[1] Josiasi denkɛ Jojakim, Juda bɔnsɔn ka masakɛ tile la, Matigi ka kuma sera Jeremi ma ko:
[2] «I ka taa Rekab bɔnsɔn sɛgɛrɛ ka kuma u fɛ ka na ni u ye Matigi batosoba kɔnɔ ka u bila bon dɔ kɔnɔ ka diwɛn minta di u ma yen.»
[3] Ayiwa ne taara ka na ni Habaziniya denkɛ Jeremi denkɛ Jaazaniya ni o balimaw ani u denkɛw ni Rekab ka gwa bɛɛ ye.
[4] Ne taara ni u ye Matigi batosoba la Ala ka cɛ Hanan denkɛ ka bon kɔnɔ. Hanan fa tun ye Jigdaliya ye. O bon tun bɛ kuntigiw ka bonw kɛrɛ fɛ, dakɔlɔsibaa Salum denkɛ Maseja ka bon san fɛ.
[5] Ne ye daga diwɛnma falen ni jifilenw sigi Rekab bɔnsɔn kɔrɔ k'a fɔ u ye ko: «A' ye nin diwɛn min.»
[6] Nka u ye ne jaabi ko: «Ayi, an tɛ diwɛn min, sabu an fa Rekab denkɛ Jonadab y'a fɔ an ye ko an ni an denw kana diwɛn min fewu.
[7] Ko an kana sow jɔ, an kana sɛnɛ kɛ, an kana rezɛn sunw turu, ko an kana kɛ yɔrɔ tigiw ye nka an ka sigi finisow kɔnɔ an si tile bɛɛ la, walisa an ka si tile jan sɔrɔ an sigi jamanaw kɔnɔ.
[8] «An ye an bɛnba Rekab denkɛ Jonadab kan minɛ a ka ci fɔlenw bɛɛ la, an ni an musow ani an denkɛw ni an denmusow ma diwɛn min an si tile bɛɛ la.
[9] An ma sow jɔ ka sigi u kɔnɔ. An ma rezɛn nakɔw bi, forow tɛ an fɛ, an ma sɛnɛ kɛ.
[10] Nka an sigira finisow kɔnɔ. An ye an bɛnba Jonadab kan minɛ o la. A ye fɛn o fɛn fɔ an ye, an ye o bɛɛ kɛ.
[11] Nka Babilonɛ masakɛ Nebukadnezar nana nin jamana kɛlɛ tuma min na, an y'a fɔ ko an ka taa Jerusalɛm, katuguni an siranna Kaldekaw ni Sirikaw ka kɛlɛbolow ɲɛ. An sigira Jerusalɛm cogo min na, o filɛ o ye.»
[12] O tuma la Matigi ka kuma sera Jeremi ma, ko:
[13] «Kɛlɛbolow Matigi, Israɛl ka Ala ko: ‹I ka taa a fɔ Juda bɔnsɔn ni Jerusalɛmkaw ye ko: «Aw man kan ka sɔn Matigi ka laadili ma ka ne ka ci fɔlenw kɛ wa?
[14] Rekab denkɛ Jonadab ye ci minw fɔ a denkɛw ye, ko u kana diwɛn min fewu, u ma o min, fo ka na se bi ma, k'a masɔrɔ u ye u fa kan minɛ. Nka ne tora ka kuma aw fɛ, aw ma ne kan minɛ.
[15] Ne ye ne ka baaraden kiraw bɛɛ ci aw ma. Ne ma olu cili dabila aw ma k'a fɔ aw ye ko aw bɛɛ kelen-kelen ka kɔsegin ka aw ka sira juguw bila ka aw taama cogo yɛlɛma ko aw kana baara kɛ bato fɛn wɛrɛw ye. Ni aw ye ne kan minɛ, ne ye jamana min di aw ni aw bɛnbaw ma, aw sigilen na to o kɔnɔ. Nka aw ma aw tulo majɔ, aw ma ne kan lamɛn.
[16] Ɔwɔ, Rekab denkɛ Jonadab denkɛw ye u fa ka ci fɔlenw sira taama, nka nin mɔgɔw ma ne kan minɛ fewu.» ›
[17] «O de kosɔn Kɛlɛbolow Matigi, Israɛl ka Ala ko: ‹Ne ye bɔnɛ minw ko fɔ aw ye, ne na olu lase Juda bɔnsɔn ni Jerusalɛmkaw ma, k'a masɔrɔ ne kumana u fɛ, u ma ne kan lamɛn. Ne ye u wele, u ma ne jaabi.›»
[18] O kɔ, Jeremi y'a fɔ Rekab ka so mɔgɔw ye ko: «Kɛlɛbolow Matigi, Israɛl ka Ala ko: ‹Aw ye aw bɛnba Jonadab ka ci fɔlenw sira taama, a ye minw fɔ aw ye, aw ye o bɛɛ kɛ.›
[19] O de kosɔn Kɛlɛbolow Matigi, Israɛl ka Ala y'a fɔ Rekab denkɛ Jonadab ko la ko a bɔnsɔn na to ne ɲɛ kɔrɔ badaa.»