[1] Yok-sî-â ke lai-é Yok-ngâ-kin cho vòng thúng-chhṳ Yù-thai ke thi-si ngièn, chhiu-he Nì-pu-kap-nì-sat cho Pâ-pí-lùn-vòng ke thi-yit ngièn, Yâ-li-mí tui Song-chú liâng-su Kì oi pûn Yù-thai chung-ngìn ke sin-sit.
[2] Siên-tî Yâ-li-mí chhiu hi hiong Yù-thai chhiòn-koet ngìn-mìn lâu Yâ-lu-sat-lâng ke chung-ngìn kóng:
[3] “Tui Â-mùn ke lai-é Yok-sî-â cho vòng thúng-chhṳ Yù-thai-koet ke thi sṳ̍p-sâm ngièn to kîm-pû-ngit, chúng-khiung ngi-sṳ̍p sâm-ngièn, Song-chú sòng-sòng hiong ngài kóng-fa, ngài ya yit-chhṳ̍t hiong ngì-têu chhòn Kì ke fa, chúng-he ngì-têu m̀-thâng.
[4] Song-chú chó chhiu yit-chhṳ̍t phai Kì ke phu̍k-ngìn — ke-têu siên-tî hiong ngì-têu chhòn-fa, chúng-he ngì-têu m̀-thâng, ya m̀-tap Kì.
[5] Kì-têu khien ngì-têu tak-sà lì-khôi sià-ok ke sên-fa̍t, kói-pien chhui-ok ke hàng-vì, án-ngiòng ngì-têu chang cho-tet yún-yén liù chhai Song-chú su-pûn ngì-têu lâu ngì-têu chú-siên ke thú-thi.
[6] Kì-têu ya khien ngì-têu m̀-hó kin-pai fu̍k-sṳ phe̍t ke sṳ̀n, m̀-hó pai ngì-têu só-chho ke ngiéu-siong lòi ngiâ Song-chú fat-khién, Kì chhiu m̀-voi chit-fa̍t ngì-têu.
[7] Chúng-he, Song-chú siên-pu kóng, ngì-têu m̀-tân-chhiang m̀-thâng Kì, fán-chón yung chhṳ-kâ ke sú só-chho ke ngiéu-siong lòi ngiâ Kì fat-khién, hoi-tó chhṳ-kâ.
[8] “Yîn-vi ngì-têu m̀ thâng-chhiùng Kì, só-yî Song-chú — Van-kiûn ke Ngièn-soi án-ngiòng kóng:
[9] ‘Khon â, Ngài oi phai pet-fông ke-têu mìn-chhu̍k lâu Ngài ke phu̍k-ngìn Pâ-pí-lùn-vòng Nì-pu-kap-nì-sat lòi kûng-kit liá thi-fông lâu só-yû ke ngìn-mìn, ya oi kûng-kit chû-vì só-yû ke koet-kâ. Ngài oi sêu-me̍t kì-têu, sṳ́ liá thi-fông lâu chû-vì ke koet-kâ yún-yén fông-liòng, sàng-cho hoi-ngìn kiâng-to pot-tok-ngok, pûn-ngìn sâu-nat ke só-chhai. Ngài — Song-chú án-ngiòng siên-pu lé.
[10] Ngài oi sṳ́ kì-têu m̀-voi chai yû fôn-hí khoai-lo̍k ke sâng, ya mò chai yû sîn-lòng lâu sîn-ngiòng ke sâng-yîm; kì-têu ke mo-sa̍k mò sâng, tên-chán mò yù.
[11] Liá-phién thú-thi voi fông-liòng, sàng-cho hoi-ngìn kiâng-to pot-tok-ngok ke só-chhai. Liá-têu koet-kâ voi pûn Pâ-pí-lùn-vòng kón chhit-sṳ̍p ngièn.
[12] Mân chhit-sṳ̍p ngièn yî-heu, Ngài oi yîn-vi Pâ-pí-lùn lâu kì ke vòng só-fam ke chhui chit-fa̍t kì-têu. Ngài oi sṳ́ kì-têu ke thi yún-yén fông-liòng.
[13] Ngài oi yung Ngài só siên-pu yit-chhiet ke fa, chhiu-he Yâ-li-mí siá chhai liá sû tî-poi, kûng-kit lie̍t-koet ke yi-ngièn, lòi chit-fa̍t Pâ-pí-lùn.
[14] Ngài oi cheu Pâ-pí-lùn-ngìn só-hàng só-cho ke lòi po-yin kì-têu; kì-têu voi cho tông-tô khiòng-koet lâu thai kiûn-vòng ke nù-chhòi.’ ”
[15] Song-chú — Yî-set-lie̍t ke Song-ti án-ngiòng lâu ngài kóng: “Ngì oi chiông tui Ngài sú-chûng chiap ko-hi, chông-mân thai fat-khién ke chiú-pî, kâu-pûn Ngài chhâi-phai ngì hi ke kok-koet, pûn kì-têu lîm.
[16] Kì-têu lîm-liáu yî-heu chhiòn-phu voi phiên-lòi phiên-hi, chhiong pot chiú-tiên, yîn-vi Ngài oi yung chan-chên lòi tui-fu kì-têu.”
[17] Só-yî, ngài tui Song-chú sú-chûng chiap-ko liá chiú-pî, chiông kì kâu-pûn Song-chú phai ngài hi ke kok-koet, pûn kì-têu lîm.
[18] Ngài pûn Yâ-lu-sat-lâng, Yù-thai ke-têu sàng-sṳ, lièn kì-têu ke kiûn-vòng, kôn-yèn chhiòn-phu lîm liá-chiú, sṳ́ kì-têu sàng-cho fông-liòng, hoi-ngìn kiâng-to pot-tok-ngok, pûn-ngìn sâu-nat, chu-chú ke tui-siong. (Kîm-pû-ngit ke chhìn-hìn ya he khiung-yong.)
[19] Hâ-poi só-lie̍t ke ya chhiòn-phu yin-kôi lîm liá-chiú: Âi-khi̍p-vòng, kì ke kôn-yèn lâu liâng-chhiu; só-yû Âi-khi̍p-ngìn lâu he̍t chhai Âi-khi̍p ke ngoi-koet ngìn; Vû-sṳ̂ só-yû ke kiûn-vòng; Fî-li-sṳ ke-têu sàng-sṳ: Â-sṳ̍t-kî-lùn, Kâ-sat, Yî-kiet-lùn só-yû ke kiûn-vòng, lâu Â-sṳ̍t-thut chhûn-tó ke ngìn-mìn; Yî-tûng-ngìn, Mô-ap-ngìn, lâu Â-mùn-ngìn; Thai-ngì lâu Sî-tun só-yû ke kiûn-vòng; Thi-chûng-hói ke-phién ke kiûn-vòng; Tí-tan, Thì-mâ, lâu Pu-sṳ̂ ke-têu sàng-sṳ ke ngìn; só-yû siû-chién thèu-nà-mô lòi chûn-kin sṳ̀n-mìn ke mìn-chhu̍k; Â-lâ-pak só-yû ke kiûn-vòng; sâ-mo̍k thi-khî kok phu-lo̍k ke chhu̍k-chóng; Sîm-li, Yî-làn, lâu Mí-tí-â só-yû ke kiûn-vòng; pet-fông yén-khiûn só-yû ke kiûn-vòng. Thi-song kok-koet chhiòn-phu oi lîm liá-chiú. Chui-heu, Pâ-pí-lùn-vòng ya oi lîm liá-chiú.
[27] Chiap-tén, Song-chú tui ngài kóng: “Ngì oi lâu kì-têu kóng, Ngài — Song-chú, Van-kiûn ke Ngièn-soi, Yî-set-lie̍t ke Song-ti min-lin kì-têu lîm liá-pî chiú, pûn kì-têu chiú-chui, chhin-éu, vang lo̍k-hi, phà m̀ hí-lòi, yîn-vi Ngài sṳ́ kì-têu tù-tó chan-chên.
[28] Na-he kì-têu m̀-hén tui ngì ke sú chiap liá-pî hi-lîm, ngì chhiu lâu kì-têu kóng: Song-chú — Van-kiûn ke Ngièn-soi án-ngiòng kóng: ‘Ngì-têu yit-thin oi lîm.’
[29] Yîn-vi Ngài oi siên fí-me̍t Ngài chhṳ-kâ ke sàng, kì-têu hàn sám tet-khôi chit-fa̍t mâ? Kì-têu sám m̀-khôi, yit-thin oi su chit-fa̍t, yîn-vi Ngài oi yung chan-chên sêu-me̍t thi-song só-yû ke ngìn-mìn. Ngài — Song-chú, Van-kiûn ke Ngièn-soi án-ngiòng siên-pu lé.
[30] “Yâ-li-mí â, ngì yit-thin oi chiông Ngài lâu ngì kóng ke fa chhiòn-phu lâu kì-têu kóng: Song-chú oi tui thiên-táng chhiong sṳ̂-é ho-ho-kún, tui Kì ke sṳn-só fat-chhut thai fat-khién ke sâng, hiong Kì ke chṳ́-mìn thai-sâng tot, chhiong tha̍p phù-thò ke ngìn kín-tha̍p kín-hêm. Kì ke sâng-yîm chhòn-to thiên-piên hói-kok; thi-song só-yû ke ngìn chhiòn-phu thâng tet-tó. Song-chú oi ko lie̍t-koet. Kì oi sṳ́m-phan van-mìn, chiông fái-ngìn kâu-pûn tô-kiam. Song-chú án-ngiòng siên-pu lé.”
[32] Song-chú — Van-kiûn ke Ngièn-soi án-ngiòng kóng: Châi-nan voi lòi lé, tui liá-koet to nang-ngoi yit-koet, chhiong tui thi-khi̍t chhôi yit-chhṳn thai khòng-fûng.
[33] Ke-ngit, tui thi-khiù ke liá-phién to nang-ngoi yit-phién, to-chhu he pûn Song-chú chhṳ̀-thet ke ngìn ke sṳ̂n-sṳ̂. Mò-ngìn vi kì-têu pî-sông, mò-ngìn sû-sṳ̂, ya mò-ngìn mài kì-têu. Kì-têu ke sṳ̂n-sṳ̂ fûn-san chhai thi-mien song, sàng-cho pun-tôi.
[34] Ngìn-mìn ke liâng-chhiu â, Ngài chṳ́-mìn ke mu̍k-chá â, ngì-têu oi thai-sâng kieu, chhai thi-nài-hâ kín-chan. Ngì-têu pûn-ngìn chhṳ̀ ke sṳ̀-kiên voi to lé; ngì-têu voi chhiong yòng-kú pûn-ngìn chhṳ̀,
[35] lièn yit-ke mu̍k-chá ya mò fap-thu thò-chéu.
[36] Ngì liá-têu mu̍k-chá voi thai-sâng chhin-kieu, yîn-vi Song-chú oi chhai thai fat-khién chṳ̂-ha sêu-me̍t ngì-têu ke koet-kâ, sṳ́ ngì-têu ôn-lo̍k ke mu̍k-chhòng pien-cho fông-phû.
[38] Song-chú lì-khôi Kì ke chṳ́-mìn, chhiong sṳ̂-é lì-khôi kì ke lùng. Chan-chên ke tet-ngìn-kiâng lâu Song-chú ke thai fat-khién sṳ́ liá-ke koet-kâ pien-cho fông-phû.