[1] Matigi ko: «Ni mɔgɔ dɔ ye a muso bila, ni cɛ wɛrɛ ye o muso furu, o muso cɛ fɔlɔ bɛ sɔn ka o muso ta tun wa? O tɛna jamana yɛrɛ nɔgɔ kosɛbɛ wa? Nka e de ye kakalaya kɛ mɔgɔ caman fɛ. O kɔ, i bɛ segin ne ma wa?» Matigi ko ten.
[2] «I ka i ɲɛ kɔrɔta san fɛ ka tintinw filɛ. Yɔrɔ kɔrɔtalen jumɛn bɛ yen ni i ma jatɔya kɛ o yɔrɔ la? I ye i jɔ sira da la ka makɔnɔli kɛ i ko Arabu b'a kɛ kungokolon kɔnɔ cogo min na. I ye jamana yɔrɔ bɛɛ nɔgɔ ni i ka jatɔya kow ni i taama cogo juguw ye.
[3] O de kosɔn i ma sanji sɔrɔ, i ma sanji kosa fana sɔrɔ. Nka i bɛ to ka o jatɔmusoya kɛ, i tɛ maloya fewu.
[4] «Ayiwa sisan i bɛ kasi ne nɔ fɛ, ko: ‹Ne fa, e min kɛra ne teri ye kabini ne denmisɛnma,
[5] i diminnen na to ne kɔrɔ tuma bɛɛ wa? I na i ka dimiya mara badaa wa?› I ye min fɔ, o filɛ o ye, o bɛɛ n'a ta i bɛ to ka ko jugu kɛ.»
[6] Ayiwa Matigi y'a fɔ ne ye masakɛ Josiasi tile la ko: «O siya kanbilalidenw, Israɛl bɔnsɔn ye min kɛ, i ye o ye wa? A taara kulu janw kan ani jirisunw bɛɛ kɔrɔ ka a yɛrɛ nɔgɔ.»
[7] Ne ko: «A ka tilenbaliyaw bɛɛ kɛlen kɔ, a na kɔsegin ne ma. Nka a ma kɔsegin ne ma. A balimamuso Juda bɔnsɔn siya janfanci kɛra a seere ye.
[8] Hali ni ne ye nin siya murutilen Israɛl bɔnsɔn bila ka taa a ka jatɔya kosɔn ka furu sa sɛbɛn di a ma, nka ne y'a ye ko a balimamuso Juda siya janfanci ma siran. Ale fana taara a yɛrɛ nɔgɔ.
[9] A ye o jamana nɔgɔ ka jatɔya kɛ kabakurun bato fɛnw ni jiri bato fɛnw fɛ ni a ka ko haramulenw ye.»
[10] Matigi ko: «Ka fara o bɛɛ kan, a balimamuso Juda bɔnsɔn janfanci ma na ne ma ni a dusukun bɛɛ ye fɔ dala kuma dama.»
[11] Matigi y'a fɔ ne ye ko Israɛl murutilen ye a yɛrɛ jira tilennen ye ka tɛmɛn Juda janfanci kan.
[12] I ka taa nin kuma welewele da saheli yanfan fɛ ko Matigi ko: «Israɛl siya murutilen, i ka kɔsegin. Ne tɛna i filɛ ni ne ka dimiya ye tuma bɛɛ, sabu ne ye makaritigi ye.» Matigi ko ten. «Ne diminnen tɛna to i kɔrɔ tuma bɛɛ.
[13] Nka i ka i yɛrɛ ka fililiw dɔn ka i jɔ u la. I ye tilenbaliya kɛ Matigi i ka Ala la. I taara i yɛrɛ di dunanw ma ka taa jirisunw bɛɛ kɔrɔ. I ma sɔn ka Matigi kan lamɛn.»
[14] Matigi ko: «Denmisɛn murutilenw, aw ka nimisa aw ka kow la sa, k'a masɔrɔ ne ye aw karamɔgɔ ye. Ne na aw kelen-kelen ta ka bɔ duguw la ka aw fila-fila ta ka bɔ gwaw la ka taa ni aw ye Sion.
[15] Ne na saga gɛnnaw di aw ma ka kɛɲɛ ni ne dusukun ka ko latigɛlen ye. U na aw balo ni dɔnniya ni hakilitigiya ye.
[16] «Ni aw bonyara ka caya o jamana kɔnɔ tuma min na, o donw na aw tɛna kuma Matigi ka layidu wagande ko la tun.» Matigi ko ten. «U tɛna miiri a ko la tun, u tɛna kuma a ko la tun. U si tɛna nimisa o ko la tun. Dɔ wɛrɛ tɛna dila tun.
[17] O tuma la Jerusalɛm na wele ko: ‹Matigi ka masasigilan.› Siyaw bɛɛ naɲɔgɔn lajɛ Jerusalɛm ka Matigi bato. U dusukunw tɛna jɛngɛ ka taa ko jugu si nɔ fɛ.
[18] O don na Juda ka so na taa fara Israɛl ka so kan. U fila bɛɛ bɛ na ka bɔ jɔnya laɲɔgɔn fɛ saheli yanfan fɛ. Ne ye jamana min di u bɛnbaw ma ka kɛ u ciyɛn ye, u na u sigi o kɔnɔ.»
[19] Matigi ko: «Ne tun y'a fɔ ko ne na sigi yɔrɔɲumanba di i ma ne denw cɛma, ne na ciyɛn bɛɛ laɲuman di i ma siyaw cɛma. Ne tun y'a fɔ ko i na ne wele ko i Fa, ko i tɛna ne bila ka fara ne la tun.
[20] Nka muso bɛ a cɛ janfa ka a bila cogo min na, aw, Israɛl ka so, aw ye ne janfa ten.» Matigi ko ten.
[21] Mankanba bɛ mɛn kuluw kan, Israɛl bɔnsɔn kasikan ni u ka deliliba kan don, k'a masɔrɔ u ye sira dulenw minɛ ka ɲinɛ Matigi u ka Ala kɔ.
[22] Denmisɛn murutilenw, aw ka nimisa o kow la, ne na yafa aw ma ka duba aw ye. Aw b'a fɔ ko: «An filɛ, an na kɔsegin i ma k'a masɔrɔ i ye Matigi an ka Ala ye.
[23] An ye an yɛrɛw lafili boli batoli fufafu la. O mankan min bɛ bɔ kuluw kan, o ye fuu de ye. Tiɲɛ la, Matigi, an ka Ala ye Israɛl Kisibaa ye.
[24] Boli batoli ye tiɲɛnni kɛ kabini an denmisɛnma. An bɛnbaw ye nafa minw sɔrɔ, u ka sagaw ni u ka misiw ni u denkɛw ni u denmusow kɔni, boli ye olu bɛɛ ban.
[25] An ka maloya ka kɛ an ka dali dlan ye, an ka wayiba ka kɛ an ka birifini ye. K'a masɔrɔ an ni an bɛnbaw ye Matigi an ka Ala hakɛ ta kabini an denmisɛnma fo ka na se bi ma. An ma Matigi an ka Ala kan minɛ.»