[1] Yî-set-lie̍t-ngìn â, ngì-têu oi thâng Song-chú hiong ngì-têu kóng ke fa.
[2] Song-chú án-ngiòng kóng: Ngì-têu m̀-hó ho̍k lie̍t-koet ke fûng-siu̍k si̍p-koan, ya m̀-hó chhiong lie̍t-koet án-ngiòng pûn thiên-táng ke van-siong hak-tó.
[3] Kì-têu só sin-fung ke chhiòn he hî-khûng, put-ko he tui su-nà chûng chám hâ-lòi ke su-é, muk-siong sṳ̂-fu yung tô-é tiâu-khiet ke chok-phín,
[4] yèn-heu siông-kîm siông-ngiùn lòi tá-pan, yung tâng-é lâu chhùi-è lòi ku-thin, sṳ́ kì-têu m̀-voi vang-thet.
[5] Kì-têu ke ngiéu-siong chhiong koâ-thièn tú yung vò-kón chat ke ngìn: Kì-têu m̀-voi kóng-fa, m̀-voi hàng-lu, oi ngìn kông-tén hàng. Só-yî m̀-sṳ́ kiâng kì-têu! Kì-têu m̀-voi kong-châi, ya mò nèn-li̍t kong-fuk.
[6] Song-chú â, mò-ngìn lâu Ngì pí é-tet; Ngì tông ví-thai, Ngì ke sṳn-miàng thai-yû nèn-li̍t.
[7] Ngì he van-koet ke kiûn-vòng, má-ngìn kám m̀ kin-vi? Ngì yin-kôi su chûn-kin. Lie̍t-koet ke chṳ-fi ngìn lâu kiûn-vòng mò yit-sà lâu Ngì pí é-tet.
[8] Kì-têu chhiòn-phu ngong-ngong tong-tong; kì-têu tui su-é khat ke ngiéu-siong liâng-su hî-ká ke kau-hiun.
[9] Kì-têu ke ngiéu-siong siông-tén tui Thâ-sṳ̂ chin-khiéu ke ngiùn-è, lâu tui Vû-fap chin-khiéu ke kîm-é, chhiòn-phu he muk-siong lâu ngiùn-siong ke sú-kûng. Kì-têu chok làm-set, chṳ́-set ke sâm-fu, chhiòn-phu he sú-ngi chhin-hó ke ngìn chhiak ke.
[10] Song-chú â, chṳ́-yû Ngì he chṳ̂n-sṳ̀n, he yún-sên ke Song-ti, yún-yén ke kiûn-vòng. Ngì yit fat-khién, thai-thi chhiu kín-chûn; Ngì yit su-hi, van-koet chhiu khî m̀-he̍t.
[11] Ngài ke chṳ́-mìn â, ngì-têu oi hiong kì-têu siên-ko, ngiéu-siong m̀-he chhóng-chho thiên-thi ke sṳ̀n; kì-têu yit-thin voi tui thiên-thi kiên sêu-me̍t.
[12] Song-chú yung nèn-li̍t chhóng-chho thai-thi; Kì yung chṳ-fi kien-li̍p sṳ-kie, yung chhûng-mìn chán-khôi thiên-khûng.
[13] Kì yit-hióng lùi-kûng, thiên-khûng ke súi chhiu ho-ho-kún; Kì sṳ́ yùn tui thi-phìn-sien chhung-tén sông. Kì sṳ́ ngiap-lang chhai yí-chûng fat-kông; Kì sṳ́ fûng tui chhṳ-kâ ke chhông-khu chhôi-chhut.
[14] Ngìn tui liá kông-kín chhiòn-phu ngong-tong, mò chṳ-sṳt; tá-kîm sṳ̂-fu chho ngiéu-siong, fán-chón mò mien-chṳ́, yîn-vi kì-têu chho ke sṳ̀n-mìn he ká ke, m̀-voi théu-hi.
[15] Ngiéu-siong chhiòn he hî-khûng, he tông kien-seu ke tûng-sî; Song-chú sṳ́m-phan ke sṳ̀, kì-têu chhiòn-phu voi sêu-me̍t.
[16] Ngâ-kok ke Song-ti m̀-he chhiong liá-têu ngiéu-siong: Kì chhóng-chho van-vu̍t, kién-sién Yî-set-lie̍t cho chhṳ-kâ ke chṳ́-mìn. Song-chú — Van-kiûn ke Ngièn-soi he Kì ke miàng.
[17] Su pâu-vì ke Yâ-lu-sat-lâng-ngìn â, chiông ngì-têu oi tai-chéu ke tûng-sî sû-hó.
[18] Yîn-vi Song-chú liá-ha oi chiông ngì-têu tui liá thú-thi fin chhut-hi. Kì oi kong châi-nan chhai ngì-têu sṳ̂n-hong, ngì-têu voi pûn-ngìn chok-chéu. Song-chú án-ngiòng siên-pu lé.
[19] Yâ-li-mí thoi-péu Yâ-lu-sat-lâng-ngìn kóng: Chhám lé! Ngài ngióng-voi chho̍k-sông to án ngiàm-chhung? Chúng-he ngài ya voi sióng: “Liá ke thung-khú he ngài yit-thin oi ngiûn-su ke.”
[20] Ngài ke chong-phùng pûn-ngìn pho-fái, chong-phùng ke sok-è chhiòn-phu thôn-thet. Chṳ́-ńg lì-khôi ngài chéu chhiang-chhiang lé; m̀-voi chai yû-ngìn lòi lâu ngài tap chong-phùng, ya mò-ngìn lòi lâu ngài tiau pu-liàm.
[21] Yîn-vi ngài-têu ke liâng-chhiu mò chṳ-sṳt; kì-têu m̀ chhìm-khiù Song-chú. Só-yî, kì-têu sṳt-phai, ngìn-mìn chhiòn-phu si-san thet.
[22] Thâng â! Yû fûng-sâng chhòn-lòi kóng: “Yû khon-tó yit thai-khiùn kiûn-chhui tui pet-fông lòi, voi sṳ́ Yù-thai tak-chak sàng-sṳ fông-thet, sàng-cho yâ-kiéu ke teu.”
[23] Song-chú â, ngài tî mò-ngìn nèn kiet-thin chhṳ-kâ ke miang-yun; mò-ngìn nèn ôn-phài chhṳ-kâ ke chhièn-thù.
[24] Song-chú â, khiù Ngì cheu kûng-tong lòi kón-kau ngài-têu; khiù Ngì m̀-hó chhai fat-khién chûng sêu-me̍t ngài-têu.
[25] Khiù Ngì chiông thai fat-khién tó chhai m̀ sṳ̀n-ngin Ngì ke lie̍t-koet, lâu m̀ kin-pai Ngì ke ngìn sṳ̂n-song. Yîn-vi kì-têu chhṳ̀ Ngâ-kok ke heu-thoi; kì-têu chha̍t-tái fí-me̍t ngài-têu, sṳ́ ngài-têu ke kâ-yèn fông-fi.