[1] Matigi y'a fɔ ne ye ko: «I ka taa lenfu cɛ sirilan san ka i cɛ siri ni o ye, nka i kana a don ji la.»
[2] O tuma la ne ye cɛ sirilan san ka kɛɲɛ ni Matigi ka kuma fɔlen ye, ka ne cɛ siri ni o ye.
[3] Matigi ka kuma sera ne ma a siɲɛ filanan la, ko:
[4] «I ye cɛ sirilan min san ka i cɛ siri n'a ye, i ka o ta ka taa Ufrate ba da la ka o dogo farawo kɔnɔ yen.»
[5] O tuma la ne taara a dogo Ufrate ba da la ka kɛɲɛ ni Matigi ka kuma fɔlen ye.
[6] Tile caman tɛmɛnnen kɔ, Matigi y'a fɔ ne ye ko: «Ne ye i ci ka taa cɛ sirilan min dogo Ufrate ba da la, i ka taa o ta.»
[7] Ne taara Ufrate ba da la. Ne tun ye cɛ sirilan dogo yɔrɔ min na, ne y'a ɲini yen k'a labɔ. Nka cɛ sirilan tolilen tun don. A tun manɲi tun.
[8] O kɔ, Matigi kumana ne fɛ tun.
[9] Matigi ko: «Ne na Juda ka kuncɛbaya ni Jerusalɛm ka kuncɛbaya tiɲɛn nin cogo la.
[10] O siya jugu min banna ne ka kuma la ka tugu u dusukun na miirili fufafu nɔ fɛ ka nɔrɔ bato fɛn wɛrɛw la ka baara kɛ olu ye ka u biri olu kɔrɔ, u na kɛ i ko nin cɛ sirilan tolilen.»
[11] Matigi ko: «Mɔgɔ bɛ a cɛ siri ni cɛ sirilan ye cogo min na, ne tun ye Israɛl bɔnsɔn ka so ni Juda bɔnsɔn ka so nɔrɔ ne la ten, walisa u ka kɛ ne ka mɔgɔw ni ne tɔgɔ la fɛn ni ne tanuli sababu ni ne nɔɔrɔ ye, nka u ma sɔn ka ne kan minɛ.»
[12] O de kosɔn Matigi, Israɛl ka Ala ko: «Jifiɲɛnw bɛɛ na fa diwɛn na. U na i jaabi ko: ‹An tun m'a dɔn ko jifiɲɛnw bɛɛ na fa diwɛn na wa?›
[13] I ka u jaabi ko, Matigi ko: ‹Ne na nin jamana mɔgɔw bɛɛ fa diwɛn na fo ka u ɲɛnamini, u ka masakɛ minw sigilen bɛ Dawuda ka masasigilan kan ani sarakalasebaaw ni kiraw ani Jerusalɛmkaw bɛɛ, ne na olu bɛɛ fa diwɛn na.
[14] Ne na faw ni u denw bɛɛ gosiɲɔgɔn na ka u ciɲɔgɔn fɛ.› Matigi ko: ‹Ne tɛna u si to yen, ne tɛna hinɛ u la, ne tɛna makari u la. Foyi tɛna ne bali ka u halaki.›»
[15] A' ye aw tulo majɔ ka lamɛnni kɛ. Aw kana kɛ kuncɛbaw ye, sabu Matigi kumana.
[16] Aw ka Matigi aw ka Ala bonya sani a ka dibi don, sani aw senw ka talon kulu dibimaw la. Aw na Matigi ka kɛnɛ makɔnɔ, nka o na yɛlɛma ka kɛ saya dibi ni dibifin ye.
[17] Ni aw ma lamɛnni kɛ, ne dusukun na kɔnɔna kasi kɛ aw ka kuncɛbaya kosɔn. Ɔwɔ, ne naɲɛji bɔ, neɲɛw na ji bɔ, k'a masɔrɔ Matigi ka bagankulu na minɛ ka taa jɔnya la.
[18] I k'a fɔ masakɛ ni a ba masamusoma ye ko: «A' ye aw yɛrɛw majigin ka aw sigi duguma, sabu masafugula min tun bɛ aw kun na, o bira duguma.
[19] Worodugu yanfan duguw da tugura, mɔgɔ si tɛ yen ka a da yɛlɛ. Juda bɔnsɔn bɛɛ cɛra ka taa jɔnya la.»
[20] «Jerusalɛm, i ka i ɲɛ kɔrɔta. I jugu minw natɔ don ka bɔ saheli yanfan fɛ, i ka olu filɛ. Mɔgɔ minw tun kalifara i ma, olu na kɛ di, o sagakulu min tun ye i nɔɔrɔ ye?
[21] I yɛrɛ ye minw jate i teriw ye ka u kalan fanga cogo la, ni a nana olu sigi i kun na tuma min na, i na mun fɔ? Dimi tɛna i minɛ i ko muso tintɔ wa?
[22] Ni i y'a fɔ i yɛrɛ kɔnɔ ko mun kosɔn nin sera i ma, ayiwa, i ka tilenbaliya de y'a to i ka taafe kɔrɔtara, i ka sabara foosira ka bɔ i sen na.
[23] Ecopika bɛ se ka a fari cogo yɛlɛma wa? Waraninkalan bɛ se ka a fin cogo yɛlɛma wa? Aw minw delila ka ko jugu kɛ, aw na se ka ko ɲuman kɛ cogo di?
[24] Ne na aw jɛnsɛn i ko binɲaga min cɛra fiɲɛ fɛ ka taa kungokolon kɔnɔ.
[25] «I niyɔrɔ filɛ o ye. Ne ye min latigɛ i ye, o don, sabu i ɲinɛna ne kɔ ka i jigi da bato fɛn fufafuw kan.» Matigi ko ten.
[26] «Ne yɛrɛ na i ka taafe kɔrɔta k'a biri i ɲɛda la, i lebu na ye.
[27] I ka jatɔya kow ni i pɛrɛnkan ni i ka ko nɔgɔlen dama tɛmɛnnenw ani i ka ko haramulenw bɛɛ, i ye olu minw kɛ tintinw kan ni kungo kɔnɔ, ne ye olu bɛɛ dɔn. Jerusalɛm, bɔnɛ bɛ i ye. I na to i ka nɔgɔlenya la fo tuma jumɛn?»