[1] Kuma min sera Jeremi ma Juda bɔnsɔn ko la Josiasi denkɛ Jojakim ka masaya san naaninan la, Babilonɛ masakɛ Nebukadnezar ka masaya san fɔlɔ la, o filɛ nin ye.
[2] Kira Jeremi ye nin kuma fɔ Juda bɔnsɔn ani Jerusalɛmkaw bɛɛ ɲɛ na ko:
[3] «Kabini Amɔn denkɛ Juda ka masakɛ Josiasi ka masaya san tan ni sabanan la fo ka na se bi ma, Matigi ka kuma sera ne ma o san mugan ni saba kɔnɔ. Ne tora ka kuma aw fɛ kabini o waati la, nka aw ma sɔn ka ne lamɛn.
[4] Matigi tora ka a ka baaraden kiraw bɛɛ ci aw ma. A tora ka kuma aw fɛ, nka aw ma olu kan minɛ, aw ma aw tulo majɔ ka olu lamɛn.
[5] U tora k'a fɔ aw ye ko aw bɛɛ kelen-kelen ka aw ka sira juguw bila ka aw ka kɛwale juguw dabila. Ni o kɛra, Matigi ye jamana min di aw bɛnbaw ma, aw na to yen badaa.
[6] Aw kana tugu bato fɛn wɛrɛw la ka baara kɛ olu ye ka biri u kɔrɔ. Aw kana keleya don ne la ni aw bolo baara nɔw ye, walisa ne kana na ko jugu kɛ aw la.
[7] Nka aw ma sɔn ka ne kan minɛ, aw ye ne dusu dimin ni aw bolo baara nɔw ye ka tɔɔrɔ lase aw yɛrɛw ma.» Matigi ko ten.
[8] Kɛlɛbolow Matigi ye min fɔ, o filɛ nin ye, ko: «K'a sɔrɔ aw ma sɔn ka ne ka kuma lamɛn,
[9] o de kosɔn ne na saheli yanfan jamana siyaw ci ka na aw kama. Ne na ne ka jɔnkɛ Babilonɛ masakɛ Nebukadnezar ci nin jamana ni a kɔnɔ mɔgɔw ani u lamini siyaw kama. Ne na u halaki ka u ban. Ne na u kɛ kabako fɛn ni dala file fyɛ fɛn ye ka jamana lankolonya badaa.» Ne, Matigi ko ten.
[10] «Ne na ɲagalikan ni nisɔndiyakan ban ka bɔ u cɛma. Kɔɲɔcɛ ni kɔɲɔmuso dɔnkili dakan tɛna mɛn tun. Ɲɔ susukan na ban, lanpa yeelen tɛna ye tun.
[11] Jamana yɔrɔw bɛɛ na lankolonya, a kɔnɔ mɔgɔw na baara kɛ Babilonɛ masakɛ ye san biwolonwula kɔnɔ.»
[12] Matigi ko: «Ni o san biwolonwula dafara tuma min na, ne na tɔɔrɔba lase Babilonɛ masakɛ ni a ka mɔgɔw ma u ka tilenbaliya kosɔn. Ne na tɔɔrɔ bi Kalde jamana kan k'a kɛ tomon ye badaa.
[13] Ne ye tɔɔrɔ minw latigɛ u ka jamana kama, ne na olu dafa. Kuma minw sɛbɛnna nin kitabu kɔnɔ, kira Jeremi ye kuma minw fɔ siyaw bɛɛ kama, ne na olu bi u kan.
[14] Katuguni setigibaw ni masakɛbaw na Kaldekaw yɛrɛ bila jɔnya la. Ne na u sara ka kɛɲɛ ni u yɛrɛw ka kɛwale juguw ni u bolo baara nɔw ye.»
[15] Ayiwa Matigi, Israɛl bɔnsɔn ka Ala y'a fɔ ne ye ko: «Nin jifilen min falen bɛ ni ne ka dimiya minni fɛn ye, i ka o minɛ ne bolo. Ne na i ci ka taa siya o siya ma, i ka o mɔgɔw lamin o la.
[16] U na o min ka u talontalon ka u hakili tiɲɛn i ko fatɔ, katuguni ne na kɛlɛ ci u cɛma.»
[17] Ayiwa, ne ye o jifilen minɛ Matigi bolo. Matigi ye ne ci siya minw ma, ne ye olu lamin ni o ye.
[18] Jerusalɛm ni Juda bɔnsɔn ka duguw kɔnɔ mɔgɔw ni u ka masakɛw ni u kuntigiw bɛɛ, ne ye olu lamin o la walisa u ka halaki ka ban ka kɛ yɛlɛbɔ fɛn ye ka u danga i ko a bɛ cogo min na bi.
[19] Ne ye ninw fana lamin o la, Misira masakɛ Faraon ni a ka baaradenw ni a ka kuntigiw ani a ka mɔgɔw bɛɛ,
[20] ani Arabi jamana mɔgɔw bɛɛ ani Filisitikaw ka jamana masakɛ minw bɛ Askalon ni Gaza ani Asdɔd mɔkɔ ɲɛnama tɔ tolenw
[21] ni Edɔmkaw ni Moab ni Amɔn bɔnsɔn
[22] ni Tir masakɛw ani Sidɔn masakɛw bɛɛ ni kɔgɔji dala jamanaw masakɛw
[23] ani Dedankaw ni Temankaw ni Buzkaw ani minw bɛɛ bɛ u kun kɔrɔbɔ,
[24] ani Arabi jamana masakɛw bɛɛ ani siyaw ka masakɛ minw sigilen bɛ kungokolon kɔnɔ
[25] ani Zimri masakɛw bɛɛ ni Elam masakɛw bɛɛ ani Medi jamana masakɛw bɛɛ
[26] ani saheli yanfan jamana masakɛ minw yɔrɔ ka surun ani minw yɔrɔ ka jan ani masaya minw sigilen bɛ dugukolo kan. Olu bɛɛ kɔ, Sesak na o dimiya minni fɛn min.
[27] I k'a fɔ olu ye ko: «Kɛlɛbolow Matigi, Israɛl ka Ala ko: ‹A' ye aw min ka aw ɲɛnamini ka fɔɔnɔ ka bi duguma, aw kana wuli tun katuguni ne na ne ka npan ci aw cɛma.
[28] Ni u ma sɔn ka jifilen minɛ i bolo ka o min, i k'a fɔ u ye ko Kɛlɛbolow Matigi y'a fɔ ko, siga t'a la, u na a min.
[29] A filɛ, dugu min bɛ wele ne tɔgɔ la, ne ye ne ka tiɲɛnni daminɛ yen. Yala aw bɛ miiri ko aw ɲangibali na to wa? Ayi dɛ. Aw ɲangibali tɛna to, sabu ne na kɛlɛ ci dugokolo kan mɔgɔw bɛɛ ma.›» Kɛlɛbolow Matigi ko ten.
[30] E kɔni ka kiraya kɛ ka nin kow bɛɛ fɔ u kama, ko: «Matigi na pɛrɛnkan bɔ k'a to sankolo la, a na konbokan bɔ k'a to a sigi yɔrɔ senuma la. A na gɔrɔntɔ a sigi yɔrɔ kama, a na pɛrɛnkan bɔ dugukolo kan mɔgɔw bɛɛ kama i ko mɔgɔ minw bɛ rezɛn foroki.
[31] O mankan na se fo dugukolo dan na, sabu Matigi donna kiri tigɛ yɔrɔ la siyaw kama. A bɛ kiri tigɛ dafɛnw bɛɛ kan. A na mɔgɔ juguw bɛɛ faga ni npan ye.» Matigi ko ten.
[32] Kɛlɛbolow Matigi ko: «Bɔnɛ na bɔ siya dɔ la ka se siya dɔ ma. Fiɲɛba na wuli ka bɔ dugukolo dan na.»
[33] Matigi na mɔgɔ minw faga o don na, olu suw na dugukolo yɔrɔw bɛɛ datugu. Kasikan tɛna mɛn, u suw tɛna cɛ, u tɛna don. U na kɛ i ko dugukolo nɔgɔ.
[34] Saga gɛnnaw, aw ka nwunan ka kasikan bɔ. Sagaɲɛminɛbaaw, aw ka aw kolonkolon buguri la, k'a masɔrɔ aw kan tigɛ don sera. Ne na aw jɛnsɛn, aw na bi ka ɲɔɲɔ i ko dagaɲuman bilen duguma.
[35] Dogo yɔrɔ tɛna kɛ saga gɛnnaw fɛ. Sagaɲɛminɛbaaw tɛna kisi.
[36] Saga gɛnnaw kasikan bɔra, sagaɲɛminɛbaaw nwunankan bɛ mɛn, k'a masɔrɔ Matigi ye bagan gɛn yɔrɔw bɛɛ tiɲɛn.
[37] U ka sigi yɔrɔɲumanw bɛɛ jenina ni Matigi ka dimiya tasuma ye.
[38] A bɔra a sigi yɔrɔ la i ko waraba kamalen bɛ bɔ a dogo yɔrɔ la cogo min na. Jamana donna tiɲɛnnikɛlaw ni halakilikɛlaw bolo ka a tiɲɛn a ka dimiyaba kosɔn.