[1] Matigi u ka Ala tun ye kuma minw bɛɛ don Jeremi da la k'a fɔ u ye, Jeremi tilalen kɔ Matigi u ka Ala ka o kuma bɛɛ fɔli la mɔgɔw ye,
[2] Hose denkɛ Azariya ni Kareak denkɛ Jokanan ani o kuncɛbaw bɛɛ y'a fɔ Jeremi ye ko: «I ye nkalon kuma fɔ. Matigi an ka Ala m'a fɔ i ye ko an kana taa an sigi Misira.
[3] Nka Nerija denkɛ Baruk ye i kɔnɔna su an kama walisa ka an don Kaldekaw bolo, olu ka an faga wala ka taa ni an ye Babilonɛ.»
[4] Ayiwa Jokanan ani kɛlɛkɛ cɛw kuntigiw ani mɔgɔ tɔw ma sɔn ka Matigi ka kuma fɔlen lamɛn ka sigi Juda bɔnsɔn ka jamana kɔnɔ.
[5] Jokanan ani kɛlɛkɛ cɛw kuntigiw taara ni Juda bɔnsɔn la mɔgɔ tɔ tolenw ye Misira, olu minw kɔseginna Juda bɔnsɔn ka jamana kɔnɔ ka bɔ siyaw bɛɛ cɛma, u tun gɛnna ka taa o yɔrɔw la,
[6] cɛw ni musow ani denmisɛnw ani masakɛ denmusow. Garadiw kuntigi Nebuzar-Adan tun ye mɔgɔ minw kalifa Safan denkɛ Ahikam denkɛ Gedaliya ma ani kira Jeremi yɛrɛ ani Nerija denkɛ Baruk, u taara ni olu fana ye.
[7] U ye Matigi kan bila ka taa Misira. U ma Matigi ka ci fɔlen taama. U sera Takpanez.
[8] Ka u to Takpanez, Matigi ka kuma sera Jeremi ma, ko:
[9] «I ka kabakurunbaw ta ka u dogo bɔgɔ la biriki gosi yɔrɔ la Faraon ka masaya so donda la Takpanez. I ka o kɛ Yahutuw ɲɛ na.
[10] I k'a fɔ u ye, ko ne, Kɛlɛbolow Matigi, Israɛl ka Ala ko: ‹Ne na ne ka baaraden Babilonɛ masakɛ, Nebukadnezar wele. Ne ye kabakurun minw dogo, ne na a ka masasigilan sigi o kabakurunw kan. A na a ka finiso jɔ u kan.
[11] Ni a nana, a na Misira jamana tiɲɛn. Mɔgɔ dɔw na sa, dɔw na kɛ jɔnw ye, dɔw na faga ni npan ye.
[12] A na tasuma bila Misira bato fɛnw batosow la. Nebukadnezar na Misira boli dɔw jeni ka taa ni dɔw ye. A na a yɛrɛ masiri ni Misira jamana ye i ko saga gɛnna bɛ dulɔkiba don a kan na cogo min na. A na se sɔrɔ ka kɔsegin ka taa hɛrɛ la.
[13] A na tile batoso samasenw karikari Misira jamana kɔnɔ ka Misira bato fɛnw batosow jeni ni tasuma ye.›»