[1] Babilonɛ masakɛ Nebukadnezar ni a ka kɛlɛbolow ani a sigilen tun bɛ dugukolo kan masaya ni siya minw bɛɛ kun na, ka olu bɛɛ dagalen to Jerusalɛm ni a lamini duguw da la, Matigi ka kuma sera Jeremi ma, o filɛ nin ye.
[2] Matigi Israɛl ka Ala ko: «I ka taa Juda bɔnsɔn ka masakɛ Sedesiasi sɛgɛrɛ k'a fɔ a ye ko Matigi ko: ‹Ne na nin dugu don Babilonɛ masakɛ bolo, o na a jeni ni tasuma ye.
[3] E yɛrɛ tɛna tila ka bɔ a bolo nka a na i minɛ. E ni Babilonɛ masakɛ naɲɔgɔn ye, a na kuma i fɛ da ni da. I na taa Babilonɛ.›
[4] O bɛɛ n'a ta i ka Matigi ka kuma lamɛn, Juda bɔnsɔn ka masakɛ Sedesiasi. Matigi y'a fɔ i ko la ko i tɛna faga ni npan ye.
[5] Matigi ko, i na sa hɛrɛ la. Mɔgɔw ye suma diyalanw wusu i bɛnbaw kosɔn i ɲɛ cogo min na, u na a wusu i yɛrɛ kosɔn o cogo la. U na i su kasi ko: ‹E, kuntigi.› Ne ye o kuma fɔ.» Matigi ko ten.
[6] Kira Jeremi taara o kuma bɛɛ fɔ Juda bɔnsɔn ka masakɛ Sedesiasi ye Jerusalɛm,
[7] ka Babilonɛ masakɛ ka kɛlɛbolow dagalen to Jerusalɛm ani Juda dugu tɔ tolenw Lakis ni Azeka da la, sabu olu tun ye Juda bɔnsɔn ka dugu barikama tɔ tolenw ye.
[8] Matigi ka kuma sera Jeremi ma nin ko sifa kɛlenw kɔ. Masakɛ Sedesiasi ni Jerusalɛmkaw bɛnna a la ko u ka welewele da ko jɔnw ka hɔrɔnya,
[9] ko u bɛɛ kelen-kelen ka u ka jɔnkɛw ni u ka jɔnmusow hɔrɔnya Israɛl bɔnsɔn cɛma walisa Yahutu si kana to jɔnya la u balimaw bolo tun.
[10] Kuntigiw bɛɛ ni mɔgɔ minw tun bɛ o jɛ la, olu bɛɛ taara u ka jɔnkɛw ni u ka jɔnmusow hɔrɔnya ka u labɔ jɔnya la. U bɛɛ sɔnna ka u bila ka taa.
[11] Nka o kɔ, u ye u ka miirili yɛlɛma, u tun ye cɛw ni muso minw bila ka bɔ jɔnya la, u ye olu minɛ ka u kɛ jɔnw ye ko kura.
[12] O kɔ, Matigi ka kuma sera Jeremi ma,
[13] ko: «Matigi Israɛl ka Ala ko: ‹Ne ye aw bɛnbaw labɔ Misira jɔnya so kɔnɔ don min na, ne ye layidu ta aw ye. Ne y'a fɔ
[14] u bɛɛ kelen-kelen ye, ko u balimaw Heburu minw feerela u ma, ko u ka olu hɔrɔnya san wolonwulanan la. Ko o tigi mana san wɔɔrɔ kɛ baara la, o kɔ, a ka bila ka taa a ka so. Nka aw bɛnbaw ma ne kan minɛ, u ma u tulo majɔ ne ka kumaw la.
[15] Aw fana, tile dama dɔw tɛmɛnnen kɔ, aw ye aw cogo yɛlɛma. Aw ye ko ɲuman kɛ ne ɲɛ kɔrɔ ka aw mɔgɔɲɔgɔn hɔrɔɲali ko welewele da. Aw ye layidu yɛrɛ ta ne ɲɛ kɔrɔ ne ka so kɔnɔ, ne tɔgɔ dara o min kan.
[16] Nka aw segira ka aw ka kuma yɛlɛma ka ne tɔgɔ tiɲɛn. Aw tun ye cɛw ni muso minw bila ka taa u ka so, aw ye olu minɛ ko kura ka u kɛ jɔnw ye.›»
[17] O de kosɔn Matigi ko: «Aw ma ne kan minɛ ka aw balimaw ni aw sigiɲɔgɔnw hɔrɔnya.» O de y'a to, ne, Matigi ko: «Ne na hɔrɔɲali welewele min da aw ye, o na kɛ npan ni fiɲɛbana ni kɔngɔba ye. Dugukolo kan masayaw bɛɛ na aw ye ka siran kosɛbɛ.
[18] Nin mɔgɔw ye ne ka layidu tiɲɛn. U ye layidu ta ka misiden cɛ ci fila ye ka tɛmɛn o fila furancɛ fɛ, nka u ma o layidu dafa.
[19] Tiɲɛ la Juda bɔnsɔn kuntigiw ni Jerusalɛm kuntigiw ni jalatigiw ni sarakalasebaaw ni jamana la mɔgɔ bɛɛ minw tɛmɛnna misiden cɛcilen cɛmancɛ fɛ,
[20] ne na olu don u juguw ni u ni ɲinibaaw bolo. U suw na kɛ sanfɛ kɔnɔw ni dugukolo kan waraw balo ye.
[21] Ne na Juda bɔnsɔn ka masakɛ Sedesiasi ni a ka kuntigiw don i juguw ni i ni ɲinibaaw bolo. Babilonɛ masakɛ ka kɛlɛbolo minw taara ka bɔ aw kɔrɔ, ne na u don olu bolo.»
[22] Matigi ko: «Ne na ne ka ci fɔ u ye ka u lana nin dugu kama. U na a kɛlɛ ka a minɛ ka a jeni ni tasuma ye. Ne na Juda bɔnsɔn ka duguw kɛ tomon ye. Mɔgɔ si tɛna sigi u kɔnɔ.»