[1] Matigi ko: «O don na Juda bɔnsɔn ka masakɛw ni u ka kuntigiw ni u ka sarakalasebaaw ni u ka kiraw ni Jerusalɛmka minw sara, olu kolow na cɛ ka bɔ kaburuw kɔnɔ.
[2] O mɔgɔw tun ye tile ni kalo ni sankolola dolo minw bɛɛ kanu ka baara kɛ olu ye ka taama u nɔ fɛ ka u ɲini ka u bato, o mɔgɔw kolow na yɛrɛkɛ o fɛnw ɲɛ kɔrɔ. O kolow tɛna lajɛɲɔgɔn kan ka don. U na kɛ nɔgɔ ye dugukolo kan.
[3] U bɔnsɔn tɔ minw ɲɛnama bɛ to yɔrɔ o yɔrɔ la, ne ye u jɛnsɛn ka taa o yɔrɔ minw na, saya na diya olu ye ka tɛmɛnɲɛnamaya kan.» Kɛlɛbolow Matigi ko ten.
[4] O tuma la, i k'a fɔ u ye fana ko Matigi ko: «Yala ni mɔgɔ min bira, o tɛ wuli tun wa? Ni mɔgɔ min filila, yala o tɛ kɔsegin ka siraɲuman minɛ ko kura wa?
[5] Ayiwa, mun kosɔn Jerusalɛmkaw bɛ to u ka filili sira kan fo u tɛ sɔn ka yɛlɛma? U bɛ u jija kojugu kɛli la. U tɛ sɔn ka nimisa olu la.
[6] Ne ye ne tulo majɔ ka lamɛnni kɛ, nka u ma tiɲɛ fɔ. U si tɛ u jɔ u ka juguya kow la k'a fɔ ko: ‹Ne ye mun kɛ›? U bɛɛ bɛ boli ka taa u yɛrɛw kun fɛ i ko yɛlɛnkan so min bɛ tɛliya ka taa kɛlɛ la.
[7] Baninkɔnɔ bɛ a na waati latigɛlen dɔn. Ntubanni ni nanagalen ani foroko bɛ u kɔsegin tuma dɔn, nka ne ka mɔgɔw tɛ Matigi ka sariya dɔn.
[8] Aw dun bɛ se k'a fɔ cogo di ko aw ye hakilitigiw ye, ko aw bɛ Matigi ka sariya dɔn? Nka sɛbɛnnikɛlaw bɛ sɛbɛnni kɛ ni sɛbɛnni kala min ye, o ye nkalon tigɛ kala ye.
[9] O hakilitigiw na maloya ka kabakoya. U na minɛ ka taa jɔnya la. U banna Matigi ka sariya la. Mun hakili sifa bɛ u fɛ?
[10] O de kosɔn ne na u musow di cɛ wɛrɛw ma, ka u ka forow di mɔgɔ wɛrɛw ma, sabu k'a daminɛ u la mɔgɔ gwansan na ka taa bila u la mɔgɔba la, u bɛɛ bɛ ko bɛnbali kɛ, k'a daminɛ u ka kiraw la ka taa se u ka sarakalasebaaw ma, olu bɛɛ bɛ nanbara kɛ.
[11] U si tɛ u jija ka ne ka mɔgɔw jogindaw fura kɛ. U b'a fɔ ko: ‹Hɛrɛ bɛ, hɛrɛ bɛ,› k'a sɔrɔ hɛrɛ si tɛ yen.
[12] U maloyara o ko haramulenw kɛli kosɔn wa? Ayi, u si ma maloya, hali u si tɛ maloya ko dɔn. O de kosɔn minw na bi, u ni olu na biɲɔgɔn fɛ. Matigi ko u bɛɛ na bi tɔɔrɔ don na. Ɔwɔ, ne na u halaki ka u ban.» Matigi ko ten.
[13] Matigi ko: «Rezɛn mɔ si tɛna sɔrɔ a sun na tun, toro mɔ si tɛna sɔrɔ toro sun na tun. U furaw na fɔsɔnfɔsɔn, ne tun ye min di u ma, o na bɔsi u la.»
[14] Mun kosɔn an bɛ to an sigi yɔrɔw la? An kaɲɔgɔn lajɛ ka taa dugu barikamaw kɔnɔ ka halaki yen, k'a masɔrɔ Matigi an ka Ala ye an fagali ko latigɛ. A ye ji bagama di an ma k'a min, k'a masɔrɔ an ye Matigi hakɛ ta.
[15] An tun bɛ hɛrɛ makɔnɔ, nka ko ɲuman si ma se an ma. An jigi tun bɛ kɛnɛyali kan, nka o kɛra tɔɔrɔ ye.
[16] An ye an juguw ka kɛlɛkɛ sow hanhankan mɛn ka bɔ Dan fan fɛ. U hanhankan bɛ dugukolo yɛrɛyɛrɛ. U bɛ na ka jamana bɛɛ halaki ani duguw ni u kɔnɔ mɔgɔw.
[17] Matigi ko: «Domayakɛlaw tɛ se ka sa jugu minw lankari sɔrɔ, ne na olu ci aw kama, u na aw cin.»
[18] Ne dusukun tɔɔrɔlen bɛ kosɛbɛ. Cogo si tɛ yen ka ne kaɲɛnasisi ban.
[19] Ne tulo bɛ ne ka mɔgɔw kulokan na u ka tɔɔrɔ kosɔn. U bɛ kulo jamana jan na. Yala Matigi tɛ Sion kɔnɔ wa? A ka masakɛ tɛ a kɔnɔ wa? Mun kosɔn u bɛ ne dusu dimin ni jamana wɛrɛ bato fɛn fufafuw ye?
[20] Suman tigɛ waati tɛmɛnna, samiyɛ tɛmɛnna, an ma kisi.
[21] Ne ka mɔgɔw joginda bɛ ɲini ka ne faga, ne bɛ kasi la, dusu kasi ye ne sɔrɔ.
[22] Fura munta si tɛ sɔrɔ Galad wa? Furakɛla si tɛ yen wa? Mun y'a to ne ka mɔgɔw ma kɛnɛya?