[1] Ayiwa Matigi ka kuma sera Jeremi ma ko: «Matigi Israɛl ka Ala ko:
[2] ‹Ne ye kuma minw fɔ i ye, i ka olu bɛɛ sɛbɛn kitabu kɔnɔ.›
[3] Matigi ko: ‹Don bɛ na, ne na ne ka mɔgɔw Israɛl bɔnsɔn ni Juda bɔnsɔn lasegin ka bɔ jɔnya la.› Matigi ko: ‹Ne ye jamana min di u bɛnbaw ma, ne na u lasegin o jamana la ka o di u ma.›»
[4] Matigi ye kuma minw fɔ Juda bɔnsɔn ni Israɛl bɔnsɔn ko la, o filɛ nin ye.
[5] Matigi ko: «Ne ye kulokan mɛn siran kosɔn. Ja tigɛ ko bɛ fan bɛɛ la, hɛrɛ banna.
[6] Aw ka ɲininkali kɛ ka sɛgɛsɛgɛli kɛ yala tin bɛ cɛ minɛ wa? Mun kosɔn anɲɛ bɛ cɛw jɔlen na, ka u bolo don u solo la i ko muso tintɔ? Mun kosɔn u ɲɛdaw bɛɛ cogo yɛlɛmana?
[7] Ee, o don ye bɔnɛ don ye. O don bɔɲɔgɔnko si tɛ, Yakuba ka tɔɔrɔ waati don, nka a na kisi ka bɔ o la.»
[8] Kɛlɛbolow Matigi ko: «O don na, ne na u ka zuw kari ka bɔ u kan na ka u sirilanw foni. U tɛna baara kɛ jamana wɛrɛ mɔgɔw ye tun.
[9] Israɛl bɔnsɔn na baara kɛ Matigi u ka Ala ye ani u ka masakɛ Dawuda ye, k'a masɔrɔ ne na o sigi masasigilan kan u cɛma.»
[10] Matigi ko: «I kana siran, ne ka jɔnkɛ Yakuba. I ja kana tigɛ, Israɛl, k'a masɔrɔ ne na i lana ka bɔ fo dugukolo dan na, ka i bɔnsɔn labɔ jɔnya jamana la. Yakuba na kɔsegin, a na kɛ hɛrɛ la. A ja tɛna tigɛ a jugu siɲɛ tun,
[11] sabu ne na kɛ i fɛ ka i tila.» Matigi ko: «Ne tun ye i jɛnsɛn siya minw cɛma, ne na olu bɛɛ halaki ka u ban, nka ne tɛna i halaki. Ne na i kolo ko ɲuman, nka ne tɛna i sarabali to.»
[12] Ayiwa Matigi ko: «I joginda ka jugu, i ka joli dimi ka bon.
[13] Mɔgɔ si tɛ hami i ko la walisa ka i jogindaw siri. I ma fura sɔrɔ ka i kɛnɛya.
[14] Minw bɛ i kanu, olu bɛɛ ɲinɛna i kɔ. U si tɛ hami i ko la, k'a masɔrɔ ne ye i gosi i ko mɔgɔ b'a jugu gosi cogo min na, i ko mɔgɔ hinɛntan bɛ mɔgɔ gosi a ka tilenbaliya caman ni a ka jurumu caman kosɔn cogo min na.
[15] Mun y'a to i bɛ kasi i jogindaw kosɔn? Fura si tɛ i ka dimi la. Ne ye nin tɔɔrɔ kow lase i ma i ka tilenbaliya dama dɔnbali ni i ka jurumu caman kosɔn.
[16] «O bɛɛ n'a ta minw bɛɛ bɛ i halaki, ne na olu halaki. I tɔɔrɔbaaw bɛɛ na minɛ ka taa jɔnya la. Minw bɛ i bolo fɛnw minɛ i la, olu bolo fɛnw na minɛ u la. Minw bɛ i bolo fɛnw cɛ, ne na olu ta bɔsi u la.»
[17] Matigi ko: «Ne na i ka joliw siri, ka i jogindaw kɛnɛya, katuguni u ye i wele ko, ‹gɛnnen›, ko mɔgɔ si mago tɛ nin Sion na.»
[18] Matigi ko: «Ne na Yakuba ka mɔgɔ minɛlenw lasegin ka bɔ jɔnya la. Ne na hinɛ u sigi yɔrɔw la. Duguw na jɔ u ka tomonw la ko kura. Masaya sow na jɔ u sigi yɔrɔ kɔrɔw la.
[19] Dɔnkili dakan niɲagalikan na bɔ u cɛma. Ne na u jiidi, u tɛna dɔgɔya. Ne na bonya da u kan, u tɛna mafiɲɛya.
[20] U denw na caya i ko u tun bɛ cogo min na ka kɔrɔ. U siya na bonya ne ɲɛ kɔrɔ. Ne na u tɔɔrɔbaaw sara.
[21] U ka masakɛ na bɔ u yɛrɛw la, u ka kuntigi naɲɛnatɔmɔ u yɛrɛw cɛma. Ne na a madon ne yɛrɛ la, a na gɛrɛ ne la, sabu jɔn bɛ fariya ka gɛrɛ ne la a yɛrɛma?» Matigi ko ten.
[22] «Ni o kɛra, aw na kɛ ne ka mɔgɔw ye, ne na kɛ aw ka Ala ye.»
[23] Matigi ka dimiya na wuli i ko fiɲɛba, a na wuli ni barika ye ka surundu mɔgɔ juguw kan.
[24] Matigi ka dimiya tɛna mada sani a ka a kɔnɔna kow bɛɛ kɛ ka dafa. Aw na o faamu don nataw la.