[1] Sî-tí-kâ cho Yù-thai-vòng ke thi-sṳ̍p ngièn, ya he Nì-pu-kap-nì-sat-vòng thúng-chhṳ Pâ-pí-lùn ke thi sṳ̍p-pat ngièn, Song-chú hiong Yâ-li-mí kóng-fa.
[2] Ke-sṳ̀, Pâ-pí-lùn-vòng ke kiûn-chhui tú-hó tông vì-kûng Yâ-lu-sat-lâng, siên-tî Yâ-li-mí koân chhai Yù-thai vòng-kiûng kim-ví-chhui ke kî-liù-só.
[3] Yù-thai-vòng Sî-tí-kâ chiông kì koân hí-lòi, chit-phi kì kóng: “Ngì cho-má-ke yi-ngièn, Song-chú án-ngiòng kóng: ‘Ngài oi chiông liá-sàng kâu chhai Pâ-pí-lùn-vòng sú-chûng, pûn kì cham-liâng.
[4] Yù-thai-vòng Sî-tí-kâ mò phan-fap tui Pâ-pí-lùn-ngìn ke sú-chûng chéu-thet; yit-thin voi chiông kì kâu chhai Pâ-pí-lùn-vòng ke sú-chûng, sṳ́ kì mien-tui-mien lâu Nì-pu-kap-nì-sat kóng-fa.
[5] Sî-tí-kâ voi pûn-ngìn tai-to Pâ-pí-lùn, liù chhai ke-vi, chhṳ̍t-to Ngài chit-fa̍t kì ke sṳ̀. Na-he ngì-têu lâu Pâ-pí-lùn-ngìn siông-chhṳ̀, ngì-têu ya mò phan-fap tá-yàng. Ngài — Song-chú án-ngiòng siên-pu lé.’ ”
[6] Song-chú lâu ngài kóng,
[7] ngâ-suk Sâ-liùng ke lai-é Ha̍p-nâ-me̍t voi lòi khon ngài, oi ngài chiông kì chhai Â-nâ-thut-sàng ke-te thièn-thi mâi hâ-lòi; yîn-vi ngài he kì ke chṳ-chhîn, ngài yû su̍k-chón-lòi ke ngi-vu lâu mâi ke khièn-li.
[8] Ton-chṳ̂n, chhiu-chhiong Song-chú kóng ke, ngâ-suk ke lai-é Ha̍p-nâ-me̍t lòi-to kim-ví-chhui ke kî-liù-só, lâu ngài kóng: “Ngài chhai Phien-ngâ-mén thi-khî Â-nâ-thut ke-te thi, khiù ngì mâi hâ-lòi, yîn-vi ngì yû ki-sṳ̀n lâu su̍k-chón-lòi ke khièn-li.” Án-ngiòng, ngài chhiu tî liá-khien sṳ chhiu-he Song-chú kóng ke fa.
[9] Ngài chhiu hiong ngâ-suk ke lai-é Ha̍p-nâ-me̍t mâi Â-nâ-thut-sàng ke-te thi, chhṳn sṳ̍p-chhit te ngiùn-è pûn kì.
[10] Ngài chhiáng ngìn cho-chṳn, chhiâm thi-khie, fûng-hó, chhṳn ngiùn-è.
[11] Yèn-heu, ngài chiông yû phêu-thì lâu thiàu-khien ke thi-khie, yit-fun fûng-hó, yit-fun tá-khôi,
[12] chhai ngâ-suk ke lai-é Ha̍p-nâ-me̍t lâu chhiâm-miàng chhai thi-khie táng-kô ke chṳn-ngìn, pin kim-ví-chhui kî-liù-só tî-poi só-yû Yù-thai-ngìn mien-chhièn, kâu-pûn Mâ-sî-ngâ ke sûn-é Nì-li-â ke lai-é Pâ-liu̍k.
[13] Ngài chhai kì-têu mien-chhièn hiong Pâ-liu̍k kóng:
[14] “Song-chú — Van-kiûn ke Ngièn-soi, Yî-set-lie̍t ke Song-ti min-lin ngì chiông liá lióng-fun thi-khie, fûng-hó ke lâu tá-khôi ke chhiòn-phu khong chhai fî-âng tú, hó pó-chhùn kiú-kiú.
[15] Yîn-vi Song-chú — Van-kiûn ke Ngièn-soi, Yî-set-lie̍t ke Song-ti án-ngiòng kóng-ko, ngìn voi chhùng-sîn chhai liá só-chhai mâi-vuk, mâi-thièn lâu phù-thò-yèn.”
[16] Ngài chiông thi-khie kâu-pûn Nì-li-â ke lai-é Pâ-liu̍k yî-heu, chhiu hiong Song-chú khì-tó kóng:
[17] “Chṳ-kô ke Song-chú â, Ngì yung chhṳ-kâ ke thai-nèn thai-li̍t chhóng-chho thiên-thi; tui Ngì lòi kóng, mò cho m̀-tó ke sṳ.
[18] Ngì sṳt yung put-pien ke chhṳ̀-oi thung-siak chhiên-van ngìn; chúng-he Ngì ya yîn-vi â-pâ só-fam ke chhui po-yin chṳ́-ńg. Ngì he chhiòn-nèn, chṳ-thai ke Song-ti; Ngì ke miàng he Song-chú — Van-kiûn ke Ngièn-soi.
[19] Ngì ke kie-va̍k ví-thai, Ngì ke hàng-sṳ thai-yû khièn-nèn; Ngì muk chṳm-chṳm khon ngìn ke yit-kí yit-thung, cheu tak-sà só-hàng só-cho po-yin kì.
[20] Ngì sṳt chhai Âi-khi̍p hàng sṳ̀n-chiak khì-sṳ; Ngì ya chhai Yî-set-lie̍t lâu lie̍t-koet tông-chûng hàng sṳ̀n-chiak khì-sṳ chhṳ̍t-to kîm-pû-ngit. Só-yî, Ngì chhai sṳ-kiên yû thai miàng-sâng.
[21] Ngì yung sṳ̀n-chiak khì-sṳ sṳ́ ngài-têu ke thi̍t-ngìn kiâng-to pi̍t-pi̍t-chhat, yu yung thai-nèn thai-li̍t tai Ngì ke chṳ́-mìn Yî-set-lie̍t chhut Âi-khi̍p.
[22] Ngì chûn-sú chhṳ-kâ hiong kì-têu chú-siên só-li̍p ke yok, chiông liá liù-nen-lâu-me̍t tông-phì ke thú-thi su-pûn kì-têu.
[23] Chúng-he kì-têu yit ngi̍p-lòi, tet-tó liá-te thú-thi yî-heu, chhiu m̀ sun-chhiùng Ngì ke min-lin, m̀ chûn-hàng Ngì ke kau-hiun. Ngì min-lin kì-têu cho ke, kì-têu chhiòn-phu m̀ cho, só-yî Ngì sṳ́ kì-têu su liá yit-chhiet ke châi-nan.
[24] “Khon â, Pâ-pí-lùn-ngìn yí-kîn hí-hó kûng-sàng ke thú-tôi, khôi-sṳ́ kûng-tá. Liá-sàng voi yîn-vi chan-chên, kî-fông, lâu pot-vûn lòi ham-lo̍k chhai thi̍t-ngìn sú-chûng. Ngì só kóng ke yí-kîn sṳ̍t-hien, Ngì ya chhîn-muk khon-tó lé.
[25] Chṳ-kô ke Song-chú â, sûi-yèn Pâ-pí-lùn-ngìn chhâ-m̀-tô voi kûng-hâ liá-sàng, Ngì hàn-he min-lin ngài chhai chṳn-ngìn mien-chhièn yung ngiùn-è lòi-mâi ke-te thièn-thi.”
[26] Só-yî Song-chú tui ngài kóng:
[27] “Ngài he Song-chú, he chhiòn ngìn-lui ke Song-ti. Tui Ngài lòi kóng kám-yû cho m̀-tó ke sṳ?
[28] Ngài oi chiông liá-sàng kâu chhai Pâ-pí-lùn-vòng Nì-pu-kap-nì-sat lâu kì tai-liâng ke kiûn-chhui sú-chûng, kì-têu voi cham-liâng liá-sàng.
[29] Kûng-sàng ke Pâ-pí-lùn-ngìn voi ngi̍p-sàng, piong-fó sêu liá-sàng, lièn Yî-set-lie̍t-ngìn chhai vuk-táng hiong Pâ-li̍t sêu-ko hiông, hiong sṳ̀n-mìn hien-ko chiú lòi-ngiâ Ngài fat-khién ke-têu vuk-sa, chhiòn-phu voi sêu-thet.
[30] Yî-set-lie̍t-ngìn lâu Yù-thai-ngìn chhiùng-se yit-chhṳ̍t cho Ngài khon-cho fái ke sṳ; kì-têu tông-voi ngiâ Ngài fat-khién.
[31] Tui Yâ-lu-sat-lâng kien-sàng yî-lòi, ngìn-mìn ya yit-chhṳ̍t ngiâ Ngài su-hi, thai fat-khién. Ngài yí-kîn kiet-thin fí-me̍t liá-sàng;
[32] yîn-vi Yî-set-lie̍t lâu Yù-thai ke ngìn-mìn lûng-chúng cho tông sià-ok ke sṳ ngiâ Ngài fat-khién, lièn kì-têu ke kiûn-vòng, liâng-chhiu, chi-sṳ̂, siên-tî ya khiung-yong; thi̍t-phe̍t he Yù-thai-ngìn lâu Yâ-lu-sat-lâng-ngìn.
[33] Kì-têu phoi-ngia̍k Ngài, pien-mien m̀-ngin Ngài; Ngài chó chhiu kâu liáu yu kâu, chúng-he kì-têu m̀-thâng, m̀-hén su-kau.
[34] Kì-têu chiông Ngài tông-nâu ke ngiéu-siong piong chhai kin-pai Ngài ke sṳn-thien tú, lòi tá-lá-sap sṳn-thien.
[35] Kì-têu chhai Hiûn-nun-chṳ́ sân-lak vi Pâ-li̍t chho chi-thàn, nâ chhṳ-kâ ke chṳ́-ńg sêu-pûn sià-sṳ̀n Mô-lo̍k. Ngài pin mò min-lin kì-têu cho liá-têu sṳ, ya mò sióng-tó kì-têu voi cho liá án sià-ok ke sṳ, hoi Yù-thai ngìn-mìn fam-chhui.”
[36] Song-chú — Yî-set-lie̍t ke Song-ti tui ngài án-ngiòng kóng: “Yâ-li-mí â, ngì-têu kóng chan-chên, kî-fông, lâu pot-vûn voi hoi liá-sàng ham chhai Pâ-pí-lùn-vòng sú-chûng. Liá-ha, ngì chu-yi thâng Ngài kóng.
[37] Ngài sṳt chhai pot-at, su-hi, lâu thai fat-khién chûng chiông Ngài ke chṳ́-mìn kiuk-to kok-koet hi. Liá-ha Ngài oi tui ke-têu só-chhai chiông kì-têu chhi-si̍p hí-lòi, thu kì-têu chón-lòi, chhai liá só-chhai ôn-kî lo̍k-ngia̍p.
[38] Ke-sṳ̀, kì-têu oi cho Ngài ke chṳ́-mìn, Ngài oi cho kì-têu ke Song-ti.
[39] Ngài oi su-pûn kì-têu chôn-sîm yit-yi, yit-sên-ngìn kin-vi Ngài, sṳ́ kì chhṳ-kâ lâu chṳ́-sûn tet-tó hen-fuk.
[40] Ngài oi lâu kì-têu li̍p yún-yén ke yok, yit-chhṳ̍t su-fuk pûn kì-têu, sṳ́ kì-têu chôn-sîm kin-vi Ngài, m̀-voi chai lì-khôi Ngài.
[41] Ngài voi fôn-fôn hí-hí su-fuk pûn kì-têu, sṳ̍t-sṳ̍t chhai-chhai, chhiòn-sîm chhiòn-yi chiông kì-têu chhai liá-te thú-thi song tang-kîn.”
[42] Song-chú án-ngiòng kóng: “Ngài sṳt pûn liá chṳ́-mìn su liá yit-chhiet ke thai châi-nan, Ngài ya oi cheu Ngài ke yin-hí chiông só-yû hen-fuk su-pûn kì-têu.
[43] Ngì-têu kóng, liá-te thú-thi voi fông-thet, mò ngìn, ya mò thung-vu̍t; yí-kîn kâu chhai Pâ-pí-lùn-ngìn sú-chûng. Chúng-he Ngài kóng, chiông-lòi voi yû-ngìn chhùng-sîn chhai liá só-chhai mâi thièn-thi.
[44] Ngìn oi chhai Phien-ngâ-mén thi-khî tak só-chhai, Yâ-lu-sat-lâng si chû-vì ke sàng-sṳ, Yù-thai tak-sàng, sân-khî ke hiông-chṳ́n, sî-phién kô-ngièn ke chhûn-chông, lâu Yù-thai nàm-phu tak sàng-sṳ, yung ngiùn-è mâi-mai thièn-thi, chhiâm thi-khie, chém yin-é fûng thi-khie, chhiáng ngìn cho-chṳn. Ngài oi sṳ́ Ngài ke chṳ́-mìn chhùng-sîn tet-tó kì-têu ke sán-ngia̍p. Ngài — Song-chú án-ngiòng siên-pu lé.”