[1] Ayiwa Matigi ko: «I ka taa Juda bɔnsɔn ka masakɛ ka so kɔnɔ ka nin kuma fɔ a ye ko:
[2] ‹Juda bɔnsɔn ka masakɛ, e min sigilen bɛ Dawuda ka masasigilan kan ani aw minw ye a ka baarakɛlaw ye ani a ka mɔgɔ minw bɛ don dugu daw fɛ, aw ka nin kuma lamɛn.›
[3] Matigi ko: ‹Aw ka ko bɛnnenw ni ko tilennenw sira taama ka falatɔw tila ka bɔ u tɔɔrɔbaaw bolo. Aw kana ko bɛnbali wala fariya ko si kɛ siginfɛ ni falatɔw ni muso cɛ salenw na. Aw kana mɔgɔ jalakibali faga nin yɔrɔ la.
[4] Ni aw ye ne ka ci fɔlenw sira taama, masakɛw tɛna dɛsɛ Dawuda ka masasigilan kan. U na yɛlɛn wotorow ni sow kan ka don nin masaya so daw fɛ. U ka sɔrɔdasiw ni u ka mɔgɔw na u lamini.
[5] Nka ni aw ma ne ka kuma lamɛn, ne, Matigi, ne bɛ ne kali ne yɛrɛ la ko nin masaya so na ci.›» Matigi ko ten.
[6] Matigi kumana Juda bɔnsɔn ka masakɛ ka so ko la, ko: «E min tun kɛra ne ɲɛ kɔrɔ i ko Galad jamanaɲuman ani Liban kuluw, ne na i yɛlɛma ka kɛ kungokolon lankolon ye, mɔgɔ si tɛ dugu min kɔnɔ.
[7] Ne na halakilikɛlaw bila i la. U bɛɛ kelen-kelen ka kɛlɛkɛ minan bɛ u bolo. U ka kɛlɛbolow na i ka sedere sunɲumanw tigɛ ka u fili tasuma la.
[8] «Siya caman na tɛmɛn nin dugu da fɛ. U bɛɛ kelen-kelen n'a fɔ u taamaɲɔgɔn ye ko: ‹Mun y'a to Matigi ye nin dugubaɲuman in kɛ tan?›
[9] Olu n'a jaabi ko: ‹O kɛra k'a masɔrɔ u banna Matigi u ka Ala ka layidu la ka u biri bato fɛn wɛrɛw kɔrɔ ka baara kɛ olu ye.›»
[10] Mɔgɔ min fagara, aw kana kasi o kosɔn, aw kana a su kasi, nka mɔgɔ min taara ni a tɛ kɔsegin a bange yɔrɔ la tun, aw ka kasi o de kosɔn.
[11] K'a masɔrɔ Josiasi denkɛ Salum min sigira masaya la a fa Josiasi nɔ na, Matigi y'a fɔ o ko la ko, a bɔra yan, a tɛna kɔsegin tun.
[12] A taara jamana min na, a na sa yen. A tɛna a ka yɔrɔ ye tun.
[13] «Mɔgɔ min bɛ a ka so jɔ ni tilenbaliya ye, ka a ka sankansow jɔ ni tɔɲɔli ye, ka a sigiɲɔgɔn bila diyagoya baara la ni a ma a sara,
[14] o min b'a fɔ ko: ‹Ne na soba jɔ ne yɛrɛ ye ka a sanfɛ si yɔrɔw bonya ka a finɛtiriw dila ko ɲuman, ka sedere jiri fɛrɛnw da a kɔnɔna la ka fɛn bilenman kɛ ka a kɔnɔ mun,› bɔnɛ bɛ o tigi ye.
[15] Yala i bɛ miiri ko ka soba jɔ ni sedere jiri ye, o bɛ i ka masayaɲɛ wa? I fa fana tun bɛ dumuni kɛ ka minni kɛ, nka a tun bɛ tilennenya ni tiɲɛ kow kɛ, o de kosɔn a ka kɛtaw ɲɛna.
[16] A tun bɛ kiri tilennenw tigɛ faantanw ni kɔlibaatɔw ye, o de kosɔn a kɛra dubaden ye. Min bɛ o ɲɔgɔn kɛ, o bɛ ne dɔn.» Matigi ko ten.
[17] «Nka i ɲɛ ni i dusukun tɛ miiri foyi la tɔnɔ jugu sɔrɔli kɔ, ka mɔgɔ jalakibali faga, ka mɔgɔw tɔɔrɔ ni fariya kow ye.»
[18] O de kosɔn Matigi y'a fɔ Juda bɔnsɔn ka masakɛ Josiasi denkɛ Jojakim ko la ko: «U tɛna a su kasi, ko: ‹Ne balimakɛ wala ne balimamuso.› U tɛna a su kasi, ko: ‹Ne kuntigi ni a bonya.›
[19] A su na don i ko fali su bɛ don cogo min na. A na sama ka fili Jerusalɛm kɔ fɛ.»
[20] «I ka yɛlɛn Liban kulu san fɛ ka pɛrɛn, ka i kan bɔ Basan, ka kulokan bɔ Abiram kulu kan, sabu i teriw bɛɛ halakira.
[21] Ne kumana i fɛ i lafiya tuma la, nka i ko i tɛna ne lamɛn. O kɛra i taama cogo ye kabini i denmisɛnma, i ma ne kan minɛ.
[22] Fiɲɛba na taa ni i ka saga gɛnnaw ye, i teriw na minɛ ka taa jɔnya la. O tuma la i na maloya ka i kun suuli, i ka ko jugu kɛlenw kosɔn.
[23] E min sigilen bɛ Liban, ka i sigi yɔrɔ dila ni sedere jiriw ye, i na nwunankan bɔ i ka dimi tɔɔrɔ kosɔn, i ko tin bɛ muso kɔnɔma minɛ cogo min na.»
[24] Matigi ko: «Neɲɛnama tɔgɔ kosɔn, hali ni Juda bɔnsɔn ka masakɛ Jojakim denkɛ Jekoniya kɛra ne bolonkɔni nɛgɛ taamashyɛnma ye min donna ne kininbolo la, ne na a sama ka bɔ ne bolo la.
[25] Minw b'a fɛ ka i faga, i bɛ siran minw ɲɛ, Babilonɛ masakɛ Nebukadnezar ni Kaldekaw kɔni, ne na i don olu bolo.
[26] Ne na i ni i woloba minɛ ka taa ni aw ye jamana wɛrɛ la, aw ma bange yɔrɔ min na, aw na sa yen.
[27] U b'a fɛ ka kɔsegin jamana min na, u tɛna kɔsegin yen tun.»
[28] Yala Jekoniya kɛra daga fililen ye wa? Daga cilen don, mɔgɔ mago tɛ min na tun wa? Minan min ko man di mɔgɔ si ye, ale ye o ye wa? A ni a bɔnsɔn ma jamana min dɔn, mun y'a to u gɛnna ka taa yen?
[29] Dugukolo, dugukolo, dugukolo, i tulo majɔ Matigi ka kuma la.
[30] Matigi ko: «I ka nin cɛ tɔgɔ sɛbɛn ko den tɛ a fɛ. A ka foyi tɛna jiidi a si tilew la, katuguni a bɔnsɔn si tɛna sigi Juda bɔnsɔn kun na Dawuda ka masasigilan kan.»