[1] Song-chú tui Yâ-li-mí kóng:
[2] “Ngì hong hí-lòi, to ke sêu-fì sṳ̂-fu ke vuk-hâ hi; chhai ke-vi Ngài yû fa fûn-fu ngì.”
[3] Só-yî ngài to sêu-fì sṳ̂-fu ke vuk-hâ hi. Ngài khon-tó kì tú-tú chón-tén lin-phàn chhai ke-vi cho-se.
[4] Kì yung nài cho fì-è, cho fái-thet ke sṳ̀, kì chhiu yung ke-te nài cho phe̍t ke yung-phín, vàn-chhiòn cheu chhṳ-kâ ke yi-sṳ hi-cho.
[5] Heu-lòi, Song-chú yu tui ngài kóng:
[6] “Kám-kóng Ngài cho-m̀-tet cheu sêu-fì sṳ̂-fu ke fông-fap lòi tui-thai ngì-têu Yî-set-lie̍t-ngìn he-mò? Ngì-têu chhai Ngài sú-chûng chhiu-chhiong nài chhai sêu-fì sṳ̂-fu ke sú-chûng.
[7] Mò-lun má-ke sṳ̀-chiet, Ngài siên-pu oi pâng-chhut, chhak-thet, ya-he fí-me̍t yit-ke koet-kâ,
[8] na-he ke koet-kâ lì-khôi chhui-ok, Ngài chhiu voi fì-sîm chón-yi, m̀ kong châi-nan.
[9] Mò-lun má-ke sṳ̀-chiet, Ngài siên-pu oi châi-chung, kien-li̍p yit-ke koet-kâ,
[10] na-he ke koet-kâ m̀ fu̍k-chhiùng Ngài, chôn-mùn cho fái-sṳ, Ngài chhiu voi kói-pien sîm-yi, m̀ chiông Ngài só-kóng ke fuk-hi su-pûn kì-têu.
[11] Só-yî, ngì oi án-ngiòng lâu Yù-thai pin Yâ-lu-sat-lâng ke ngìn-mìn kóng: Ngài kie-va̍k oi kong châi-fo kûng-tá kì-têu, chún-phi oi chit-fa̍t kì-têu. Ngì oi khien kì-têu m̀-hó chai cho fái-sṳ, tak-sà oi kiak-kiak kói-chṳn chhṳ-kâ ke só-cho.
[12] Chúng-he kì-têu voi kóng: ‘M̀-sṳ́ kâ-kóng! Ngài-têu ngióng oi-sṳ́ kói-ko? Ngài-têu oi cheu chhṳ-kâ ke yi-sṳ, cheu chhṳ-kâ ngang-kiáng ke pún-sin cho fái-sṳ.’ ”
[13] Só-yî, Song-chú án-ngiòng kóng: Ngì-têu hi-mun kok-koet khon, yû má-ngìn thâng-ko án-ngiòng ke sṳ nè? Ngài só siak ke Yî-set-lie̍t ngìn-mìn cho yit-khien fî-sòng khó-vu ke sṳ.
[14] Lì-pâ-nun ngàm-sa̍k táng ke siet sṳt yùng-thet mò? Sân-táng liù hâ-lòi chhîn-liòng ke súi sṳt châu-thet mò?
[15] Chúng-he, Ngài ke chṳ́-mìn m̀ ki-tet Ngài; kì-têu hiong hî-ká ke ngiéu-siong sêu-hiông. Kì-têu chhai só-hàng ke lu-hong tiet-tó, m̀-hén chai hàng ke-thiàu khiu-lu; kì-têu hi hàng màng cháng-hó ke se-lu.
[16] Kì-têu chiông liá-te thú-thi pien-cho fông-liòng, tet-ngìn-kiâng ke só-chhai, yún-yén pûn-ngìn khon m̀-hí; ko-lu ngìn khon-tó thin-chho̍k voi hak-tó, kín yèu-thèu.
[17] Ngài oi chhai thi̍t-ngìn mien-chhièn kiuk Ngài ke chṳ́-mìn chéu, chhiong tûng-fûng chhôi-san chhṳ̀n-fôi. Châi-nan lòi-to ke sṳ̀, Ngài oi poi-hiong kì-têu, m̀-he mien-hiong kì-têu.
[18] Yèn-heu ngìn-mìn kóng: “Lòi â, ngài-têu lòi sat-kie tui-fu Yâ-li-mí! Sùi-sṳ̀ me yû chi-sṳ̂ lòi kau-thô ngài-têu, yû chṳ-fi ke ngìn lòi pông-chhu ngài-têu, yû siên-tî lòi chhòn-kóng Song-ti ke sin-sit. Ngài-têu kóng-fa lòi kûng-kit Yâ-li-mí, m̀-hó chai thâng kì ke fa.”
[19] Yîn-vi án-ngiòng, ngài khì-tó: “Song-chú â, khiù Ngì thâng ngài ke po-ko, ya thâng ngài thi̍t-ngìn khúng-ko ngài ke fa.
[20] Hó-sîm mò hó-po, he-mò? Na-mò, kì-têu ngióng-voi yet ham-chiáng lòi hoi ngài â! Khiù Ngì sióng khon-é, ngài chhai Ngì mien-chhièn vi kì-têu khiù-ko; ngài sṳt khiù Ngì m̀-hó chhai thai fat-khién chûng lòi tui-fu kì-têu.
[21] Liá-ha oi ngióng-pân chang hó? Song-chú â, ngài khiù Ngì: Pûn kì-têu ke chṳ́-ńg ngo-sí; pûn kì-têu chan-sí; pûn kì-têu ke fu-ngìn-kâ sí ló-kûng, chṳ́-ńg yêu-chat; pûn kì-têu ke chong-tên pot-vûn lòi sí, heu-sâng-ngìn sí chhai chan-chhòng.
[22] Khiù Ngì phai thú-fî fut-yèn-kiên lòi-to, chhióng-kiap kì-têu ke kâ-yèn, sṳ́ kì-têu chho̍k-kiâng chhin-sê; yîn-vi kì-têu yet ham-chiáng oi hoi ngài, chông lò-mióng oi chok ngài.
[23] Song-chú â, kì-têu sióng-oi chhṳ̀ ngài ke yîm-mèu, Ngì chhin chhîn-chhú. Khiù Ngì m̀-hó sa-miên kì-têu só-cho ke fái-sṳ, m̀-hó thù-thet kì-têu ke chhui-ko. Khiù Ngì sṳ́ kì-têu chhai Ngì mien-chhièn tiet-tó; khiù Ngì chhai thai fat-khién sṳ̀ lòi chit-fa̍t kì-têu.”