[1] Min fɔra Amɔn bɔnsɔn ko la. Matigi ko: «Yala denkɛ tɛ Israɛl fɛ wa? Ciyɛntala tɛ a fɛ wa? Mun y'a to bato fɛn Milkom bɛ Gad? Mun y'a to a ka mɔgɔw sigilen bɛ Gad duguw kɔnɔ?»
[2] Matigi ko: «Don bɛ na, ne n'a to kɛlɛ mankan ka bɔ Amɔn bɔnsɔn ka dugu Raba kama. A na ci ka kɛ tomon ye. Dugu minw kɛra ka Raba lamini, olu na jeni ni tasuma ye. Israɛl na a ka dugu kɔrɔw mara ko kura.» Matigi ko ten.
[3] «Hesibɔn, i ka nwunankan bɔ sabu Ayi cira. Rabakaw, aw ka kulokan bɔ ka cafu fini don aw kan na ka kasi ka boliboli kogow niɲɔgɔn cɛ yan fɛ ni yen fɛ, k'a masɔrɔ bato fɛn Milkom ni a ka sarakalasebaaw ni a ka kuntigiw bɛ taa jɔnya la.
[4] E Raba denmuso janfanci, mun kosɔn i bɛ i yɛrɛ bonya i ka jɛkɛnɛ ni i ka jɛkɛnɛ bin nuguma ko la? I bɛ i jigi da i yɛrɛ ka nafolow kan k'a fɔ ko: ‹Jɔn bɛ na ne kɛlɛ?›»
[5] Kɛlɛbolow Matigi ko: «Ne na siran kobaw lawuli i kama i fan bɛɛ la. Aw bɛɛ kelen-kelen na gɛn ka taa yɔrɔ jan, mɔgɔ si tɛna sɔrɔ ka mɔgɔ gɛnnenw lasegin.
[6] O tɛmɛnnen kɔ, Amɔn bɔnsɔn min cɛra ka taa jɔnya la, ne na olu lasegin.» Matigi ko ten.
[7] Min fɔra Edɔm ko la. Kɛlɛbolow Matigi ko: «Yala hakilitigi tɛ Teman wa? Laadibaaw tɛ laadiliɲuman kɛ tun wa? U ka hakilitigiya banna wa?
[8] Aw Dedankaw, aw bɛɛ ka aw kɔ sin ka boli ka taa aw sigi kuluwow kɔnɔ, k'a masɔrɔ ne na halakili bi Esau kan, a ka hakɛw sara tuma don.
[9] Rezɛn mɔ karibaaw tɛ taa ka rezɛn nɔɔrɔ to u kɔ wa? Ni sonyalikɛla nana su fɛ, a mago bɛ fɛn min na, a bɛ o dama ta.
[10] Nka ne kɔni, ne na Esau bɔnsɔn bɛɛ halaki, ne na a dogo yɔrɔw bɛɛ jira kɛnɛkan. A tɛna dogo yɔrɔ si sɔrɔ. a denw ni a balimaw ani a sigiɲɔgɔnw na halaki. Ale yɛrɛ tɛna kɛ yen tun.
[11] I ka i ka falatɔw to yen, ne na u balo. I ka muso cɛ salenw ka u jigi da ne kan.»
[12] Matigi ko: «Minw tun man kan ka minni kɛ nin jifilen na, wajibi don olu ka minni kɛ a la. E yɛrɛ sarabali dun bɛ se ka to cogo di? Ayi, i sarabali tɛna to. I fana na minni kɛ nin jifilen na dɛ.»
[13] Matigi ko: «Ne ye ne kali ne yɛrɛ la ko Bozra na ci ka kɛ tomon ye, a na kɛ yɛlɛbɔ fɛn ye. A na halaki ka danga. O duguw na kɛ tomonw ye badaa.» Matigi ko ten.
[14] Matigi ye kibaru min fɔ ne ye ka ci min di ne ma siyaw ko la, o filɛ nin ye, ko: «A' ye ɲɔgɔn lajɛ ka taa Edɔm kama. A' ye wuli ka a kɛlɛ.
[15] Ne na i dɔgɔya siyaw cɛma ka i lagosi mɔgɔw cɛma.
[16] E min sigilen bɛ faraw cɛma, ni i sigi yɔrɔ ye sanfɛla ye, i ɲɛsiraɲa min bɛ mɔgɔw la, ani i dusukun ka kuncɛbaya, olu ye i lafili. Hali ni i ye i ɲaa da san fɛ i ko bɔn ta, ne na i labi.» Matigi ko ten.
[17] «Edɔm na halaki. Bɔnɛ min na se nin jamana ma, a yɔrɔ taamabaaw na o ye ka kabakoya ka dala file fyɛ.»
[18] Matigi ko: «A na kɛ i ko Sodɔmɛ ni Gomɔrɛ ani o dafɛ duguw halakira cogo min na. Mɔgɔ si tɛna sigi Edɔm kɔnɔ tun. Hadamaden si tɛna sigi yen tun.
[19] «A na wuli ka taa sigi yɔrɔ barikama kama, i ko waraba bɛ wuli ka bɔ Jurdɛn ba da la jiriw cɛma cogo min na. Ne na Edɔm gɛn ka bɔ yen yɔrɔ nin kelen na. Ne na jɔnɲɛnatɔmɔ ka nin kɛ? Ayiwa jɔn bɛ i ko ne? Jɔn bɛ se ka ne wele kiri la? Masakɛ jumɛn bɛ se ka jɔ ne ɲɛ kɔrɔ?»
[20] Ayiwa, Matigi ye min latigɛ Edɔm kama, a ye ko min labɛn Temankaw kama, aw ka o lamɛn. A ko: «Tiɲɛ la, u na sama ka taa fagali yɔrɔ la i ko sagaden barikantanw. U sigi yɔrɔw na lankolonya, siga t'a la.
[21] Dugukolo na yɛrɛyɛrɛ u bikan kosɔn. U kulokan na mɛn fo Kɔgɔji Bilen na.
[22] A filɛ, jugu na pan i ko bɔn ka a kamanfuraw sɛɛnɛ Bozra kun na. O don na Edɔm cɛ farin dusukunw na kɛ i ko muso tintɔ dusukun.»
[23] Min fɔra Damasi ko la. «Hamat ni Arpad kɔnɔna filila, k'a masɔrɔ u ye kibaru jugu mɛn fo u ja wulila. U hakiliɲaamina ka kɛ i ko kɔgɔji min jikuruw tɛ se ka mada.
[24] Damasikaw barika banna, u yɛlɛmana ka boli, yɛrɛyɛrɛ ye u minɛ. Dimiba ni tɔɔrɔ ye u minɛ i n'a fɔ muso tintɔ.
[25] Ne diyaɲe dugu nɔɔrɔma ma kɛ tomon ye fɔlɔ.
[26] A kɔnɔ kamalenw na bi a fɛrɛkɛnɛw la, o don na kɛlɛkɛ cɛw bɛɛ na sa.» Kɛlɛbolow Matigi ko ten.
[27] «Ne na Damasi dugu lamini kogow jeni ni tasuma ye. O tasuma na Ben-Hadad ka masaya so jeni.»
[28] Babilonɛ masakɛ Nebukadnezar ye se sɔrɔ Kedar jamana ni Hazor masaya minw kan, a fɔra olu ko la ko, Matigi ko: «A' ye wuli ka taa Kedar kama ka kɔrɔn fɛ mɔgɔw faga.
[29] U ka finisow na wɔrɔn, ka u ka baganw minɛ, ka u ka gwaw ni u ka minanw ni u kaɲaamɛw minɛ ka pɛrɛn u kama ko: ‹Siran kow kɛra ka aw lamini.›»
[30] Matigi ko: «Hazorkaw, aw ka aw se ko bɛɛ kɛ ka boli ka dan kɛ. Aw ka aw dogo farawow kɔnɔ, k'a masɔrɔ Babilonɛ masakɛ Nebukadnezar ye ko dɔ latigɛ aw kama, a na aw halaki.»
[31] Matigi ko: «Siya min lafiyalen lakanalen don, ni dugu datugu kon ni kon balabalaw tɛ u fɛ, u sigilen don u dan na, aw ka wuli ka taa olu kama.
[32] U juguw na u kaɲaamɛw minɛ u la, u ka bagankulu dama dɔnbaliw na cɛ. Mɔgɔ minw bɛ u kun kɔrɔbɔ, ne na olu jɛnsɛn fiɲɛ la fan bɛɛ. Ne na bɔnɛ lase u ma ka bɔ fan bɛɛ la.» Matigi ko ten.
[33] «Hazor na kɛ kungo wuluw dogo yɔrɔ ni kungokolon lankolon ye badaa. Mɔgɔ si tɛna sigi a kɔnɔ tun. Hadamaden si tɛna sigi yen.»
[34] Juda bɔnsɔn ka masakɛ Sedesiasi ka masaya daminɛ tuma la, Matigi ka kuma sera kira Jeremi ma Elam ko la.
[35] Kɛlɛbolow Matigi ko: «Ne na Elam ka bonnikɛ kala kari, o min ye a barika ye.
[36] Ne na fiɲɛ naani ci ka bɔ sankolo tunkun naani la Elam kama ka a ka mɔgɔw jɛnsɛn siyaw bɛɛ cɛma. U dɔw na sɔrɔ siyaw bɛɛ cɛma.
[37] Ne n'a to Elamkaw ja ka tigɛ u juguw ni u ni ɲinibaaw ɲɛ. Ne na ne ka dimiya tasuma lase u ma ka u halaki. Ne n'a to npan ka wuli u kama fo ka u halaki ka u ban.
[38] Ne na ne yɛrɛ ka masasigilan sigi Elam kɔnɔ ka masakɛ ni a ka kuntigiw bɛɛ halaki.» Matigi ko ten.
[39] Matigi ko: «Nka don bɛ na, ne na Elamkaw kɔsegin ka bɔ jɔnya la tun.»