[1] Matigi ka kuma sera ne ma, ko ne ka taa nin kibaru welewele da Jerusalɛmkaw tulo kɔrɔ k'a fɔ u ye ko:
[2] Matigi ko: «Ne hakili bɛ i denmisɛnma ka kantigiya la ani i maminɛ tuma kanuya. I tugura ne kɔ kungokolon lankolon kɔnɔ jamana sɛnɛbali la.»
[3] Matigi ko: «Israɛl bɔnsɔn tun ye siya senuma ye ne ye, u kɛra ne ka fɛn sɔrɔlenw fɔlɔ ye. Minw tun b'a fɛ ka u halaki, olu bɛɛ ɲankatana. Bɔnɛ ye olu sɔrɔ.»
[4] Yakuba ka so ani Israɛl bɔnsɔn ka gwaw bɛɛ, aw ka Matigi ka kuma lamɛn.
[5] Matigi ko: «Yala aw bɛnbaw ye tilenbaliya jumɛn ye ne la, fo u ye u mabɔ ne la, ka tugu fɛn fufafuw nɔ fɛ, ka kɛ olu bɔɲɔgɔnkow ye?
[6] U t'a fɔ ko, Matigi min ye u labɔ Misira, o bɛ min? O min ye u ɲɛ minɛ ka kungokolon cɛ tigɛ, o jamana ye dugukolo jintan dingɛma ye, ja ni saya bɛ o jamana la, mɔgɔ si tɛ tɛmɛn yen, mɔgɔ si tɛ sigi o yɔrɔ la.
[7] Ne taara ni aw ye jamana hinɛma la, fɛn bɛɛ b'a la, walisa aw ka dumuni kɛ yen ka nisɔndiya a nafa kosɔn. Nka aw selen yen, aw ye ne ka jamana nɔgɔ, ka ne ka ciyɛn dugukolo kɛ ko haramulen kɛ yɔrɔ ye.
[8] Hali sarakalasebaaw m'a fɔ ko: ‹Matigi bɛ mini?› Sariya karamɔgɔw ma ne dɔn. U ɲɛminɛbaaw murutira ne ma. Kiraw ye kiraya kɛ Baal tɔgɔ la. Bato fɛn minw tɛ se ka u kisi, u tugura olu la.»
[9] O de kosɔn Matigi ko: «Ne na to ka aw ɲankata, fo ka taa se aw denw ta denw ma.
[10] Aw ka kɔgɔji kan taama kɛ fo ka taa se Sipre gun ma ka kunnafoni ɲini, aw ka mɔgɔ dɔ ci ka taa Kedar jamana la ka sɛgɛsɛgɛli kɛ yala ni ninɲɔgɔn kɛra fɔlɔ.
[11] Hali ni siya dɔ ka bato fɛnw tɛ bato fɛn sɛbɛw ye, yala u bɛ sɔn ka olu falen bato fɛn wɛrɛw la wa? Nka ne ka mɔgɔw ye u nɔɔrɔ falen bato fɛn fufafuw la.
[12] Sankolow, aw ka kabakoya nin ko la, aw ka kabakoya ka siran ka yɛrɛyɛrɛ kosɛbɛ,
[13] k'a masɔrɔ ne ka mɔgɔw ye jalakima ko fila kɛ. Ne min ye jiɲɛnama ye, u ye ne bila, ka ji dingɛw sen u yɛrɛw ye, ji dingɛ pɛrɛnpɛrɛnlenw don, ji tɛ mɛn minw kɔnɔ.
[14] Yala Israɛl ye jɔn ye wa? Wolosoden don wa? Mun kosɔn a donna cɛlikɛlaw bolo?
[15] Cɛlikɛlaw bɛ konbo a kama, ka gɔrɔntɔ i ko waraba kamalenw. U ye a ka jamana kɛ kungokolon ye. Tasuma ye a ka duguw jeni, mɔgɔ si tɛ u kɔnɔ tun.
[16] Hali Nof dugudenw ani Takpenes dugudenw y'a kunkolo ci.
[17] O fɛnw bɛɛ sera i ma k'a masɔrɔ i ye Matigi i ka Ala bila, o min tun bɛ i ɲɛ minɛ siraɲuman fɛ.
[18] Ayiwa sisan, mun kosɔn i bɛ Misira sira minɛ, ka taa Nil baji min? Ka taa Asiri jamana la ka Ufrate baji min, mun nafa bɛ o la?
[19] I ka juguya sara na di i ma, i ka tilenbaliya doni na da i kun. O tuma la i n'a ye k'a dɔn ko i ye Matigi i ka Ala bila, o ye ko juguba ni ko kunamaba ye. I ma siran neɲɛ, o ye ko jugu ye.» Matigi, Kɛlɛbolowtigi Ala ko ten.
[20] Matigi ko: «Israɛl, kabini tuma jan, i ye i ka zu kari ka i sirilanw tigɛ. I ko i tɛna kɛ jɔn ye tun, nka i ye i da tintin janw bɛɛ kan ani jiri kɛnɛw bɛɛ kɔrɔ ka kakalaya kɛ i ko jatɔmuso.
[21] Ne tun ye i turu i ko rezɛn sun sɛbɛɲuman. E dun yɛlɛmana ka kɛ rezɛn sun wɛrɛ ye cogo di?
[22] Hali ni i kora ni safunɛ ye, ka i ko ni sɛgɛji ye, i ka jurumuw na to ne ɲɛ kɔrɔ.» Matigi Ala ko ten.
[23] I dun bɛ se k'a fɔ cogo di ko u ma i nɔgɔ, ko i ma tugu Baal boliw nɔ fɛ. I ka i sen nɔw kɔlɔsi jɛkɛnɛ la, ka i ka ko kɛlen dɔn. I kɛra i koɲaamɛmuso min bɛ yaalayaala kungokolon kɔnɔ,
[24] ani kungo falimuso, min bɛ fiɲɛ foron a diyaɲe waati la. Jɔn bɛ se ka a bali a negela ko la? Kungo falikɛ minw bɛ a ɲini, olu tɛ u yɛrɛw sɛgɛn, sabu u bɛ a sɔrɔ u sagona waati la.
[25] Matigi ko: «Israɛl, i ka i yɛrɛ kɔlɔsi, i kana i ka sabara fara, i ngɔnɔ kana ja minnɔgɔ fɛ. Nka i ko, o laadili kuma ye fɛn fuu de ye, bato fɛn wɛrɛw ko ka di i ye, i b'a fɛ ka tugu olu la.
[26] «Ni sonyalikɛla minɛna sonyali la, a bɛ maloya cogo min na, Israɛl ka so na maloya o cogo la. U ka masakɛw ni u ka kuntigiw ni u ka sarakalasebaaw ani u ka kiraw bɛɛ na maloya o cogo la.
[27] U b'a fɔ jirisun ye ko: ‹I ye an fa ye›, k'a fɔ kabakurun ye ko: ‹I ye an bange›. K'a masɔrɔ u ye u ko sin ne ma, u ma sɔn ka ne filɛ. Nka ni bɔnɛ ye u sɔrɔ tuma min na, u b'a fɔ ko ne ka wuli ka u kisi.
[28] Ayiwa Juda, i ye bato fɛn minw dila, olu dun bɛ min? Olu ka wuli ka i kisi bɔnɛ don na sa, ni u bɛ se, sabu i ka bato fɛnw fana cayara i ko i ka duguw.
[29] «Mun kosɔn aw bɛ ne sɔsɔ? Aw kɔni, aw bɛɛ murutira ne ma.» Matigi ko ten.
[30] «Ne ye aw ka mɔgɔw bugɔ fuu. U ma sɔn laadili ma. Aw ka npan ye aw ka kiraw faga ka u ban i ko waraba halakilikɛla.
[31] Sisan mɔgɔw, Matigi bɛ min fɔ, aw ka o lamɛn. Ne kɛra i ko kungokolon wala dibi jamana Israɛl bɔnsɔnɲɛ na wa? Mun kosɔn ne ka mɔgɔw y'a fɔ ko u na kɛ u yɛrɛw kuntigi ye, ko u tɛna segin ne ma tun?
[32] Yala npogotigi bɛɲinɛ a ka masiri fɛnw kɔ wa? Kɔɲɔmuso bɛ se ka ɲinɛ a ka kɔɲɔ finiw kɔ wa? Kaari! Nka aw, ne ka mɔgɔw, aw ɲinɛna ne kɔ kabini tuma jan.
[33] «I bɛ minw kanu, i bɛ olu ɲini cogo dɔn kosɛbɛ. I bɛ se ko jugu kɛli la kosɛbɛ, k'a masɔrɔ o ka di i ye.
[34] Faantan ni mɔgɔ jalakibali fagalenw joli kɛra i ka dulɔki senkɔrɔlan la, k'a sɔrɔ i ma u ye ko jugu kɛ la.
[35] I b'a fɔ ko kura ko, ɔwɔ, i jalakibali don, ko ne ka dimiya na mabɔ i la. «Ayiwa ne bɛ na i ka kiri tigɛ, sabu i ko i ma jurumu si kɛ.
[36] Mun y'a to i tɛliyara ka i cogo yɛlɛma? I jigi na tigɛ Misira fɛ i ko i jigi tigɛra Asiri fɛ cogo min na.
[37] I na bɔ yen ka i bolow dalen to i kun na, katuguni i jigi dara minw kan, Matigi banna olu la. I tɛna dɛmɛni si sɔrɔ u fɛ tun.»