[1] Matigi ko: «Israɛl, ni i kɔseginna, ni i kɔseginna ne ma, ni i ye i ka boli haramulenw bila ka bɔ ne ɲɛ kɔrɔ, i tɛna fili ka sira bila tun.
[2] Ni i ye i kali Matigi ɲɛnama tɔgɔ la ni kantigiya ni tiɲɛ ni tilennenya ye, o tuma la siyaw na dubaw kɛ u yɛrɛw ye ale tɔgɔ la, u na bonya sɔrɔ ale fɛ.»
[3] K'a masɔrɔ Matigi bɛ kuma Juda bɔnsɔn ni Jerusalɛmkaw fɛ, ko: «Aw ka foro kura da bɔ, aw kana danni kɛ nwɔniw cɛma.
[4] Aw Juda bɔnsɔn ni Jerusalɛmkaw, a' ye aw yɛrɛw saniya Matigi ye ka aw dusukunw boloko, ni o tɛ, ne ka dimiya na wuli aw kama i ko tasumaba, ka fɛnw bɛɛ jeni aw ka ko juguw kosɔn, mɔgɔ si tɛna se ka o tasuma dufa.»
[5] Aw ka nin welewele da Juda bɔnsɔn cɛma, ka nin kuma da Jerusalɛmkaw bɛɛ tulo kan, ko u ka buru fyɛ jamana kɔnɔ. Aw ka pɛrɛn ni kanba ye k'a fɔ ko: «A' ye ɲɔgɔn lajɛ, an ka taa dugu barikamaw kɔnɔ.
[6] Aw ka taamashyɛn dila ka Sion fan jira mɔgɔw la. Aw ka boli ka aw yɛrɛ ɲini, aw kana aw jɔ, k'a masɔrɔ ne na bɔnɛba halakilikɛla lana ka bɔ saheli fan fɛ.
[7] Waraba bɔra a dogo yɔrɔ la. Siyaw halakibaa bɛ sira la ka na. A bɔra a ka yɔrɔ la walisa ka i ka jamana halaki k'a lankolonya. I ka duguw na ci ka u lankolonya.
[8] O de kosɔn, a' ye cafu fini don aw la, ka aw cɛ siri ka kasi, sabu Matigi ka dimiyaba tugulen bɛ aw kɔ.»
[9] Matigi ko: «O don na, masakɛ ni kuntigiw ja na tigɛ. Sarakalasebaaw na kabakoya, kiraw na kɔnɔna fili.»
[10] O tuma la ne y'a fɔ, ko: «E, Matigi Ala. Tiɲɛ la i ye nin mɔgɔw lafili k'a fɔ Jerusalɛmkaw ye ko u na hɛrɛ sɔrɔ, o bɛɛ n'a ta npan sera u ni ma.»
[11] O tuma la nin kuma na fɔ o mɔgɔw ni Jerusalɛmkaw ye, ko: «Fiɲɛ funtenima bɛ na ka bɔ kungokolon kɔnɔ tintinw kan. A bɛ ci ne ka mɔgɔw taama sira kan, nka o tɛ fiɲɛ fitinin ye min bɛ kɛ ka alikama fyɛ wala k'a saniya.
[12] Ne bɛna fiɲɛ min ci, o na bonya u kan. A filɛ, ne bɛna kiri tigɛ ne ka mɔgɔw kan.
[13] «A filɛ, tiɲɛnnikɛla bɛ na i ko sankaba. A ka wotorow bɛ i ko fununfunun. A ka yɛlɛnkan sow ka tɛli i ko bɔn panta. Bɔnɛ bɛ an ye, k'a masɔrɔ an halakira.
[14] Jerusalɛm, i ka i dusukun saniya ko juguw bɛɛ ma, walisa i ka kisi. I na miirili juguw mara i kɔnɔ fo tuma jumɛn?
[15] K'a masɔrɔ ciden dɔ bɛ na ni kibaru jugu ye ka bɔ Dan ani Efrayim kulu jamana la ka tɔɔrɔ ko fɔ.
[16] Bɔnɛ min na siyaw sɔrɔ, u bɛ o kibaru fɔ. I k'a fɔ u ye ko juguw natɔ don Jerusalɛm kama ka bɔ jamana jan na ka bi Juda duguw kan.
[17] U na Jerusalɛm lamini i ko foro kɔlɔsibaaw, k'a masɔrɔ a murutira ne ma.» Matigi ko ten.
[18] «I ka sira ni i ka kɛwalew de y'a to o kow bira i kan. I ka juguya dafa filɛ o ye. Ɔwɔ, ko kunama na i sɔrɔ, o na i dusukun jogin.»
[19] Ne dusu, ne dusu. Ne dusu tɔɔrɔlen bɛ kosɛbɛ haali. Ne sɔnkun bɛ tobi ne kɔnɔ, ne tɛ se ka ne makun, k'a masɔrɔ ne bɛ buru fyɛkan ni kɛlɛ mankan mɛn.
[20] Tiɲɛnni ko bɛ da tiɲɛnni ko kan, jamana bɛɛ tiɲɛnna. U ye ne ka finisow tiɲɛn, ka olu finiw farafara yɔrɔ nin kelen.
[21] Ne na to ka ne juguw ka darapo ye, ka u ka buru fyɛkan mɛn fo tuma jumɛn?
[22] Tiɲɛ la, ne ka mɔgɔw tɛ foyi dɔn. U ma ne dɔn fewu. Denmisɛn hakilintanw don, u tɛ ko dɔn. U ka baara ye kojugukɛli dama de ye, u tɛ ko ɲuman kɛ cogo dɔn.
[23] Ne ye dugukolo filɛ, a labɛnbali lankolon don. Ne ye sankolow filɛ, ne ma yeelen si ye u la.
[24] Ne ye kuluw filɛ, a filɛ u bɛ yɛrɛyɛrɛ, tintinw bɛɛ bɛ lamaga.
[25] Ne ye filɛli kɛ, ne ma hali mɔgɔ kelen ye, sanfɛ kɔnɔw bɛɛ taara fana.
[26] Ne ye filɛli kɛ, ne y'a sɔrɔ Karmɛl kulu kɛra kungokolon ye, a duguw bɛɛ cira Matigi ni a ka dimiyabaɲɛ.
[27] Ayiwa, Matigi ko jamana bɛɛ na lankolonya, nka ne tɛna a bɛɛ halaki.
[28] O de kosɔn dugukolo naɲɛnasisi, sankolo yɔrɔw bɛɛ na kɛ dibi ye, k'a masɔrɔ ne y'a fɔ u ye k'a latigɛ, ne tɛ ne ka miirili yɛlɛma, ne tɛ ne dalacɛ a la.
[29] Dugu kɔnɔ mɔgɔw bɛɛ bolila ka taa u dogo jiriw kɔrɔ ka yɛlɛn faraw kan, sotigiw ni bonnikɛ kalatigiw mankan kosɔn. Duguw bɛɛ lankolon tora, mɔgɔ si tɛ u kɔnɔ tun.
[30] E Jerusalɛm cilen, i bɛ mun kɛ? I bɛ i ka lomaasa fini don i la, ka i ka sanu masiri fɛnw don i la, ka kale da i ɲɛ kɔrɔ, ka i yɛrɛ labɛn ka i yɛrɛ cɛɲɛ fuu. I kanubaaw bɛ i mafiɲɛya, fo u b'a fɛ ka i faga.
[31] Ne ye kulokan mɛn i ko muso tintɔ kulokan, ka nwunankan mɛn i ko muso min bɛna a den fɔlɔ bange. O ye Sion kan ye, a bɛ nwunan ka a bolo mɔɔnɔbɔ, ko: «Ne ta tiɲɛnna. Mɔgɔ fagalaw na ne faga.»