[1] Song-chú yu lâu ngài kóng: “Chhiu-son Mô-sî lâu Sat-mû-ngí khî chhai Ngài mien-chhièn khiù Ngài, Ngài ya m̀ lìn-mén liá-têu ngìn. Tui Ngài mien-chhièn chiông kì-têu kiuk-chéu! Ham kì-têu chéu-khôi!
[2] Na-he kì-têu mun, kì-têu oi chéu-to nai-vi hi, ngì oi lâu kì-têu kóng, Song-chú án-ngiòng kóng: Yin-kôi phiang-sí ke, chhiu phiang-sí! Yin-kôi chan-sí ke, chhiu chan-sí! Yin-kôi ngo-sí ke, chhiu ngo-sí! Yin-kôi pûn-ngìn chok-chéu ke, chhiu pûn-ngìn chok-chéu!
[3] “Ngài — Song-chú kiet-thin sṳ́ kì-têu su si-chúng châi-hoi: Pûn tô-kiam chhṳ̀-sí; sṳ̂n-sṳ̂ pûn yâ-kiéu thô-chéu; pûn thiên-khûng ke fî-niâu pin thi-song ke yâ-chhu thûn-sṳ̍t, me̍t-sṳ̂.
[4] Yîn-vi Yù-thai-vòng Hî-sî-kâ ke lai-é Mâ-nâ-sî chhai Yâ-lu-sat-lâng ke só-cho, Ngài oi sṳ́ thiên-ha van-koet ke ngìn yit khon-tó kì-têu chhiu nâu-to voi sí.”
[5] Song-chú kóng: Yâ-lu-sat-lâng-ngìn â, má-ngìn voi khó-lièn ngì-têu? Má-ngìn voi vi ngì-têu pî-sông? Má-ngìn voi chón-sṳ̂n lòi hiong ngì-têu mun-ôn?
[6] Ngì-têu vok-thet Ngài; ngì-têu fân chón-sṳ̂n hi m̀-chhap Ngài. Só-yî Ngài oi chhûn-sú fí-me̍t ngì-têu; Ngài mò-oi ki-siu̍k lìn-mén ngì-têu.
[7] Ngài oi chhai koet-nui tak-chak sàng-sṳ ke mùn-héu, chhiong yung poi-kî án-ngiòng chiông ngì-têu poi chhut-hi. Ngài ke chṳ́-mìn â, Ngài oi sêu-me̍t ngì-têu; Ngài oi chhṳ̀ ngì-têu ke chṳ́-ńg, yîn-vi ngì-têu hàn m̀ fí-kói;
[8] ngì-têu ke pû-ngiòng pien koá-fu ke voi pí hói-sâ kha-tô. Ngài chhṳ̀-sí khiòng-chong ke heu-sâng-ngìn, tá-kit kì-têu ke â-mê. Ngài oi sṳ́ thung-khú lâu chho̍k-kiâng fut-yèn-kiên lìm-to kì-têu.
[9] Ke sóng-thet chhit-ke chṳ́-ńg ke â-mê fûn-thet, khiòng-khiòng hi voi thôn-thet; kì ke hî-mong chhiong tông-chu-thèu ke ngit-thèu fut-yèn lo̍k-sân, kì su siû-yu̍k, sṳt-mong kien-seu. Ngài oi sṳ́ kì-têu ke thi̍t-ngìn chiông chhûn-tó ke ngìn chhṳ̀ chhiang-chhiang. Ngài — Song-chú án-ngiòng siên-pu lé.
[10] Ngài kîm chhiu chhám lé! Ngâ-mê cho-má-ke kiung ngài? Hoi ngài oi lâu koet-nui só-yû ke ngìn yên-kâ! Ngài mò chia-chhièn pûn phe̍t-ngìn, ya mò hiong phe̍t-ngìn chia-chhièn, chúng-he tak-sà tû chu-ma ngài.
[11] Song-chú â, na-he ngài mò chhin chit-ngim sṳ-fung Ngì, na-he ngài ke thi̍t-ngìn tù-tó khun-khú ke sṳ̀, ngài mò thoi kì-têu khì-khiù, chhiu yù-chhai kì-têu ke chu-ma sṳ̍t-hien!
[12] (Mò-ngìn áu tet-thôn thiet-kun, thi̍t-phe̍t he tui pet-fông lòi ke chhâm-thùng thiet-kun.)
[13] Song-chú tui ngài kóng: “Vi-tó Ngài chṳ́-mìn chhai chhiòn-koet tak só-chhai só-fam ke chhui, Ngài oi sṳ́ kì-têu ke chhòi-pó pha̍k-pha̍k pûn-ngìn chhióng-chéu.
[14] Ngài oi sṳ́ kì-têu to sâng-fun ke só-chhai hi cho thi̍t-ngìn ke nù-chhòi; yîn-vi Ngài fat-khién to fó tông-chho̍k, oi chiông kì-têu sêu-thet.”
[15] Yèn-heu ngài kóng: “Song-chú â, má-ke Ngì tû tî. Khiù Ngì ki-ngiam ngài, pông-chhu ngài, hiong pet-hoi ngài ke ngìn po-sù! Khiù Ngì m̀-hó ngiûn-tén m̀ fat-khién; m̀-hó pûn kì-têu yû kî-fi chhṳ̀ ngài. Ngì oi tî, ngài su vú-yu̍k he vi-tó Ngì ke yèn-ku.
[16] Chú Song-ti — Van-kiûn ke Ngièn-soi â, Ngì khí-sṳ ke fa he ngài sîm-lìn ke liòng-sṳ̍t, Ngì ke fa sṳ́ ngài sîm chhûng-mân hí-lo̍k, yîn-vi ngài he su̍k Ngì ke.
[17] Ngài mò hi chhô chhai hióng-lo̍k ngìn ke fi-chûng khiung-ha nau-ngie̍t fôn-seu. Yîn-vi sun-chhiùng Ngì ke tai-liâng, ngài kû-tân chhô-tén; Ngì sṳ́ ngài chhûng-mân su-hi.
[18] Ngài cho-má-ke yit-chhṳ̍t su-khú? Cho-má-ke ngài ke sông-héu mò tet-tó yî-chhṳ? Kám-kóng Ngì tui-thai ngài chhiong voi phien-ngìn ke se hò-pa, yit-ha yû súi yit-ha mò súi, yí-sṳ m̀-tet?”
[19] Song-chú án-ngiòng en ngài kóng: “Na-he ngì to-chón-lòi, Ngài voi sû-liù ngì, sṳ́ ngì chhùng-sîn cho Ngài ke phu̍k-ngìn. Na-he ngì m̀ kâ-kóng fa, tân-tân chhòn-kóng yû ka-chhṳ̍t ke sin-sit, ngì chhiu cho-tet cho Ngài ke thoi-ngièn ngìn. Ngìn-mìn voi kûi-hiong ngì; ngì m̀-hó hi sun kì-têu.
[20] Ngài oi sṳ́ ngì chhai khiùn-chung mien-chhièn chhiong kiên-ku ke thùng-chhiòng thiet-piak. Kì-têu kûng-kit ngì, chúng-he mò phan-fap yàng-ko ngì. Ngài oi lâu ngì khiung-ha, chṳ́n-kiu ngì, pó-fu ngì.
[21] Ngài oi tui khiòng-phau ke fái-ngìn sú-chûng chiông ngì kiu chhut-lòi. Ngài — Song-chú án-ngiòng siên-pu lé.”