[1] Pâ-pí-lùn-vòng Nì-pu-kap-nì-sat lâu kì ke kiûn-chhui, pin kì só thúng-chhṳ kok-koet tak-chhu̍k ke kiûn-chhui chhai vì-kûng Yâ-lu-sat-lâng lâu chû-vì sàng-chṳ́n ke sṳ̀, Song-chú hiong Yâ-li-mí kóng-fa.
[2] Song-chú — Yî-set-lie̍t ke Song-ti fûn-fu kì hi lâu Yù-thai-vòng Sî-tí-kâ kóng: “Ngài — Song-chú oi chiông liá-sàng kâu-pûn Pâ-pí-lùn-vòng; kì oi piong-fó sêu-sàng.
[3] Ngì chhie̍t-tui chéu m̀-thet; ngì voi pûn-ngìn chok-tó, kâu chhai Pâ-pí-lùn-vòng sú-chûng. Ngì voi chhîn-muk khon-tó kì, kì voi mien-tui-mien lâu ngì kóng-fa, yèn-heu ngì yit-thin voi pûn-ngìn tai-to Pâ-pí-lùn hi.
[4] “Yù-thai-vòng Sî-tí-kâ â, ngì hàn-oi thâng Ngài — Song-chú ke fa! Lun-tó ngì, Ngài lâu ngì kóng: Ngì m̀-voi pûn-ngìn chhṳ̀-sí;
[5] ngì voi phìn-ôn ko-sṳ̂n. Ngìn voi mài-chong ngì, vi ngì sêu hiông-liau, chhiong ngì ke chú-siên, chhiu-he ke-têu chhai ngì yî-chhièn ke vòng, yû-ngìn mài-chong kì-têu, vi kì-têu sêu hiông-liau khiung-yong. Ngìn voi vi ngì chhong ôi-kô kóng: ‘Âi-châi! Ngài-têu ke vòng â!’ Ngài — Song-chú án-ngiòng siên-pu lé.”
[6] Só-yî, siên-tî Yâ-li-mí chhai Yâ-lu-sat-lâng chiông liá-têu fa lâu Yù-thai-vòng Sî-tí-kâ kóng.
[7] Ke-sṳ̀, Pâ-pí-lùn-vòng tai-liâng ke kiûn-chhui tú-hó chhai vì-kûng Yâ-lu-sat-lâng lâu Yù-thai chhûn-tó ke lióng-chho sàng — Lâ-kit lâu Â-sî-kâ, yîn-vi Yù-thai yû sat fòng-ví ke sàng chṳ́ chhûn-tó liá lióng-chho.
[8] Sî-tí-kâ-vòng sṳt lâu Yâ-lu-sat-lâng ngìn-mìn li̍p-yok, fat-chhut ‘Chhṳ-yù ke Siên-ngièn’.
[9] Hî-pak-lòi nù-chhòi, mò-lun nàm-ńg, chhiòn-phu oi piong-chéu, cho-m̀-tet sṳ́ ngim-hò yit-ke Yù-thai thùng-pâu cho nù-chhòi.
[10] Só-yû chhiâm-yok ke ngìn-mìn lâu kôn-yèn chhiòn-phu thùng-yi piong chhṳ-kâ ke nù-chhòi chéu, cho-m̀-tet chai kón-chṳ kì-têu. Liá-têu ngìn chhiòn-phu yû sú-yok, chiông nù-chhòi piong-chéu.
[11] Chúng-he heu-lòi kì-têu yu pien chú-yi, chiông ke-têu nù-chhòi chok chón-lòi, chai khiòng-pet kì-têu cho nù-chhòi.
[12] Só-yî, Song-chú yu hiong Yâ-li-mí kóng-fa.
[13] Song-chú — Yî-set-lie̍t ke Song-ti ham kì lâu ngìn-mìn án-ngiòng kóng: “Ngài tui Âi-khi̍p — ngì-têu chú-siên cho nù-chhòi ke só-chhai — chiông kì-têu chhióng-kiu chhut-lòi ke sṳ̀, lâu kì-têu li̍p-yok, kóng:
[14] ‘Na-he yû yit-ke Hî-pak-lòi thùng-pâu mai-pûn ngì, fu̍k-sṳ ngì liuk-ngièn, thi-chhit ngièn ngì oi pûn kì chhṳ-yù chhut-hi.’ Chúng-he ngì-têu ke chú-siên m̀-tap Ngài, m̀-thâng Ngài ke fa.
[15] Liá-ha, ngì-têu yí-kîn fí-kói, cho Ngài só fôn-hí ke sṳ, tak-sà hiong thùng-pâu siên-pu oi pûn só-yû ke ngìn chhṳ-yù, yu lòi-to Ngài mien-chhièn, chhai kin-pai Ngài ke sṳn-thien tú li̍p-yok.
[16] Chúng-he ngì-têu yu kói-pien chú-yi, vú-yu̍k Ngài. Ngì-têu chiông ke-têu pûn-ngìn piong-chéu, tet-tó chhṳ-yù ke nù-chhòi chok chón-lòi, chai pet kì-têu cho nù-chhòi.
[17] “Só-yî, Ngài — Song-chú kóng: Ngì-têu mò fu̍k-chhiùng Ngài, mò cheu hiong thùng-pâu, lìn-sa só siên-pu ke pûn só-yû ke ngìn chhṳ-yù. Khon â, Ngài hiong ngì-têu siên-pu nang-ngoi yit-chúng ke ‘chhṳ-yù’, Ngài oi yù-chhai ngì-têu tù-tó chan-chên, pot-vûn, lâu kî-fông lòi-sí. Ngài oi sṳ́ thiên-ha van-koet khon-tó ngì-têu só tù-tó ke lòi chho̍k-kiâng.
[18] Yù-thai lâu Yâ-lu-sat-lâng ke liâng-chhiu, kiûng-thìn ke kôn-yèn, chi-sṳ̂, pin só-yû liá-thi ke chung-mìn, sṳt lâu Ngài li̍p-ko yok; kì-têu chiông se ngiù-kú pho-cho lióng-sak, tui tûng-ông hàng ko-hi, péu-sṳ li̍p-yok sṳ̀n-li̍p. Chúng-he kì-têu pho-fái Ngài ke yok, mò chûn-sú liá-yok ke kûi-thin, só-yî Ngài oi chiông kì-têu pho-khôi, chhiong kì-têu pho-khôi se ngiù-kú yit-yong.
[20] Ngài oi chiông kì-têu kâu-pûn sióng-oi chhṳ̀ kì-têu ke thi̍t-ngìn sú-chûng; kì-têu ke sṳ̂n-sṳ̂ voi sàng-cho fî-niâu lâu chéu-chhu ke sṳ̍t-vu̍t.
[21] Ngài oi chiông Yù-thai-vòng Sî-tí-kâ lâu kì ke kôn-yèn chhiòn-phu kâu-pûn sióng-oi chhṳ̀ kì-têu ke thi̍t-ngìn sú-chûng; Ngài oi chiông kì-têu kâu-pûn liá-ha chhiam-sṳ̀ chha̍t-thui ke Pâ-pí-lùn-vòng kiûn-chhui sú-chûng.
[22] Ngài oi ha-lin Pâ-pí-lùn kiûn-chhui khôi chón-lòi liá-sàng. Kì-têu voi kûng-kit, cham-liâng, sêu-thet liá-sàng. Ngài oi sṳ́ Yù-thai tak-chho sàng-sṳ chhiòn-phu fông-fi, mò-ngìn he̍t. Ngài — Song-chú án-ngiòng siên-pu lé.”