigi min ye dugukolo da ka a dila ka a mara a cogo la, ni a tɔgɔ ko Matigi, ale ko:
[3] «I ka ne tɔgɔ wele, ne na i jaabi ka koba dogolenw jira i la, i tun tɛ minw dɔn fɔlɔ.
[4] «Ne, Matigi Israɛl ka Ala y'a fɔ nin dugu sow ani Juda bɔnsɔn ka masakɛw ka sow ko la, ko olu na bi kɛlɛkɛ minanw ni juguw ka npan fɛ.
[5] Ni u taara Kaldekaw kɛlɛ, nin sow na fa mɔgɔ suw la, ne diminnenba na olu minw gosi. Ne na neɲɛda dogo nin dugu la u ka juguya kosɔn.
[6] O bɛɛ n'a ta ne na a jogindaw siri ka a kɛnɛya. Ne na a kɔnɔ mɔgɔw kɛnɛya. Ne na hɛrɛ ni lafiya banbali di u ma.
[7] Ne na Juda bɔnsɔn ni Israɛl bɔnsɔn mɔgɔ minɛlenw lasegin ka bɔ jɔnya la ka u lasigi hɛrɛ la i ko u tun bɛ cogo min na ka kɔrɔ.
[8] U ye tilenbaliya ko minw kɛ ne la, ne na u saniya olu bɛɛ ma. U ye tilenbaliya minw kɛ ka muruti ne ma, ne na olu bɛɛ yafa u ma.
[9] Nin dugu na kɛ ne nisɔndiya sababu ni ne tanuli sababu ni ne nɔɔrɔ ye dugukolo kan siyaw bɛɛ cɛma. Ne na ko ɲuman kɛ Israɛl ye ka hɛrɛ kɛ u ye cogo min na, siyaw na o ye ka kabakoya o la ka siran.»
[10] Ayiwa Matigi ko: «A bɛ fɔ nin yɔrɔ ko la ko kungokolon don, ko mɔgɔ wala bagan si tɛ a kɔnɔ, ko Juda bɔnsɔn ka duguw ni Jerusalɛm dugu cira, ko mɔgɔ si wala bagan si tɛ u kɔnɔ tun,»
[11] nka Matigi ko: «ɲagalikan na bɔ u kɔnɔ tun ani tanulikan ni kɔɲɔcɛkan ani kɔɲɔmusokan ani minw b'a fɔ, ko: ‹Kɛlɛbolowtigi ka tanu, k'a masɔrɔ Matigi ka ɲi, a ka makari tɛ ban badaa.› Olu bɛna u ka barika dali sarakaw lase Matigi batosoba kɔnɔ, k'a masɔrɔ ne na nin jamana kɔnɔ mɔgɔw kɔsegin ka bɔ jɔnya la ka u kɛ i ko u tun bɛ cogo min na ka kɔrɔ.» Matigi ko ten.
[12] Ayiwa Kɛlɛbolow Matigi ko: «Nin jamana min lankolon don, ni mɔgɔ wala bagan si tɛ a kɔnɔ tun, saga gɛnnaw na sigi nin yɔrɔw la ani a duguw bɛɛ kɔnɔ, u na si yan ka u ka baganw kɔlɔsi.»
[13] Matigi ko: «Sagaw na tɛmɛn saga jatebaaw ka bere kɔrɔ kulu jamana duguw ni jɛkɛnɛ duguw ani worodugu yanfan duguw ni Benjamɛn ka jamana duguw ani Jerusalɛm laminiw ni Juda bɔnsɔn ka duguw la ko kura.» Matigi ko ten.
[14] Matigi y'a fɔ ko kura ko: «Don bɛ na, ne ye kumaɲuman minw fɔ Israɛl bɔnsɔn ka so ni Juda bɔnsɔn ka so ko la, ne na o kɛ ka dafa.
[15] O don ni o waati la ne na Dawuda bɔnsɔn sɛbɛ dɔ lawuli. A na jamana mara ni tilennenya ni jɛlenya ye.
[16] O don na Juda bɔnsɔn na kisi, Jerusalɛm na hɛrɛ sɔrɔ. Jerusalɛm tɔgɔ na wele ko: ‹Matigi, an ka tilennenya.›»
[17] Ayiwa Matigi ko: «Dawuda bɔnsɔn tɛna dɛsɛ Israɛl bɔnsɔn ka masasigilan kan.
[18] Sarakalasebaa minw bɔra Levi bɔnsɔn na, olu na ne ka so kɔnɔ baara kɛ tuma bɛɛ, ka saraka jenitaw ni mugu sarakaw ni sarakaw bɔ don o don.»
[19] Matigi ka kuma sera Jeremi ma ko kura ko,
[20] Matigi ko: «Ne ye sariya min wajibiya su ni tile ma, aw bɛ se ka o tiɲɛn wa? Aw bɛ se ka u bali ko su tɛ ko ka dugu jɛ a waati la wa? Ayi, o tɛ se ka kɛ.
[21] O cogo la, ne ye layidu min ta ne ka jɔnkɛ Dawuda ye, o fana tɛ se ka tiɲɛn abada. Mɔgɔ si tɛ se ka a bali cogo si la ko Dawuda bɔnsɔn dɔ tɛ sigi a ka masasigilan kan Jerusalɛm. Ne ye layidu min ta Levi ye, mɔgɔ si tɛ se ka o bali, ko Levi bɔnsɔn tɛ sarakalasebaaya baara kɛ ne ye tuma bɛɛ.
[22] Mɔgɔ tɛ se ka sankolola dolow ni kɔgɔji dala cɛncɛn dan cogo min na, ne na ne ka jɔnkɛ Dawuda bɔnsɔn ni ne ka baarakɛlaw Levi bɔnsɔn fana caya o cogo la.»
[23] Matigi ka kuma sera Jeremi ma ko kura ko:
[24] «Nin mɔgɔw ye kuma minw fɔ, i ma olu mɛn wa? U ko, ne ye gwa fila minw ɲɛnatɔmɔ, Israɛl ni Juda kɔni, ko ne banna olu la. U bɛ ne ka mɔgɔw mafiɲɛya olu yɛrɛw ɲɛ na ko u tɛ siya ye tun.»
[25] Nka Matigi bɛ min fɔ, o filɛ nin ye ko: «Ne ye layidu wulibali ta su ni tile ye ka sariya sigi sankolo ni dugukolo ye cogo min na,
[26] o cogo la ne tɛna ban Yakuba bɔnsɔn ni ne ka jɔnkɛ Dawuda bɔnsɔn la. Ne na a bɔnsɔn mɔgɔ dɔɲɛnatɔmɔ k'a sigi Ibrahima ni Isaka ni Yakuba bɔnsɔnw kun na, k'a masɔrɔ ne na u ka mɔgɔ minɛlenw lasegin ka bɔ jɔnya la ka makari u la.»