[1] Ayiwa kɛlɛkɛ cɛw kuntigiw bɛɛ ani Kareak denkɛ Jokanan ni Hosaja denkɛ Jezaniya ani mɔgɔw bɛɛ, mɔgɔ misɛn fara mɔgɔba kan, olu bɛɛ gɛrɛla kira Jeremi la k'a fɔ a ye ko:
[2] «I ka sɔn an ka delili ma ka Matigi i ka Ala deli an mɔgɔ tɔ tolenw ye. An tun ka ca, nka an tɔ man ca tun i ko i ɲɛ b'a la cogo min na.
[3] I ka Matigi i ka Ala deli an ye walisa an ka kan ka taa yɔrɔ min na, ani an ka kan ka ko min kɛ, a ka o jira an na.»
[4] O tuma la kira Jeremi ye u jaabi ko: «Ne ye aw ka kuma mɛn. Ne na Matigi aw ka Ala deli i ko aw y'a fɔ cogo min na. Matigi mana fɛn o fɛn fɔ, ne na o fɔ aw ye, ne tɛna foyi dogo aw la.»
[5] U y'a fɔ Jeremi ye ko: «Ni Matigi i ka Ala ye i ci an ma ni kuma o kuma ye, ni an ma o kɛ, Matigi yɛrɛ ka kɛ seere sɛbɛ tilennen ye an kama.
[6] I mana fɛn o fɛn fɔ an ye, juguman fara ɲuman kan, an na Matigi an ka Ala kan minɛ ka o bɛɛ kɛ walisa an ka hɛrɛ sɔrɔ Matigi an ka Ala kan minɛli kosɔn.»
[7] Tile tan tɛmɛnnen kɔ, Matigi ka kuma sera Jeremi ma.
[8] A ye Jokanan ni kɛlɛkɛ cɛw kuntigiw ni mɔgɔw bɛɛ wele, mɔgɔ misɛn fara mɔgɔba kan,
[9] k'a fɔ u ye ko: «Aw ye ne deli ko ne ka aw ka delili lase Matigi, aw ka Ala min ma, o ko:
[10] ‹Ni aw sigira nin jamana kɔnɔ, ne na aw sabati, aw tɛna halaki. Ne na aw turu, aw tɛna bɔ ka bɔ yen, k'a masɔrɔ ne ye ko jugu min kɛ aw la, ne nimisara o la.›
[11] Matigi ko: ‹Aw bɛ siran Babilonɛ masakɛ min ɲɛ, aw kana siran o ɲɛ, aw ja kana tigɛ, k'a masɔrɔ ne bɛ aw fɛ ka aw kisi ka aw tila ka bɔ a bolo.
[12] Ne n'a to a ka makari aw la. A na hinɛ aw la ka aw kɔsegin aw sigi yɔrɔ la.›
[13] «Nka ni aw ko aw tɛ to nin jamana kɔnɔ, ni aw ma Matigi, aw ka Ala kan minɛ,
[14] ni aw ko aw bɛ taa Misira, ko aw tɛna kɛlɛ ye ko aw tɛna kɛlɛ burukan mɛn yen, ko dumuni tɛna dɛsɛ aw la yen, ko aw na taa sigi yen,
[15] o tuma la aw Juda bɔnsɔn la mɔgɔɲɛnama tɔ tolenw ka Kɛlɛbolow Matigi, Israɛl ka Ala ka kuma lamɛn. A ko: ‹Ni aw ye aw tulo gɛlɛya ka boli ka taa Misira ka aw sigi yen,
[16] aw bɛ siran npan min ɲɛ, o na bi aw kan yen Misira. Aw bɛ jɔrɔ kɔngɔba min ɲɛ, o na aw sɔrɔ yen ka aw faga.
[17] Mɔgɔ minw bɛ u tulo gɛlɛya ka taa u dogo Misira, olu na faga npan ni kɔngɔba ani fiɲɛbana fɛ. Hali u siɲɛnama tɛna to. Ne na bɔnɛ min lase olu ma, u si tɛna kisi o ma.›
[18] «K'a masɔrɔ Kɛlɛbolow Matigi, Israɛl ka Ala ko: ‹Ne ka dimiya ni ne ka fariya wulila Jerusalɛm kama cogo min na, ni aw bɛ taa Misira, ne ka dimiya na wuli aw kama o cogo la. Aw na kɛ kalili fɛn ni kabako fɛn ni dangali fɛn ani mafiɲɛyali fɛn ye. Aw tɛna aw ka jamana ye tun.›»
[19] Matigi y'a fɔ Juda bɔnsɔn mɔgɔ tɔ tolenw ye ko aw kana taa Misira jamana la. Aw k'a dɔn k'a jɛya ko ne ye aw lasɔmi bi.
[20] K'a masɔrɔ aw bɛ aw yɛrɛw lafili ka aw ni halaki. Aw ye ne deli ko ne ka Matigi aw ka Ala deli ko, Matigi aw ka Ala mana fɛn o fɛn fɔ aw ye, aw na o kɛ.
[21] Ne y'a fɔ aw ye bi, nka Matigi, aw ka Ala ye ne ci aw ma ka ko minw fɔ aw ye, aw ma a kan minɛ olu si la.
[22] Ayiwa sisan, aw b'a fɛ ka taa yɔrɔ min na ka aw sigi yen, aw k'a dɔn ko aw na faga npan ni kɔngɔba ani fiɲɛbana fɛ yen.