[1] Yahutu minw sigilen tun bɛ Misira jamana kɔnɔ, Migdol ni Takpanez ani Nof duguw kɔnɔ ani Patros jamana kɔnɔ, Jeremi ye nin kuma fɔ olu ye, ko:
[2] «Kɛlɛbolow Matigi, Israɛl ka Ala ko: ‹Ne ye ko jugu minw lase Jerusalɛm ni Juda bɔnsɔn ka duguw ma, aw ye o bɛɛ ye. A filɛ, u bɛɛ kɛra tomonw ye bi, mɔgɔ si tɛ yen tun.
[3] O kɛra u kɔnɔ mɔgɔw ka juguya kosɔn. U ye o kɛ ka ne dusu dimin, u taara baara kɛ bato fɛn wɛrɛw ye ka olu bato, u ni u bɛnbaw tun tɛ olu minw dɔn.
[4] Ne tora ka ne ka baaraden kiraw ci aw ma k'a fɔ aw ye ko aw kana ko haramulenw kɛ, u man di ne ye fewu.
[5] Nka u ma ne kan minɛ. U ma u tulo majɔ ka ne lamɛn. U ma sɔn ka u ka juguya dabila. U tora ka wusulan suma duman wusu bato fɛn wɛrɛw ye.
[6] O de kosɔn ne ka dimiya ni ne ka fariya wulila u kama. Olu ye Juda duguw ni Jerusalɛm jeni ka u ban ka u lankolonya i ko u bɛ cogo min na bi.›
[7] «Ayiwa sisan, Matigi Ala, Kɛlɛbolow Matigi, Israɛl ka Ala ko: ‹Mun y'a to aw ye nin ko jugu kɛ ka bɔnɛ lase aw yɛrɛw ma walisa ka Juda bɔnsɔn, cɛw ni musow ni denmisɛnw ani sinminnaw bɛɛ halaki ka u ban?
[8] Mun kosɔn aw bɛ ne dusu dimin ni aw bolo baara nɔw ye ka wusulan suma duman wusu bato fɛn wɛrɛw ye Misira jamana kɔnɔ, aw sigilen bɛ o min na sisan? Mun kosɔn aw bɛ halakili lase aw yɛrɛw ma ka kɛ dangali ni mafiɲɛyali fɛn ye dugukolo kan siyaw bɛɛ cɛma?
[9] Yala aw ɲinɛna aw bɛnbaw ka juguya ni Juda bɔnsɔn ka masakɛw ka juguya ni u musow ka juguya ni aw yɛrɛw ka juguya ani aw musow ka juguya kɛlenw kɔ Juda bɔnsɔn ka jamana ni Jerusalɛm dugu bɔlɔnw na wa?
[10] Fo ka se bi ma, aw ma aw yɛrɛw majigin, aw ma siran neɲɛ. Ne ye ne ka sariya ni ne ka ci fɔlen minw di aw yɛrɛw ni an bɛnbaw ma, aw ma olu sira taama.›
[11] «O de kosɔn Kɛlɛbolow Matigi, Israɛl ka Ala ko: ‹Ne na wuli aw kama ka bɔnɛ lase aw ma ka Juda bɔnsɔn halaki ka ban.
[12] Juda bɔnsɔn tɔ minw b'a fɛ ka taa Misira, ne na olu halaki. U bɛɛ na halaki ka u bi Misira jamana kɔnɔ yen. U na faga ni npan da duman ni kɔngɔba ye. U la mɔgɔ misɛnw ni mɔgɔbaw na faga npan ni kɔngɔba fɛ. U na kɛ kalili fɛn ni kabako fɛn ni dangali fɛn ni mafiɲɛyali fɛn ye.
[13] Ne ye Jerusalɛm gosi ni npan ni kɔngɔba ni fiɲɛbana ye cogo min na, minw taara u sigi Misira, ne na olu fana gosi o cogo la.
[14] U si tɛna kisi o ma. Juda bɔnsɔn la mɔgɔɲɛnama minw taara Misira jamana kɔnɔ ka u sigi yen, ko u bɛ kɔsegin ka taa Juda jamana la, olu siɲɛnama tɛna kɔsegin tun. U la mɔgɔ dɔɔnin dɔrɔnɲɛnama na kɔsegin.›»
[15] O tuma la cɛ minw y'a dɔn ko u musow bɛ wusulan suma duman wusu bato fɛn wɛrɛw ye ani muso jamaba minw jɔlen tun bɛ yen ani mɔgɔ minw bɛɛ tun bɛ sigi Misira jamana la Patros, olu bɛɛ ye Jeremi jaabi ko:
[16] «I ye fɛn o fɛn fɔ an ye Matigi tɔgɔ la, an tɛna i kan minɛ ka o si kɛ.
[17] An na wusulan suma duman wusu sankolola masamusoma ye. An na saraka bɔntaw lase a ma i ko an ni an bɛnbaw ni an ka masakɛw ni an ka kuntigiw delila k'a kɛ Juda duguw kɔnɔ ani Jerusalɛm dugu bɔlɔnw na cogo min na. O waati la an tun bɛ dumuni kɛ ka an fa, an tun bɛ hɛrɛ la, tɔɔrɔ si ma an sɔrɔ.
[18] Nka kabini an ye wusulan suma duman wusuli dabila sankolola masamusoma ye ka saraka bɔnta bɔnni dabila a ye, an ka fɛn bɛɛ dɛsɛra, npan ni kɔngɔba ye an faga.»
[19] Musow y'a fɔ ko: «An ye wusulan suma duman wusu sankolola masamusoma ye ka saraka bɔntaw bɔn a ye sabu an cɛw sɔnna o ma. U y'a dɔn ko an ye takulaw dila k'a bato ni olu ye ka saraka bɔntaw bɔn a ye.»
[20] Ayiwa cɛw ni musow ani minw bɛɛ ye Jeremi jaabi ten, a y'a fɔ olu bɛɛ ye ko:
[21] «Aw ni aw bɛnbaw ni aw ka masakɛw ni aw ka faamaw ani jamana mɔgɔw bɛɛ ye wusulan suma duman min wusu Juda bɔnsɔn ka duguw kɔnɔ ani Jerusalɛm dugu bɔlɔnw na, aw bɛ miiri ko Matigi hakili tɛ o la wa? Aw bɛ miiri ko a ɲinɛna o kɔ wa?
[22] Kaari. Matigi ma se ka aw ka kɛwale juguw ni aw ka ko haramulenw muɲu. O de kosɔn aw ka jamana lankoloɲara ka kɛ kungokolonba ye, mɔgɔ si tɛ sigi a kɔnɔ, mɔgɔ b'a kɛ dangali kɛ fɛn ye i ko aw ɲɛ b'a la cogo min na bi.
[23] Nin bɔnɛ min bira aw kan bi, o kɛra k'a masɔrɔ aw ye wusulan suma duman wusu bato fɛn wɛrɛw ye ka Matigi dusu dimin, aw ma sɔn ka Matigi kan minɛ. Aw ma sɔn ka a ka sariya ni a ka ci fɔlenw ni a ka laadili sira taama.»
[24] Jeremi y'a fɔ jama ni musow bɛɛ ye ko: «Aw Juda bɔnsɔn minw sigilen bɛ Misira jamana kɔnɔ, aw ka Matigi ka kuma lamɛn.
[25] Kɛlɛbolow Matigi, Israɛl ka Ala ko: ‹Aw ni aw musow ye min fɔ, aw daw y'a fɔ, aw y'a kɛ ni aw bolow ye, ko aw ye dafale minw kɛ, ko aw na wusulan suma duman wusu sankolola masamusoma ye ka saraka bɔntaw bɔn a ye, ko aw na o dafalew bɔ dɛ. Ayiwa, aw ka to o dafalew kan ka o dafalew bɔ.
[26] O de kosɔn, aw Juda bɔnsɔn minw sigilen bɛ Misira jamana kɔnɔ, aw bɛɛ ka Matigi ka kuma lamɛn.› Matigi ko: ‹A filɛ, ne ye ne kali ne yɛrɛ tɔgɔba la ko Juda bɔnsɔn si da tɛna ne tɔgɔ wele Misira jamana yɔrɔ si la. U si tɛna a fɔ ko: «Matigi, Ala ɲɛnama don.»
[27] Ne na wuli u kama ka ko jugu kɛ u la. Ne tɛna ko ɲuman kɛ u ye. Juda bɔnsɔn minw sigilen bɛ Misira jamana kɔnɔ, olu na faga npan ni kɔngɔba fɛ fo ka u bɛɛ halaki ka u ban.
[28] U la dɔɔnin dɔrɔn na kisi npan da duman ma ka bɔ Misira ka kɔsegin ka taa Juda jamana kɔnɔ. Ayiwa, Juda bɔnsɔn mɔgɔɲɛnama tɔ tolen minw bɛɛ nana Misira jamana kɔnɔ ka u sigi yen, ne ka kuma ni olu ka kuma, min ye tiɲɛ ye, o na dɔn.›
[29] «Matigi ko: ‹Ne bɛ taamashyɛn di aw ma k'a jira ko ne na bɔnɛ lase aw ma yan, walisa aw k'a dɔn ko ne ye kuma minw fɔ aw kama, ko wajibi don, olu ka kɛ ka dafa.›
[30] Matigi ko: ‹Ne na Misira masakɛ Faraon Hofira don a juguw ni a ɲinibaaw bolo, i ko ne ye Juda bɔnsɔn ka masakɛ Sedesiasi don a jugu Babilonɛ masakɛ Nebukadnezar bolo cogo min na, o min tun b'a fɛ ka a faga.›»