[1] Song-chú fûn-fu ngài hi mâi yit-chak fì âng-é, yu ham ngài tai mìn-kiên ke chóng-ló lâu ló chi-sṳ̂
[2] hàng-ko “Lan-fì-mùn” to Hiûn-nun-chṳ́ sân-lak hi. Kì oi ngài chhai ke-vi siên-pu Kì kâu-tai ngài ke sin-sit.
[3] Song-chú ham ngài án-ngiòng kóng: “Yù-thai ke kiûn-vòng lâu Yâ-lu-sat-lâng-ngìn â, ngì-têu oi chu-yi thâng; ngì-têu oi thâng Ngài — Song-chú, Van-kiûn ke Ngièn-soi, Yî-set-lie̍t Song-ti ke fa. Ngài oi kong thai châi-nan chhai liá só-chhai, sṳ́ thâng-tó liá-sṳ ke ngìn chhiòn-phu chho̍k-kiâng, ngí-kûng hiu-hiu-kún.
[4] Ngài án-ngiòng cho he yîn-vi Ngài ke chṳ́-mìn lì-khôi Ngài; kì-têu chhai liá-vi hiong phe̍t ke sṳ̀n-mìn hien-chi, tá-lá-sap liá thú-thi. Kì-têu pai ke sṳ̀n-mìn he kì-têu lâu kì-têu chú-siên m̀-sṳt ke, Yù-thai ke kiûn-vòng ya m̀-sṳt. Kì-têu chhai liá só-chhai mân-phien liù mò-chhui ke ngìn ke hiet,
[5] vi Pâ-li̍t hí chi-thàn, chhai táng-kô yung fó-sêu chhṳ-kâ ke chṳ́-ńg cho sên-ngì lòi hien-pûn Pâ-li̍t. Ngài m̀-sṳt min-lin kì-têu án-ngiòng cho; Ngài lièn sióng ya mò sióng-ko liá-ke sṳ.
[6] Só-yî, yû yit-ngit liá só-chhai m̀-voi chai ham-cho Thò-fî-thi̍t ya-he Hiûn-nun-chṳ́ sân-lak, fán-chón oi ham-cho ‘Chhṳ̀-ngìn ke Sân-lak’.
[7] Ngài oi chhai liá-vi pho-fái Yù-thai lâu Yâ-lu-sat-lâng ngìn-mìn yit-chhiet ke kie-va̍k. Ngài oi sṳ́ thi̍t-ngìn tá-yàng kì-têu, chhṳ̀-sí kì-têu. Ngài oi chiông kì-têu ke sṳ̂n-sṳ̂ pûn fî-niâu chéu-chhu cho sṳ̍t-vu̍t.
[8] Ngài oi sṳ́ liá-sàng su-tó tông tet-ngìn-vi ke fí-me̍t; tak-ke ko-lu ngìn khon-tó thin-chho̍k voi hak-tó, ya voi khon m̀-hí liá sàng-sṳ.
[9] Thi̍t-ngìn voi lòi pâu-vì liá-sàng, lon-chhṳ̀ ngìn-mìn. Sàng-tú ke ngìn voi yîn-vi pûn-ngìn pâu-vì, chṳ-to mò hó sṳ̍t, kô-put-chiông sṳ̍t lìn-sa ngìn ke ngiuk, sṳm-chṳ sṳ̍t chhîn-sên chṳ́-ńg ke ngiuk!”
[10] Chiap-tén, Song-chú fûn-fu ngài chhai khiung-ha hàng ke ngìn mien-chhièn tá-lan ke-chak fì âng-é,
[11] hiong kì-têu siên-pu: “Song-chú — Van-kiûn ke Ngièn-soi án-ngiòng kóng: Ngài oi sêu-me̍t liá ngìn-mìn, tá-lan liá-sàng, chhiong ngìn tá-lan fì âng-é, mò phan-fap siû-pú. Ngìn oi chiông kì-têu ke sṳ̂n-sṳ̂ chong chhai Thò-fî-thi̍t, yîn-vi phe̍t ke só-chhai mài-to mân-mân, mò vi-só hó mài kì-têu.
[12] Ngài oi cheu án-ngiòng tui-fu liá-sàng lâu liá-vi ke ngìn-mìn, sṳ́ liá-sàng pien-cho chhiong Thò-fî-thi̍t yit-yong.
[13] Yâ-lu-sat-lâng ke vuk-sa, Yù-thai koet-vòng ke vòng-kiûng, lâu sṳt chhai vuk-táng hiong sên-siuk sêu-hiông, hiong sṳ̀n-mìn hien-chiú ke vuk-è, chhiòn-phu voi chhiong Thò-fî-thi̍t yit-yong, sàng-cho mò chhiang-li ke só-chhai.”
[14] Só-yî Yâ-li-mí lì-khôi Thò-fî-thi̍t, chhiu-he Song-chú phai kì hi siên-pu liá sin-sit ke só-chhai. Kì chón-to sṳn-thien, khî chhai thìn-yen chûng hiong chung-ngìn siên-pu kóng:
[15] “Song-chú — Van-kiûn ke Ngièn-soi, Yî-set-lie̍t ke Song-ti án-ngiòng kóng: ‘Ngài oi cheu Ngài kóng-ko ke fa kong thai châi-nan chhai liá-sàng lâu chû-vì ke chhûn-chông, yîn-vi ngì-têu ngang-kiáng m̀ thâng-chhiùng Ngài ke fa.’ ”