[1] Matigi ka kuma sera Jeremi ma, ko:
[2] «I ka taa i jɔ Alabatosoba da la ka nin kuma fɔ yen, ko: ‹Aw Juda bɔnsɔn minw bɛ don nin daw fɛ ka aw biri Matigi kɔrɔ, aw bɛɛ ka Matigi ka kuma lamɛn.›
[3] Kɛlɛbolow Matigi Israɛl ka Ala ko: ‹Aw ka aw ka siraw ni aw ka kɛwalew yɛlɛma, ni o kɛra, ne n'a to aw ka sigi nin jamana kɔnɔ.
[4] Mɔgɔ min bɛ lafilili kumaw fɔ ko yan ye Matigi batosoba ye, yan ye Matigi batosoba ye, yan ye Matigi batosoba ye, aw kana aw jigi da o kumaw kan.
[5] Nka ni aw ye aw ka siraw ni aw ka kɛwalew yɛlɛma ka mɔgɔ ka kow ɲɛnabɔ ni tilennenya ye,
[6] ni aw ma siginfɛw ni falatɔw ani muso cɛ salenw tɔɲɔ, ni aw ma mɔgɔ jalakibali joli bɔn nin yɔrɔ senuma la, ni aw ma tugu bato fɛn wɛrɛw nɔ fɛ ka bɔnɛ lase aw yɛrɛw ma,
[7] o tuma la ne n'a to aw ka sigi nin yɔrɔ la ani nin jamana kɔnɔ, ne ye o min di aw bɛnbaw ma badaa.
[8] ‹Nka aw bɛ aw jigi da lafilili kumaw kan, u tɛ aw dɛmɛ cogo si.
[9] Aw bɛ sonyali kɛ ka mɔgɔ faga ka jatɔya kɛ ka aw kali nkalon kan ka wusulan suma duman wusu Baal ye ka taama bato fɛn wɛrɛw nɔ fɛ, aw tun ma olu minw dɔn.
[10] O kɔ, aw bɛ na ne ɲɛ kɔrɔ nin so kɔnɔ, ne tɔgɔ dalen bɛ o min kan, k'a fɔ ko aw kisira, k'a sɔrɔ aw bɛ o ko haramulenw bɛɛ kɛ.
[11] Ne tɔgɔ dalen bɛ so min kan, o tɛ binkannikɛlaw dogo yɔrɔ ye aw ɲɛ na wa?› Matigi ko: ‹Ne yɛrɛ ye o kow bɛɛ seere ye.
[12] ‹Ayiwa, aw ka taa ne sigi yɔrɔ kɔrɔ la Silo, ne tɔgɔ tun dara o min na ka kɔrɔ. Ne ye min kɛ ne ka mɔgɔw Israɛl bɔnsɔn na o yɔrɔ la u ka juguya kosɔn, aw ka o filɛ.›
[13] Ayiwa sisan Matigi ko: ‹Aw ye nin ko juguw bɛɛ kɛ. Ne tora ka kuma aw fɛ, nka aw ma sɔn ka ne lamɛn. Ne ye aw wele, aw ma sɔn ka ne jaabi.
[14] O de kosɔn, ne tɔgɔ dara nin so min kan, ani aw jigi dara o so min kan, ne ye nin yɔrɔ min di aw ni aw bɛnbaw ma, ayiwa, ne na o yɔrɔ kɛ i ko ne ye Silo kɛ cogo min na.
[15] Ne na aw gɛn ka bɔ ne ɲɛ kɔrɔ i ko ne ye aw bɛnbaw ni aw balimaw Efrayim bɔnsɔn gɛn ka bɔ ne ɲɛ kɔrɔ cogo min na.›
[16] «Matigi ko: ‹E kɔni, i kana delili kɛ nin mɔgɔw ye, i kana na ne sɛgɛrɛ u kosɔn ka ne deli. I kana to ka delili kɛ u ko la ne ɲɛ kɔrɔ, sabu ne tɛna i lamɛn.
[17] Yala u bɛ min kɛ Juda bɔnsɔn ka duguw kɔnɔ ani Jerusalɛm kɔnɔ, i ɲɛ tɛ o la wa?
[18] Denmisɛnw bɛ dɔgɔ ɲini, u faw bɛ o dɔgɔ jeni, muso bɛ mugu nɔɔni ka takulaw dila sankolola masamusoma ye ka saraka bɔntaw bɔ bato fɛn wɛrɛ ye ka ne dusu dimin.›
[19] Matigi ko: ‹U bɛ o kɛ ne la wa? Ayi dɛrɛ, u bɛ o kɛ u yɛrɛw de la.›
[20] «O de kosɔn Matigi Ala ko: ‹Ne ka dimiya ni ne mɔnɛbɔ ko na bi nin jamana ni a kɔnɔ mɔgɔw ni a baganw ni a kungo kɔnɔ jiriw ni dugukolo sɛnɛ sumanw bɛɛ kan. A na kɛ i ko tasuma mana min tɛ sa.›
[21] «Ayiwa Matigi Kɛlɛbolowtigi, Israɛl ka Ala ko: ‹Aw ka aw ka saraka jenitaw fara aw ka saraka tɔw kan ka u sogo dun,
[22] k'a masɔrɔ ne ye aw bɛnbaw labɔ Misira jamana kɔnɔ tuma min na, ne ma ci fɔlenw di u ma saraka jenitaw ni saraka wɛrɛw ko la.
[23] Ne ye ci fɔlen minw di u ma, olu filɛ ninw ye, ko aw ka ne kan minɛ. Ni o kɛra, ne na kɛ aw ka Ala ye, aw na kɛ ne ka mɔgɔw ye. Ne ye sariya minw sɛbɛn aw ye, aw ka olu bɛɛ sira taama walisa aw ka duba sɔrɔ.
[24] Nka u ma o lamɛn, u ma u tulo majɔ o fɛ. U tugura lafilili kumaw nɔ fɛ ka kɛɲɛ ni u ka dusukun gɛlɛya ye. U ye u kɔ sin ne ma, u ma sɔn ka gɛrɛ ne la.
[25] Kabini aw bɛnbaw bɔra Misira jamana kɔnɔ ka na se bi ma, ne ye ne ka baaraden kiraw ci aw ma, ne ye u ci aw ma don o don, ne ma o dabila.
[26] Nka aw ma sɔn ka ne lamɛn, aw ma aw tulo majɔ. Aw ye aw tulo gɛlɛya ka ko jugu kɛ ka tɛmɛn aw bɛnbaw kan.›
[27] «Ayiwa, i na nin kumaw bɛɛ fɔ u ye, nka u tɛna i lamɛn. I na u wele, nka u tɛna i jaabi.
[28] Ni o kɛra, i k'a fɔ u ye ko: ‹Siya min ma sɔn ka Matigi u ka Ala kan lamɛn, min banna a ka lasɔmili kumaw ma, o ye aw ye. Kantigiya banna ka bɔ aw cɛma.
[29] ‹I ka i kun di ka o kunsigi fili yɔrɔ jan ka maɲumatɔkan fɔ kulu walawalamaw kan, k'a masɔrɔ Matigi ye nin bɔnsɔn fili ka u to yen a ka dimiya kosɔn.›»
[30] K'a masɔrɔ Matigi ko: «Juda bɔnsɔn ye ko jugu kɛ ne ɲɛ kɔrɔ. Ne tɔgɔ bɛ wele yɔrɔ min na, u ye u ka bato fɛn haramulenw jɔ o so kɔnɔ k'a nɔgɔ.
[31] U ye batoli kɛ yɔrɔ jɔ Tofɛt, Ben-Hinom jɛkɛnɛ la ka u denkɛw ni u denmusow kɛ saraka jenitaw ye yen. Ne ma o fɔ u ye ani ne tun tɛ miiri o la fewu.»
[32] O de kosɔn Matigi ko: «Don dɔw bɛ na, a tɛna fɔ ko ‹Tofɛt› ‹Ben-Hinom jɛkɛnɛ› tun, nka a na wele ko ‹fagali jɛkɛnɛ›. U na mɔgɔw su don Tofɛt, sabu su don yɔrɔ wɛrɛ tɛna sɔrɔ.
[33] O mɔgɔw suw na kɛ sanfɛ kɔnɔw ni kungo waraw balo ye. Mɔgɔ si tɛna olu gɛn u la.
[34] Ne na sewakan niɲagalikan ni kɔɲɔcɛ dɔnkili dakan ni kɔɲɔmuso dɔnkili dakan ban ka bɔ Juda bɔnsɔn ka duguw kɔnɔ ani Jerusalɛm dugu bɔlɔnw na, k'a masɔrɔ jamana na kɛ kungokolon ye.»