[1] Matigi ka kuma sera kira Jeremi ma siyaw bɛɛ ko la.
[2] Nin ye kiraya kuma ye min fɔra Misira jamana ani Misira masakɛ Faraon Neko ka kɛlɛbolow ko la. U tun bɛ Ufrata ba da la Karkemis dugu kɔnɔ, Babilonɛ masakɛ Nebukadnezar ye se sɔrɔ u kan yen. O kɛra Josiasi denkɛ Jojakim, Juda bɔnsɔn ka masakɛ ka masaya san naaninan la.
[3] A' ye nɛgɛ bɛnnan fitininw ni kunbabaw labɛn ka taa kɛlɛ la.
[4] Aw ka wotorow siri sow la, sotigiw, aw ka yɛlɛn sow kan. Aw ka nɛgɛ fugulaw don aw kun na ka aw jɔ. Aw ka tamaw jɔsi ka u jɛ kosɛbɛ, aw ka nɛgɛ dulɔkiw don aw kan na.
[5] «Nka neɲɛ bɛ mun na? Ne y'a ye ko u siranna kosɛbɛ. U seginna kɔ. U ka kɛlɛkɛ cɛ farinw gosira ka bi. U bɛ boli, hali u tɛ u kɔ filɛ, siran koba bɛ fan bɛɛ la.» Matigi ko ten.
[6] «Cɛ min sen ka di, o tɛ se ka a yɛrɛ kisi. Kɛlɛkɛ cɛ farin tɛ boli yɔrɔ sɔrɔ ka a yɛrɛ tila. U talonnen bitɔ filɛ saheli yanfan fɛ Ufrata ba da la.
[7] «Nin min bɛ wuli i ko Nil baji kuruw bɛ wuli cogo min na, o ye jɔn ye?
[8] Misira de bɛ wuli i ko Nil baji, a bɛ wuli i ko jiba woyotɔ. A ko: ‹Ne na wuli. Ne na dugukolo yɔrɔw bɛɛ datugu, ka duguw ni u kɔnɔ mɔgɔw bɛɛ faga.›
[9] Yɛlɛnkan sow, aw ka taa, kɛlɛkɛ wotorow, aw ka girin u kan. Kɛlɛkɛ cɛw, aw ka taa, Etiopikaw ni Libikaw minw bɛ nɛgɛ bɛnnan ta, ani aw Ludika minw bɛ kala bon cogo dɔn, a' ye aw labɛn ka taa.
[10] O don ye Matigi, Kɛlɛbolow Matigi ta ye, a hakɛ bɔ don don, k'a mɔnɛbɔ a juguw la. Npan na halakili kɛ ka a fa u joli la, fo ka a ɲɛnamini. Sabu Kɛlɛbolow Matigi bɛ a ka sarakaw faga, saheli yanfan fɛ jamana la Ufrate ba da la.
[11] Misira, i ka wuli ka taa Galad ka fura tuluma ɲini. Nka i bɛ fura caman ɲini ka kɛ i yɛrɛ la, olu bɛɛ na kɛ fuu ye, i tɛna kɛnɛya.
[12] Siyaw ye i ka maloya kow kibaru mɛn, i nwunankan sera dugukolo yɔrɔw bɛɛ la, k'a masɔrɔ kɛlɛkɛ cɛw bɛ talonɲɔgɔn na ka biɲɔgɔn fɛ.»
[13] Babilonɛ masakɛ Nebukadnezar nana Misira jamana minɛ tuma min na, Matigi ye kuma min fɔ Jeremi ye, o filɛ nin ye:
[14] «I ka nin kibaru fɔ Misira ye, ka a welewele da Migdol dugu kɔnɔ, ka a welewele da Nof ani Takpanez duguw kɔnɔ, ko: ‹Aw ka wuli ka aw labɛn, k'a masɔrɔ npan bɛ tiɲɛnni kɛ i fan bɛɛ la.
[15] Mun y'a to i ka kɛlɛkɛ cɛw bira? U jɔlen ma se ka to, k'a masɔrɔ Matigi de ye u labi.›
[16] A y'a to u caman ka talonɲɔgɔn na ka bi fo u b'a fɔ ko: ‹An ka kɔsegin ka taa an ka mɔgɔw yɔrɔ an bange jamana kɔnɔ, ka kisi mɔgɔ faga npan ma.›
[17] U kulola yen ko: ‹Misira jamana masakɛ Faraon tɛ foyi ye mankan dama kɔ, a ka waati tɛmɛnna.›
[18] Masaba min tɔgɔ ko Kɛlɛbolow Matigi, o ko: ‹Neɲɛnama tɔgɔ kosɔn, min bɛ na, o na kɛ i ko Tabor kulu bɛ kulu tɔw cɛma cogo min na, ani Karmɛl kulu min bɛ kɔgɔji da la.
[19] Misira, i ka i ka minanw labɛn ka taa jɔnya la, k'a masɔrɔ Nof na kɛ tomon ye, a na jeni, mɔgɔ si tɛna sigi a kɔnɔ tun.
[20] Misira bɛ i ko misi gerenɲuman, nka halakilikɛla ka bɔ saheli yanfan fɛ bɛ na a kama.
[21] A ka kɛlɛden sarataw bɛ a cɛma i ko misi tɔlɔlenw, nka olu bɛɛ ye u kɔ sin ka boli ka taa. U tɛ se ka jɔ. K'a masɔrɔ bɔnɛ don cunna u kan, ani u halaki don.
[22] Misira kɔnɔ mɔgɔw bolikan bɛ i ko sa fofokan, k'a masɔrɔ u juguw nana ni barika ye, ka taa u kama ni jelew ye i ko jiritigɛlaw ka jelew.›
[23] Matigi ko: ‹Hali ni a kɛra tu dibilen ye, u bɛ a tigɛ, katuguni u ka ca ni ntɔnw ye, u dama dɔnbali don.
[24] Misira jamana maloyara k'a kun suuli, a donna saheli yanfan mɔgɔw bolo.›»
[25] Kɛlɛbolow Matigi, Israɛl ka Ala ko: «Ne na No bato fɛn Amɔn halaki ani Misira jamana ni a ka masakɛw ni u ka bato fɛnw ani Faraon ni minw jigi dalen bɛ a kan.
[26] Minw b'a fɛ ka u faga, ne na u don olu bolo, Babilonɛ masakɛ Nebukadnezar ni a ka jɔnw kɔni. O tɛmɛnnen kɔ, mɔgɔ na sigi Misira jamana kɔnɔ i ko tile tɛmɛnnen kɔrɔw.» Matigi ko ten.
[27] «Ne ka jɔnkɛ Yakuba, i kana siran. Israɛl, i ja kana tigɛ, k'a masɔrɔ ne na i labɔ jamana janw na, i bɔnsɔn minw bɛ jɔnya la jamana wɛrɛw la, ne na olu labɔ o yɔrɔw la. Yakuba na kɔsegin, a lakanalen na sigi hɛrɛ la, mɔgɔ si tɛna a lasiran.»
[28] Matigi ko: «Ne ka jɔnkɛ Yakuba, i kana siran, sabu ne bɛ i fɛ. Ne ye i jɛnsɛn siya minw cɛma, ne na olu bɛɛ halaki ka u ban. Nka e kɔni, ne tɛna i halaki ka i ban. Ne na i kolo ni hakili ye, nka ne tɛna i sarabali to.»