[1] Yok-sî-â ke lai-é Yok-ngâ-kin cho Yù-thai-vòng ke thi-si ngièn, Song-chú tui Yâ-li-mí kóng:
[2] “Ngì nâ sû-kién lòi, chiông Ngài lâu ngì kóng yû-koân Yî-set-lie̍t, Yù-thai lâu kok-koet ke tak-hong sṳ chhiòn-phu ki-liu̍k hâ-lòi. Tui Yok-sî-â-vòng ke sṳ̀-thoi to kîm-pû-ngit, Ngài lâu ngì kóng-ko ke fa, ngì chhiòn-phu oi siá hâ-lòi.
[3] Yù-thai ngìn-mìn yit thâng-tó Ngài oi hiong kì-têu kong châi-nan, khó-nèn thai-kâ voi lì-khôi chhui-ok ke tho-lu. Án-ngiòng Ngài chhiu sa-miên kì-têu ke chhui-ok lâu ko-fam.”
[4] Só-yî, Yâ-li-mí chhiáng Nì-li-â ke lai-é Pâ-liu̍k lòi, chiông Song-chú lâu kì kóng-ko ke fa chhiòn-phu kóng pûn Pâ-liu̍k thâng; Pâ-liu̍k chhiu ki-liu̍k chhai sû-kién tî-poi.
[5] Yâ-li-mí fûn-fu Pâ-liu̍k kóng: “Ngài pûn-ngìn kim-chṳ́, mò phan-fap ngi̍p Song-chú ke sṳn-thien hi.
[6] Só-yî ngì oi chhai kim-sṳ̍t ke ngit-è to sṳn-thien hi, hiong chung-ngìn thu̍k ngì ki-liu̍k chhai liá sû-kién tî-poi ke fa, pûn kì-têu thâng Song-chú hiong ngài kóng-ko ke fa. Ngì oi thai-sâng thu̍k pûn ke-têu tui tak sàng-sṳ lòi ke Yù-thai ngìn-mìn chhiòn-phu thâng-tó.
[7] Khó-nèn kì-têu voi hiong Song-chú khì-khiù, thai-kâ chhiu lì-khôi kì-têu chhui-ok ke tho-lu, yîn-vi Song-chú só-kóng tui-fu liá-têu ngìn-mìn oi fat-chhut ke nu-hi he fî-sòng ke li-hoi.”
[8] Nì-li-â ke lai-é Pâ-liu̍k chhiu cheu siên-tî Yâ-li-mí ke yit-chhiet chṳ́-sṳ, chhai sṳn-thien chûng tui sû-kién tî-poi thu̍k Song-chú ke fa.
[9] Liá-sṳ fat-sên chhai Yok-sî-â ke lai-é Yok-ngâ-kin cho Yù-thai-vòng ke thi-ńg ngièn kiú-ngie̍t; ke-sṳ̀ só-yû Yâ-lu-sat-lâng-ngìn lâu tui Yù-thai tak sàng-sṳ lòi ke ngìn chhai Song-chú mien-chhièn siên-pu kim-sṳ̍t.
[10] Pâ-liu̍k tông-chung thu̍k Yâ-li-mí kóng-ko, ki-liu̍k chhai sû-kién tî-poi ke fa; ke-sṳ̀ kì he chhai sṳn-thien tî-poi, kiûng-thìn sû-ki Sâ-fân ke lai-é Kî-mâ-li-ngâ ke fòng-kiên tú. Liá fòng-kiên chhai song-chhèn ke thìn-yen, sṳn-thien “Sîn-mùn” ke ngi̍p-héu fu-khiun.
[11] Sâ-fân ke sûn-é, Kî-mâ-li-ngâ ke lai-é Mí-kâi-â thâng-tó sû-kién tî-poi só-yû Song-chú ke fa,
[12] kì chhiu hâ-to kiûng-thìn sû-ki ke fòng-kiên hi. Kì khon-tó só-yû ke kôn-yèn chhiòn-phu chhai ke-vi chhô-tén: Yû kiûng-thìn sû-ki Yî-li-sâ-mâ, Sṳ-mâ-ngâ ke lai-é Thi-lòi-ngâ, Â-kiet-pô ke lai-é Yî-li-nâ-tân, Sâ-fân ke lai-é Kî-mâ-li-ngâ, Ha̍p-nâ-nì-ngâ ke lai-é Sî-tí-kâ, khì-thâ kôn-yèn ya chhiòn-phu chhai-chhòng.
[13] Yèn-heu, Mí-kâi-â chiông só thâng-tó, chhiu-he Pâ-liu̍k tông-chung thu̍k ke fa chhiòn-phu hiong kì-têu po-ko.
[14] Só-yî kì-têu phai Kú-sṳ ke chên-sûn, Sṳ-li-mí-ngâ ke sûn-é, Nì-tham-ngâ ke lai-é Yù-tí to Pâ-liu̍k ke-vi kóng: “Ngì tông-chung thu̍k ke, ke sû-kién tai ko-lòi.” Nì-li-â ke lai-é Pâ-liu̍k chhiu chiông ke sû-kién tai-to kì-têu ke-vi hi.
[15] Kì-têu tui kì kóng: “Chhiáng-chhô, thu̍k pûn ngài-têu thâng!” Pâ-liu̍k chhiu thu̍k pûn kì-têu thâng.
[16] Kì-têu thâng-liáu, tak-sà chhiu chhin chho̍k-kiâng, ngì khon ngài, ngài khon ngì, tui Pâ-liu̍k kóng: “Ngài-têu yit-thin oi chiông liá-têu fa lâu koet-vòng po-ko.”
[17] Kì-têu chhà-mun kì: “Lâu ngài-têu kóng, ngì ngióng-voi siá liá-têu fa? He Yâ-li-mí chhîn-choi kóng ke mò?”
[18] Pâ-liu̍k en-kóng: “Chhiòn-phu he Yâ-li-mí chhîn-choi lâu ngài kóng ke; ngài yung me̍t-súi ki-liu̍k chhai liá sû-kién mien-táng.”
[19] Ke-têu kôn-yèn lâu Pâ-liu̍k kóng: “Ngì lâu Yâ-li-mí lióng-sà oi kiak-kiak khong hí-lòi; m̀-hó pûn ngìn tî ngì-têu khong chhai nai-vi.”
[20] Kì-têu chiông ke sû-kién liù chhai kiûng-thìn sû-ki Yî-li-sâ-mâ ke fòng-kiên, yèn-heu to vòng-kiûng hi, chiông liá-khien sṳ chhiòn-phu hiong vòng po-ko.
[21] Vòng phai Yù-tí hi nâ ke sû-kién. Yù-tí chhiu to kiûng-thìn sû-ki Yî-li-sâ-mâ ke fòng-kiên hi nâ chón-lòi, thu̍k pûn vòng lâu vòng chó-yu ke kôn-yèn thâng.
[22] Ke-sṳ̀ he kiú-ngie̍t, vòng chhai kì ke tûng-kiûng tú, chhô chhai fó-lù chhièn phoi-fó.
[23] Yù-tí thu̍k sâm-si thon, vòng chhiu yung pi-sû ke tô-é chiông ke sû-kién kot-to lan-lan, yit-te yit-te fit-lo̍k fó-lù tú, yit-chhṳ̍t to kûi-kién sû chhai fó-lù tú sêu chhiang-chhiang.
[24] Vòng lâu kì ke kôn-yèn thâng-tó sû-kién tî-poi ki-liu̍k ke fa, mò pan-sà kiâng, ya mò chhá-lan sâm lòi péu-sṳ sông-sîm.
[25] Sûi-yèn Yî-li-nâ-tân, Thi-lòi-ngâ lâu Kî-mâ-li-ngâ khiù vòng m̀-hó sêu ke sû-kién, vòng m̀-thâng kì-têu,
[26] fán-chón min-lin vòng-chṳ́ Yâ-lâ-me̍t lâu Â-sṳ̂-lie̍t ke lai-é Sî-lòi-ngâ, pin Â-pak-thia̍p ke lai-é Sṳ-li-mí-ngâ lòi chok pi-sû Pâ-liu̍k lâu siên-tî Yâ-li-mí. Chúng-he Song-chú yí-kîn chiông kì-têu khong hí-lòi.
[27] Yok-ngâ-kin-vòng chiông Yâ-li-mí chhîn-choi só-kóng, Pâ-liu̍k só ki-liu̍k ke sû-kién sêu-thet yî-heu, Song-chú lâu Yâ-li-mí kóng:
[28] “Ngì chiông Yù-thai-vòng Yok-ngâ-kin siên-chhièn sêu-thet ke sû-kién tî-poi yit-chhiet ke fa, chhùng-sîn siá chhai nang-ngoi yit-kién sû tî-poi.
[29] Lun-tó Yù-thai-vòng Yok-ngâ-kin, ngì oi tui kì kóng: ‘Song-chú án-ngiòng kóng: Ngì sêu-thet ke sû-kién, yu chhà-mun Yâ-li-mí cho-má-ke chhai sû-kién tî-poi siá-kóng Pâ-pí-lùn-vòng yit-thin voi lòi fí-fái liá-thi, sêu-me̍t ngìn-mìn lâu thèu-sâng.
[30] Só-yî, Yok-ngâ-kin-vòng â, Ngài — Song-chú lâu ngì kóng: Ngì m̀-voi yû heu-thoi hó sṳ̀n-chiap Thai-ví ke vòng-vi. Ngì ke sṳ̂n-sṳ̂ oi vok chhai yâ-ngoi, ngit-sṳ̀-thèu pûn ngit-thèu nat, am-pû-sṳ̀ pûn hòn-sông tung.
[31] Yîn-vi ngì-têu fam ke yit-chhiet chhui-ko, Ngài oi chit-fa̍t ngì, ngì ke chṳ́-sûn lâu ngì ke kôn-yèn. Ngì lâu Yâ-lu-sat-lâng pin Yù-thai ngìn-mìn chhiòn-phu m̀-thâng Ngài ke kín-ko, só-yî Ngài oi cheu Ngài só-kóng ke kong thai châi-nan chhai ngì-têu sṳ̂n-song.’ ”
[32] Só-yî, Yâ-li-mí chai nâ sû-kién pûn Nì-li-â ke lai-é pi-sû Pâ-liu̍k; kì chhiu chiông Yâ-li-mí chhîn-choi só-kóng ke fa chhiòn-phu ki-liu̍k hâ-lòi. Kì chiông Yù-thai-vòng Yok-ngâ-kin sêu-thet ke sû-kién tî-poi só-yû ke fa chhùng-sîn siá hâ-lòi, pin kâ chhin-tô siông-chhiong ke fa.