[1] Sî-tí-kâ cho Yù-thai-vòng ke thi-kiú ngièn sṳ̍p-ngie̍t, Pâ-pí-lùn-vòng Nì-pu-kap-nì-sat tai-liâng thai-kiûn lòi pâu-vì Yâ-lu-sat-lâng.
[2] Chhai Sî-tí-kâ cho vòng ke thi sṳ̍p-yit ngièn si-ngie̍t chhû-kiú, Yâ-lu-sat-lâng sàng-chhiòng pûn kì-têu kûng vang-thet lé.
[3] Yâ-lu-sat-lâng pûn-ngìn cham-liâng ke sṳ̀, Pâ-pí-lùn-vòng só-yû ke kô-kip chiong-kôn chhiòn-phu to Chûng-mùn, chhai ke-vi khôi-thìn. Liá-têu chiong-kôn pâu-hàm: Nì-kap-Sâ-li-siet, Sâm-kap-Nì-pô, Sat-sî-kîm lâu nang-ngoi yit-ke Nì-kap-Sâ-li-siet.
[4] Yù-thai-vòng Sî-tí-kâ lâu kì ke kim-ví-chhui khon-tó liá chhìn-hìn, theu-ya thò-chhut sàng-ngoi. Kì-têu kîn-ko vòng-kiûng fâ-yèn, chéu-ko lièn-chiap lióng-san sàng-chhiòng ke thûng-lu, hiong Yok-tan sân-lak fông-hiong thò-chéu.
[5] Chúng-he Pâ-pí-lùn ke kiûn-chhui tûi kì-têu, chhai Yâ-li-kô fu-khiun ke phìn-ngièn tûi-tó Sî-tí-kâ. Kì-têu chiông kì chok hí-lòi, tai-to Pâ-pí-lùn-vòng Nì-pu-kap-nì-sat ke-vi. Ke-sṳ̀ Nì-pu-kap-nì-sat chhai Ha̍p-mâ thi-khî ke Li-pí-lâ; kì chhiu chhai ke-vi sṳ́m-phan Sî-tí-kâ.
[6] Pâ-pí-lùn-vòng chhai Li-pí-lâ tông Sî-tí-kâ ke muk-chû chhièn chhṳ̀-thet kì só-yû ke lai-é, ya chhṳ̀-thet Yù-thai só-yû ke kui-chhu̍k,
[7] yèn-heu chiông Sî-tí-kâ ke lióng-chak muk-chû yet chhut-lòi, yung thùng lien-é só-tén kì, oi tai to Pâ-pí-lùn hi.
[8] Pâ-pí-lùn-ngìn piong-fó sêu-thet vòng-kiûng lâu mìn-fòng, chhak-thet Yâ-lu-sat-lâng ke sàng-chhiòng.
[9] Chui-mî, sṳ-ví-chóng Nì-pu-sat-lâ-tan chiông liù chhai sàng-tú lâu hiong kì thèu-hòng ke ngìn chhiòn-phu chok-to Pâ-pí-lùn hi.
[10] Kì chiông ke-têu chui khiùng-khú, mò chhòi-sán ke ngìn liù chhai Yù-thai, chiông phù-thò-yèn lâu thièn-thi pûn-pûn kì-têu.
[11] Pâ-pí-lùn-vòng Nì-pu-kap-nì-sat min-lin sṳ-ví-chóng Nì-pu-sat-lâ-tan kóng:
[12] “Chiông Yâ-li-mí chhìm-lòi, hó-hó khoán-thai kì, cho-m̀-tet sông-hoi kì. Kì yû má-ke yêu-khiù, chhiu cheu kì ke yêu-khiù hi phan-lî.”
[13] Só-yî sṳ-ví-chóng Nì-pu-sat-lâ-tan lâu kô-kip chiong-kôn Nì-pu-sâ-sṳ̂-pân, Nì-kap-Sâ-li-siet, lâu Pâ-pí-lùn-vòng khì-thâ ke kôn-yèn ham ngìn hi,
[14] chiông Yâ-li-mí tui vòng-kiûng kim-ví-chhui ke kî-liù-só piong chhut-lòi, kâu-pûn Sâ-fân ke sûn-é, Â-hî-kâm ke lai-é Kî-thai-li, fûn-fu kì ôn-phài Yâ-li-mí chón vuk-hâ; Yâ-li-mí chhiu chón-hi, he̍t chhai thùng-pâu tông-chûng.
[15] Yâ-li-mí hàn pûn-ngìn koân chhai vòng-kiûng kim-ví-chhui ke kî-liù-só ke sṳ̀, Song-chú fûn-fu kì
[16] hi lâu Kú-sṳ̍t-ngìn Yî-pak-Mí-le̍t kóng: “Song-chú — Van-kiûn ke Ngièn-soi, Yî-set-lie̍t ke Song-ti án-ngiòng kóng: Ngài oi cheu Ngài siên-pu ke fa fí-me̍t liá-sàng, m̀ pûn kì fàn-yùng. Ngì voi chhîn-muk khon-tó liá-khien sṳ fat-sên.
[17] Chúng-he to ke-ngit, Ngài — Song-chú oi pó-fu ngì; ngì m̀-voi pûn-ngìn kâu-pûn ngì só-kiâng ke ngìn sú-chûng.
[18] Ngài thin-chho̍k oi pó-fu ngì ke ôn-chhiòn; ngì m̀-voi sí chhai tô-ha. Ngì yit-thin voi pó-liù sâng-miang, yîn-vi ngì sin-kho Ngài. Ngài — Song-chú án-ngiòng siên-pu lé.”