[1] Garadiw kuntigi Nebuzar-Adan ye Jeremi bila ka bɔ Rama tuma min na, Matigi kumana Jeremi fɛ. Juda bɔnsɔn ni Jerusalɛmka minw minɛna ko u bɛ taa jɔnya la Babilonɛ, Jeremi sirilen tun bɛ olu cɛma ni jɔlɔkɔw ye. Garadiw kuntigi ye a ɲini k'a sɔrɔ yen k'a labɔ mɔgɔ minɛlenw cɛma.
[2] Garadiw kuntigi ye Jeremi wele k'a fɔ a ye ko: «Matigi, i ka Ala kumana nin bɔnɛ ko la i ka jamana ta fan fɛ.
[3] Sisan a ye o kow bɛɛ kɛ ka dafa. A tun ye min fɔ, a ye o kɛ ka dafa, k'a masɔrɔ aw ye jurumu kɛ Matigi la. Aw ma a ka ci fɔlenw sira taama. O de kosɔn nin kow bɛɛ ye aw sɔrɔ.
[4] O bɛɛ n'a ta, sisan ne bɛ i bolo la jɔlɔkɔw foni ka i labila. Ni a ka di i ye ka taa ne fɛ Babilonɛ, i ka taa, ne na ne janto i la. Ni taali ma diya i ye ne fɛ Babilonɛ, i ka to yan. Jamana bɛɛ filɛ i ɲɛ kɔrɔ. Yɔrɔ min ka di i ye, i ka taa yen.»
[5] Jeremi jɔlen tora yen, garadiw kuntigi Nebuzar-Adan y'a fɔ a ye ko: «Babilonɛ masakɛ ye Safan denkɛ Ahikam denkɛ Gedaliya min sigi Juda ka duguw kun na, i ka segin ka taa o fɛ ka to ale ni mɔgɔ tɔw fɛ yen wala yɔrɔ min ka di i ye, i ka taa i sigi yen.» O kɔ, garadiw kuntigi ye dumuni ni bonyali fɛn di a ma k'a bila ka taa.
[6] O tuma la Jeremi taara Ahikam denkɛ Gedaliya yɔrɔ Mizpa. A sigira o ni jamana kɔnɔ mɔgɔ tɔw fɛ yen.
[7] Juda bɔnsɔn ka kɛlɛkɛ cɛw kuntigi minw tora kungokolon kɔnɔ yen, olu ni u ka mɔgɔw bɛɛ y'a mɛn ko Babilonɛ masakɛ ye Ahikam denkɛ Gedaliya sigi ka kɛ jamana kuntigi ye ka cɛw ni musow ani denmisɛnw ni faantanw kalifa a ma, ko u ma minɛ ka taa Babilonɛ,
[8] o tuma la, o kuntigiw taara Gedaliya sɛgɛrɛ Mizpa. Olu tun ye Netaniya denkɛ Isumaɛl ni Kareak denkɛw Jokanan ni Jonatan ani Tanhumet denkɛ Seraja ani Netofa Efayi denkɛw ani Maaka Jezaniya ani u ka mɔgɔw ye.
[9] Safan denkɛ Ahikam denkɛ Gedaliya ye i kali u ye, ko: «Aw kana siran, aw ka baara kɛ Kaldekaw ye. Aw ka sigi jamana kɔnɔ ka baara kɛ Babilonɛ masakɛ ye. Aw na hɛrɛ sɔrɔ.
[10] Ne kɔni na to Mizpa ka Kaldekaw makɔnɔ yan. Nka aw ka diwɛn ni jiridenw ani tulu bɔ ka olu mara aw ka dagaw kɔnɔ. Aw bɛ dugu minw kɔnɔ, aw ka to yen.»
[11] Yahutu minw bɛɛ tun bɛ Moab jamana ni Amɔn bɔnsɔn ka jamana ni Idume jamana ani u laminiw bɛɛ la, olu bɛɛ y'a mɛn ko Babilonɛ masakɛ ye mɔgɔ dɔw ci Juda bɔnsɔn tɔ tolenw cɛma ka Gedaliya sigi ka kɛ u kuntigi ye.
[12] Ayiwa, o Yahutu minw tun gɛnna ka taa yɔrɔ wɛrɛw la, olu kɔseginna Juda bɔnsɔn ka jamana la Gedaliya yɔrɔ la Mizpa ka diwɛn ni jiridenw caman sɔrɔ ka u mara.
[13] O tuma la Kareak denkɛ Jokanan ni sɔrɔdasi kuntigi dɔw taara Gedaliya sɛgɛrɛ Mizpa k'a fɔ a ye ko:
[14] «Yala i b'a dɔn ko Amɔn bɔnsɔn ka masakɛ Baalis ye Isumaɛl ci ko a ka na i faga wa?» Nka Gedaliya ma da o la.
[15] O tuma la Jokanan y'a fɔ Gedaliya ye dogo la, Mizpa ko: «Ne bɛ se ka taa Isumaɛl faga k'a sɔrɔ mɔgɔ si ma a dɔn. Mun y'a to i bɛ sɔn a ka i faga? Ni o kɛra, Yahutu minw lajɛlen bɛ i kɔrɔ, olu na jɛnsɛn. Juda bɔnsɔn tɔ tolenw na halaki.»
[16] Nka Gedaliya ye Jokanan jaabi ko: «I kana foyi kɛ, k'a masɔrɔ i bɛ min fɔ Isumaɛl ko la, o tɛ tiɲɛ ye.»