[1] Yù-thai-vòng Sî-tí-kâ phai Mâ-kî-ngâ ke lai-é Pâ-sṳ̂-fu-ngí lâu Mâ-sî-ngâ ke lai-é chi-sṳ̂ Sî-fân-ngâ hi kien Yâ-li-mí. Kì-têu yêu-khiù:
[2] “Pâ-pí-lùn-vòng Nì-pu-kap-nì-sat chang tai-liâng kiûn-chhui lòi kûng-tá liá-sàng. Chhiáng thoi ngài-têu khì-khiù Song-chú. Khó-nèn Kì voi vi ngài-têu lòi-hàng sṳ̀n-chiak, pet Nì-pu-kap-nì-sat chha̍t-thui.”
[3] Só-yî, Yâ-li-mí chiông Song-chú lâu kì kóng ke fa chón-ko kì-têu, ham kì-têu lâu Sî-tí-kâ kóng:
[4] “Song-chú — Yî-set-lie̍t ke Song-ti án-ngiòng kóng: Khon â, Ngài oi chiông ngì-têu sú-chûng nâ ke vú-hi, chhiu-he ngì-têu yung-lòi lâu sàng-ngoi pâu-vì ngì-têu ke Pâ-pí-lùn-vòng pin Pâ-pí-lùn-ngìn siông-chhṳ̀ ke vú-hi, chhióng chón-lòi tôi chhai sàng chûng-sîm.
[5] Ngài oi yung thai-nèn thai-li̍t, chhai pot-at, fat-khién lâu thai su-hi chṳ̂-ha chhûn-sú, chhîn-sṳ̂n kûng-kit ngì-têu.
[6] Ngài oi kûng-kit liá sàng-tú só-yû ke ngìn-mìn; ngìn lâu thung-vu̍t chhiòn-phu voi pot-vûn sí-thet.
[7] Yù-thai-vòng Sî-tí-kâ â, lun-tó ngì, ngì ke kôn-yèn lâu kîn-ngiam ko chan-chên, kî-fông lâu pot-vûn hàn chhûn-tó ke ngìn-mìn, Ngài chhiòn-phu oi kâu-pûn Pâ-pí-lùn-vòng Nì-pu-kap-nì-sat lâu sióng-oi chiông ngì-têu chhṳ̀ chhiang-chhiang ke thi̍t-ngìn. Nì-pu-kap-nì-sat-vòng m̀-voi lìn-mén ngì-têu, thùng-chhìn ngì-têu; kì voi chiông ngì-têu ke miang sû-thet. Ngài — Song-chú án-ngiòng siên-pu lé.”
[8] Chiap-tén, Song-chú fûn-fu Yâ-li-mí tui ngìn-mìn án-ngiòng kóng: “Khon nâ, Ngài — Song-chú chiông sâng-lu lâu sí-lu pài chhai ngì-têu mien-chhièn, pûn ngì-têu tho̍k.
[9] Liù chhai liá sàng-tú ke ngìn na-m̀-he chan-sí, chhiu-he ngo-sí ya-he pot-vûn lòi sí. Chúng-he to sàng-ngoi hiong pâu-vì ngì-têu ke Pâ-pí-lùn-ngìn thèu-hòng ke, m̀-voi sí, voi yû kî-fi kiu chhṳ-kâ ke miang.
[10] Ngài kiet-thin oi chit-fa̍t liá-chho sàng, kong-fo mò kong-fuk. Ngài oi chiông kì kâu-pûn Pâ-pí-lùn-vòng; kì oi yung fó sêu-thet liá-chho sàng. Ngài — Song-chú án-ngiòng siên-pu lé.”
[11] Song-chú fûn-fu Yâ-li-mí án-ngiòng lâu Thai-ví ke heu-thoi — Yù-thai-vòng ke kâ-chhu̍k kóng: “Ngì-têu oi chu-yi thâng Ngài — Song-chú ke fa. Ngì-têu tak chêu-sṳ̀n oi chṳp-hàng kûng-chṳn ke sṳ́m-phan, tui khî-fu ngìn ke sú-chûng kié-kiu pûn-ngìn ap-pet ke ngìn. Na-mò, ngì-têu ke fái hàng-vì voi ngiâ Ngài fat-fó, mò-ngìn nèn tá-vû.
[13] Yâ-lu-sat-lâng â, Ngài oi tui-fu ngì! Ngì hí chhai sân-lak lâu kô-ngièn tông-chûng ke sân-táng, chhiong ngàm-sa̍k án-ngiòng khî chhai-chhai. Ngì chhṳ-khoâ mò-ngìn nèn kûng-tá ngì, chin-ngi̍p ngì ke fòng-sien;
[14] chúng-he Ngài oi yîn-vi ngì ke hàng-vì chit-fa̍t ngì. Ngài oi chhai vòng-kiûng chûng piong-fó, fó voi sêu-thet chû-vì ke yit-chhiet. Ngài — Song-chú án-ngiòng siên-pu lé.”