[1] Pâ-pí-lùn-vòng Nì-pu-kap-nì-sat li̍p Yok-sî-â ke lai-é Sî-tí-kâ thoi Yok-ngâ-kin ke lai-é Yok-ngâ-kîn cho Yù-thai-vòng.
[2] Chúng-he Sî-tí-kâ lâu kì ke kôn-yèn, pin ngìn-mìn chhiòn-phu m̀ thâng-chhiùng Song-chú fûn-fu siên-tî Yâ-li-mí kóng ke fa.
[3] Sî-tí-kâ-vòng phai Sṳ-li-mí-ngâ ke lai-é Yù-kap lâu Mâ-sî-ngâ ke lai-é chi-sṳ̂ Sî-fân-ngâ lòi kien siên-tî Yâ-li-mí, kóng: “Chhiáng ngì vi ngài-têu hiong Song-chú — ngài-têu ke Song-ti khì-tó.”
[4] Ke-sṳ̀, Yâ-li-mí hàn-màng pûn-ngìn koân-ngi̍p kâm-ngiu̍k, cho-tet chhṳ-yù chhai mìn-kiên chhut-ngi̍p.
[5] Ke-yông-sṳ̀, Pâ-pí-lùn ke kiûn-chhui pâu-vì Yâ-lu-sat-lâng, chúng-he kì-têu yit thâng-tó Âi-khi̍p-vòng ke kiûn-chhui yí-kîn tui Âi-khi̍p chhut-fat ke sêu-sit, chhiu tui Yâ-lu-sat-lâng chha̍t-thui.
[6] Song-chú — Yî-set-lie̍t ke Song-ti fûn-fu siên-tî Yâ-li-mí,
[7] hi lâu ke chhâi-phai kì khiù-mun Song-ti ke Yù-thai-vòng Sî-tí-kâ án-ngiòng kóng: “Âi-khi̍p-vòng ke kiûn-chhui chhut-fat lòi pông-chhu ngì-têu, chúng-he yit-thin voi pan-lu to-chón Âi-khi̍p pún-thi hi.
[8] Pâ-pí-lùn ke kiûn-chhui voi to-chón-lòi kûng-sàng; kì-têu voi cham-liâng liá-sàng, piong-fó chiông sàng sêu-thet.
[9] Ngài — Song-chú kín-ko ngì, m̀-hó phien chhṳ-kâ, láu-tó Pâ-pí-lùn-ngìn yit-thin voi lì-khôi; khì-sṳ̍t kì-têu yit-thin m̀-voi lì-khôi.
[10] Chhiu-son ngì tá-yàng lòi kûng-kit ngì ke Pâ-pí-lùn kiûn-chhui, chhûn-tó soi chhai yàng-tú ke sông-pîn thin-thin, kì-têu hàn-he voi hong-hí-lòi, piong-fó sêu-thet liá-sàng.”
[11] Yîn-vi Âi-khi̍p kiûn-chhui kín-lòi kín-khiûn, Pâ-pí-lùn kiûn-chhui chhiu tui Yâ-lu-sat-lâng chha̍t-chéu,
[12] só-yî Yâ-li-mí chún-phi lì-khôi Yâ-lu-sat-lâng to Phien-ngâ-mén thi-fông hi, chhai chhîn-chhu̍k chûng sṳ̀n-chiap kì pûn-tó ke sán-ngia̍p.
[13] Chúng-he, Yâ-li-mí lòi-to Phien-ngâ-mén-mùn ke sṳ̀, Ha̍p-nâ-nì-â ke sûn-é, Sṳ-li-mí-ngâ ke lai-é, chóng-mùn ke chhui-chóng Yî-li-ngâ chok-tó kì. Kì lâu siên-tî Yâ-li-mí kóng: “Ngì sióng-oi hiong Pâ-pí-lùn-ngìn thèu-hòng, he-mò!”
[14] Yâ-li-mí en-kóng: “M̀-he, ngài m̀-he oi hi thèu-hòng Pâ-pí-lùn-ngìn!” Chúng-he Yî-li-ngâ m̀-thâng, chhiu chiông Yâ-li-mí chok hí-lòi, kâu-pûn kôn-yèn.
[15] Ke-têu kôn-yèn hiong Yâ-li-mí thai fat-khién, ham ngìn tá kì, chiông kì koân chhai kiûng-thìn sû-ki Yok-nâ-tân ke vuk-tú; liá-kiên vuk-sa yí-kîn kói-cho kâm-ngiu̍k.
[16] Yâ-li-mí pûn-ngìn koân chhai thi-lò, koân chhin-kiú.
[17] Heu-lòi, Sî-tí-kâ-vòng phai-ngìn tai Yâ-li-mí to kì ke-vi hi. Kì chhai vòng-kiûng sṳ̂-ha mun Yâ-li-mí: “Yû Song-chú ke sin-sit mò?” Yâ-li-mí en-kóng: “Yû! Ngì voi pûn-ngìn kâu chhai Pâ-pí-lùn-vòng ke sú-chûng.”
[18] Chiap-tén, Yâ-li-mí mun Sî-tí-kâ-vòng: “Ngài má-ke só-chhai tet-chhui ngì lâu ngì ke kôn-yèn ya-he ngìn-mìn nè? Ngì-têu cho-má-ke chiông ngài koân chhai kâm-ngiu̍k tú nè?
[19] Ke-têu yi-ngièn Pâ-pí-lùn-vòng chhie̍t-tui m̀-voi lòi kûng-tá ngì-têu, m̀-voi lòi chhîm-cham liá koet-kâ ke siên-tî liá-ha chhai nai-vi nè?
[20] Ngài ke chú, ngài ke vòng â, khiù ngì thâng ngài chhiáng-khiù, m̀-hó chiông ngài sung-chón sû-ki Yok-nâ-tân ke vuk-hâ hi, miên-tet ngài sí chhai ke-vi.”
[21] Só-yî, Sî-tí-kâ-vòng min-lin chiông Yâ-li-mí koân chhai kim-ví-chhui ke kî-liù-só; kì liù chhai ke-vi, ngit-ngit pûn-tó yit-te tui cho-piáng-kiê sung-lòi ke piáng, chhṳ̍t-to sàng-tú ke piáng chhiòn-phu sṳ̍t chhiang-chhiang. Án-ngiòng, Yâ-li-mí chhiu liù chhai kim-ví-chhui ke kî-liù-só.