[1] Juda ka jurumu sɛbɛnna ni sɛbɛnnikɛ kala nɛgɛma ni diaman nun bɔlen ye. A ɲɛgɛnna u dusukun walaha kan ani u ka saraka bɔlanw biɲɛkolow fana kan.
[2] Fa bɛ hami a denw ko la cogo min, u bɛ hami Astarte boliw ni u ka saraka bɔlan jɔlenw ko la jirisunbaw ani kuluw san fɛ ten.
[3] Ne ka foro la kulu, ne na i bolo fɛnw ni i ka nafolow ni i ka batoli kɛ yɔrɔw bɛɛ don cɛlikɛlaw bolo i ka jurumu kɛlenw bɛɛ kosɔn jamana kɔnɔ.
[4] Ne ye ciyɛn min di i ma, i yɛrɛ ka ko n'a to, i na bɔnɛ o la, k'a to i ka baara kɛ i juguw ye u ka jamana la, i tɛ o min dɔn. Sabu i ye ne ka dimiya tasuma mana, o bɛ to ka jenili kɛ tuma bɛɛ.
[5] Ayiwa Matigi ko: «Mɔgɔ min bɛ a jigi da Hadamaden kan, ka farisogo kɛ a sinsin yɔrɔ ye, k'a dusukun jɛngɛ ka mabɔ Matigi la, o ye dangaden ye.
[6] O na kɛ i ko jiri min bɛ yɔrɔ jalen na. Ni hɛrɛ nana, a tɛna hɛrɛ sɔrɔ, nka a na sigi kungokolon jintan na, dugukolo kɔgɔma lankolon na.
[7] «Mɔgɔ min bɛ a yɛrɛ kalifa Matigi la, ka Matigi kɛ a sinsin yɔrɔ ye, o ye dubaden ye.
[8] O bɛ i ko jiri min turulen bɛ ji da la. A dili bɛ don kɔji da la. Ni funteni bɔra, a tɛna sɛgɛn, o jiri fura kɛnɛma na to. Ni sanji ma na san min na, a tɛna kɔnɔ gwan, a bɛ to ka den tuma bɛɛ.
[9] «Mɔgɔ dusukun bɛ filibanciya kɛ ka tɛmɛn fɛn bɛɛ kan, a tolilen bɛ kosɛbɛ. Jɔn bɛ se ka a cogo faamu?
[10] Ne, Matigi bɛ mɔgɔ dusukun kɔrɔbɔ, ka a kɔnɔna kow sɛgɛsɛgɛ. Ne bɛ mɔgɔw bɛɛ kelen-kelen sara ka kɛɲɛ ni u ka siraw ni u ka kɛwalew nɔw ye.»
[11] Mɔgɔ min bɛ a yɛrɛ fɛntigiya ni tilenbaliya nafolo ye, o bɛ i ko wɔlɔ min taara i biri dɔ wɛrɛ fanw kan. Nafolo bɛɛ na ban a si tile cɛmancɛ la, o tigi laban na kɛ hakilintan ye.
[12] An ka yɔrɔ senuma ye nɔɔrɔ masasigilan ye, a kɔrɔtalen bɛ tuma bɛɛ.
[13] Matigi, e min ye Israɛl bɔnsɔn jigi ye, minw banna i la, olu bɛɛ na maloya. Minw bɛ u mabɔ i la, olu kun na suuli dugukolo kan, k'a masɔrɔ u banna jiboyi ɲɛnama la, o ye Matigi de ye.
[14] Matigi, i ka ne kɛnɛya. Ni o kɛra, ne na kɛnɛya. I ka ne kisi, ne na kɛ kisilen ye, sabu i ye ne tanuli sababu ye.
[15] A filɛ, u b'a fɔ ne ye ko: «Matigi ka kuma kɛra di? O ka dafa sa.»
[16] Ne kɔni ma ban ka i kan minɛ ka kɛ u kɔlɔsibaa ye. Ne tun t'a fɛ u ka tɔɔrɔ, i yɛrɛ bɛ o dɔn. Ne kumana i yɛrɛɲɛ kɔrɔ.
[17] E min ye ne dogo yɔrɔ ye bɔnɛ don na, i kana kɛ ne lasiran fɛn ye.
[18] Minw bɛ ne tɔɔrɔ, olu ka maloya ka u kun suuli, ne yɛrɛ kana maloya. Olu ja ka tigɛ, ne ja kana tigɛ. I ka tɔɔrɔ lase u ma ka u ka tɔɔrɔ caya.
[19] Matigi y'a fɔ ne ye ko: «Juda ka masakɛw bɛ don ka bɔ jamanadenw ka da min fɛ, taa ka i jɔ o da la ani Jerusalɛm dondaw bɛɛ la.
[20] I k'a fɔ u ye ko Juda masakɛw ni Juda bɔnsɔn bɛɛ ani Jerusalɛmka minw bɛ don ka bɔ o daw fɛ, ko u ka Matigi ka kuma lamɛn.»
[21] Matigi ko: «A' ye aw yɛrɛw kɔlɔsi, aw kana na ni doniba ye ka don Jerusalɛm dondaw fɛ lafiɲɛ don na aw kisili kosɔn.
[22] Aw kana doni ta ka bɔ aw ka sow kɔnɔ lafiɲɛ don na. Aw kana baara si kɛ, nka aw ka lafiɲɛ don saniya i ko ne y'a fɔ aw bɛnbaw ye cogo min na.
[23] O bɛɛ n'a ta, olu ma u tulo majɔ ka lamɛnni kɛ. U ye u tulo gɛlɛya walisa u kana na ne ka kuma lamɛn walisa ne kana u kalan.»
[24] Matigi ko: «Nka ni aw ye ne lamɛn ko ɲuman, ni aw ma don ni doni si ye o dugu daw fɛ lafiɲɛ don na, ni aw ye lafiɲɛ don saniya, ni aw ma baara si kɛ o don na,
[25] o tuma la masakɛw ni kuntigi minw sigilen bɛ Dawuda ka masasigilan kan, olu na don nin dugu daw fɛ wotorow ni sow kan, u yɛrɛ ani Juda bɔnsɔn kuntigiw ani Jerusalɛmkaw. Nin dugu na to badaa.
[26] «Mɔgɔw bɛ na ka bɔ Juda ka duguw ani Jerusalɛm da fɛ yɔrɔw ni Benjamɛn bɔnsɔn ka jamana ani kulu jamana jɛkɛnɛw ni worodugu yanfan fɛ, ka saraka jenitaw ani saraka fagataw ni mugu sarakaw bɔ ka na ni nili fɛnw ni suma diyalanw ye ka nisɔndiya saraka bɔ Matigi batosoba kɔnɔ.
[27] Nka ni aw ma sɔn ka ne lamɛn, ni aw ma lafiɲɛ don saniya, ni aw taara ni doni ye ka don Jerusalɛm dondaw fɛ lafiɲɛ don na, ne na tasuma mana dugu dondaw la. O tasuma na Jerusalɛm masaya sow jeni, o tasuma tɛna dufa.»