[1] Aw ka Jerusalɛm dugu bɔlɔnw boliboli k'a sɛgɛsɛgɛ ka ɲininkali kɛ a fɛrɛkɛnɛw la k'a dɔn, yala ni cɛ kelen bɛ yen, cɛ kelenpe min tilennen don, min bɛ tiɲɛ nɔ fɛ. Ni o mɔgɔ sɔrɔla, ne na yafa Jerusalɛm ma.
[2] Hali ni u ko: «Ne ye ne kali Matigi ɲɛnama la,» u ye u yɛrɛw kali nkalon kan.
[3] Matigi, i ɲɛ tɛ tiɲɛ la wa? I ye mɔgɔ juguw gosi, nka o ma digi u la. I ye u jeni, nka u ma sɔn ka kolo. U bɛ u kunkolo gɛlɛya ka tɛmɛn fara kan, u tɛ sɔn ka nimisa.
[4] O kosɔn ne ko: «Ninw ye faantan ko dɔnbaliw ye, u tɛ Matigi sago dɔn, u tɛ u ka Ala ka sariya dɔn, u bɛ taa ɲɛ hakilintanya la.
[5] O de kosɔn ne ko ne bɛ taa mɔgɔ tɔgɔbaw sɛgɛrɛ ka kuma olu fɛ, sabu olu de ye Matigi sago dɔn, u ye u ka Ala ka sariya dɔn. Nka u bɛɛ ka kan, olu fana ye zu kari ka jɔlɔkɔw tigɛ.
[6] O de kosɔn kungo kɔnɔ waraw na u farafara, suruku na bɔ kungo la ka u halaki. Waraninkalan bɛ a merun u ka duguw da la. Ni mɔgɔ o mɔgɔ bɔra dugu kɔnɔ, o na farafara, k'a masɔrɔ u ka kanbilali dama tɛmɛnna, u ka tilenbaliya kow cayara.»
[7] Matigi ko: «Ne bɛ se ka yafa i ma cogo di? I denw ye ne janfa. Bato fɛn wɛrɛ minw tɛ Ala ye, u bɛ u kali olu la. Ne ye ko ɲuman kɛ u ye, nka u ye jatɔya kɛ. U jamaba bɛ taa kakalamusow ka sow kɔnɔ.
[8] U bɛ boli yan fɛ ni yen fɛ i ko sokɛ falen yaalayaalatɔ. U bɛɛ kelen-kelen bɛ boli u sigiɲɔgɔn muso nɔ fɛ.»
[9] Matigi ko: «Yala ne man kan ka u tɔɔrɔ o kow kosɔn wa? Ne man kan ka ne mɔnɛbɔ nin siya sifa la wa?
[10] Aw ka yɛlɛn lamini kogow kan ka halakili kɛ, nka aw kana u faga ka u ban. Aw ka o rezɛn sun bolow tigɛ ka bɔ yen, sabu u tɛ ne ta ye.
[11] K'a masɔrɔ Israɛl bɔnsɔn ka so, ani Juda bɔnsɔn ka so ye ne janfa.» Matigi ko ten.
[12] Juda bɔnsɔn ye nkalon tigɛ Matigi ko la, ko: «Se tɛ Ala ye.» U ko: «Ko jugu si tɛna an sɔrɔ, npan ni kɔngɔba tɛna se an ma.»
[13] U ko: «Kiraw tɛ foyi ye fiɲɛ dama kɔ. U ka kiraya kuma ye fuu ye. U ka kuma juguw ka bi u yɛrɛw kan.»
[14] O de kosɔn Kɛlɛbolow Matigi Ala ko: «U ye o kuma fɔ, o de kosɔn ne na ne ka kuma fɔlen kɛ i da la i ko tasuma mana. Ne na nin mɔgɔw kɛ i ko dɔgɔ, o tasuma na u jeni.»
[15] Matigi ko: «Israɛl ka so, ne na siya dɔ ci i kama ka bɔ yɔrɔ jan na. Siya barikama don. Siya kɔrɔ don. I tɛna a ka kan mɛn, i tɛna a ka kuma faamu.
[16] U ka biɲɛ mara ton bɛ i ko kaburu dayɛlɛlen. U ka kɛlɛkɛ cɛw bɛɛ ye cɛ farinw ye.
[17] U na i ka sɛnɛ sumanw dumu ka i denkɛw ni i denmusow fana dumu. U na i ka sagaw ni i ka misiw dumu, ka i ka rezɛn sunw ni i ka toro sunw mɔw dumu. I jigi dalen bɛ i ka dugu barikama minw kan, u na npan kɛ ka olu ci.»
[18] Matigi ko: «Nka halio, ne tɛna aw bɛɛ halaki ka aw ban o don na.
[19] Ni u y'a fɔ tuma min na ko mun y'a to Matigi u ka Ala ye nin kɛ u la, i ka u jaabi ko, u fana ye ne bila ka baara kɛ jamana wɛrɛ bato fɛnw ye u ka jamana kɔnɔ. O cogo la u na baara kɛ dunanw ye, nka o tɛna kɛ u yɛrɛw ka jamana kɔnɔ.»
[20] Ayiwa Yakuba ka so, aw ka nin kuma lamɛn k'a welewele da Juda ka so ye ko:
[21] «Siya hakilintan, min tɛ ko dɔn, aw ka nin kuma lamɛn kosɛbɛ. Ɲɛ bɛ aw fɛ, nka aw tɛ yeli kɛ. Tulo bɛ aw fɛ, nka aw tɛ mɛnni kɛ.»
[22] Matigi ko: «Aw tɛ siran neɲɛ wa? Aw tɛ yɛrɛyɛrɛ neɲɛ wa? Ne ye cɛncɛn kɛ ka dan sigi kɔgɔjiɲɛ k'a kɛ dancɛ banbali ye walisa a kana tɛmɛn o kan. Hali ni jikuruw bɛ lamaga kosɛbɛ, nka se tɛ u ye. Hali ni u bɛ mankan bɔ, nka u tɛ se ka tɛmɛn dan kan.
[23] Ka nin mɔgɔw dusukun gɛlɛyalen to ka kanbilali kɛ, aw bɛ muruti ka ta'a fɛ.
[24] Aw t'a fɔ aw yɛrɛw kɔnɔ ko: ‹An ka siran Matigi an ka Ala ɲɛ, o min bɛ sanji fɔlɔ di a waati la, ka sanji kosa di ji tigɛ tuma la, k'a to an ka dɔgɔkun caman kɛ suman tigɛ la.›
[25] Aw ka tilenbaliya kow ye o fɛnɲumanw mabɔ aw la, aw ka jurumuw y'a to, aw ma o ɲumanw sɔrɔ.
[26] K'a masɔrɔ mɔgɔ juguw sɔrɔla ne ka mɔgɔw cɛma. U bɛ kɔlɔsili kɛ i ko mɔgɔ minw bɛ juru da kɔnɔw ɲɛ. U bɛ juruw da mɔgɔw ɲɛ ka olu minɛ.
[27] U ka sow falen bɛ nanbara fɛnw la, i ko sansara falen bɛ shɛw la cogo min na. O de y'a to u bonyara ka fɛntigiya.
[28] U bɛ tɔlɔ, u ɲɛda bɛ nugu. U ka juguya bɛ tɛmɛn a dan kan. U tɛ kiri tigɛ ka kɛɲɛ ni a cogo ye. U tɛ jo di falatɔw ma, nka u yɛrɛw bɛ jiidi. U tɛ tiɲɛ di kɔlibaatɔw ma kiri la.»
[29] Matigi ko: «Ne man kan ka u sara o ko jugu kosɔn wa? Ne man kan ka ne mɔnɛbɔ o siya sifa la wa?
[30] Ko juguba haramulenw bɛ kɛ nin jamana kɔnɔ.
[31] Kiraw bɛ kiraya kɛ ka nkalon tigɛ. Sarakalasebaaw bɛ kuntigiya kɛ ka kɛɲɛ ni olu ka kumaw ye. O kow bɛɛ ka di ne ka mɔgɔw ye. Aw dun na mun kɛ a laban na?»