[1] Ngì-têu chhai Yâ-lu-sat-lâng ke kiê-hong hàng-lòi hàng-hi, siòng-se chhà-khon, hi kóng-chhòng chhìm khon-é nâ, khon chhìm tet-tó yit-ke hàng chṳn-ngi, chûi-khiù sṳ̀n-sṳ̍t ke ngìn mò? Ngì-têu na chhìm tet-tó, Ngài chhiu sa-miên Yâ-lu-sat-lâng.
[2] Kì-têu sûi-yèn chṳ́-tén yún-sên ke Song-chú fat-sṳ, chúng-he só-fat ke sṳ he ká ke.
[3] Song-chú â, Ngì kám m̀-he oi chhìm khon yû sṳ̀n-sṳ̍t ke ngìn mò? Ngì tá kì-têu, kì-têu mò fán-yin, Ngì chit-fa̍t kì-têu, kì-têu ya m̀ chiap-su kón-kau. Kì-têu kiáng-kîn pí sa̍k-thèu kha ngang, m̀-hén fí-kói.
[4] Só-yî ngài sióng: Kì-têu he khiùng-khú yu ngong-tong ke ngìn-mìn; kì-têu m̀-tî Song-chú ke tho-lu, m̀-tî Song-ti ke fap-chet.
[5] Ngài oi lòi-hi kien kì-têu ke liâng-chhiu, lâu kì-têu kóng khon-é; kì-têu yit-thin tî Song-chú ke tho-lu, lâu Song-ti ke fap-chet. Chúng-he kì-têu lûng-chúng chiông ak áu-thôn, chiông sok-è pâng-thet, m̀-hén sun-fu̍k.
[6] Só-yî, sṳ̂-é voi tui su-nà chhut-lòi kûng-kit kì-têu; sài-lòng voi tui khóng-yâ chhut-lòi sat-hoi kì-têu; pau-é voi chhai sàng-sṳ chû-vì phu̍k-tén tén kî-fi; má-ngìn chhut-hi, chhiu voi pûn kì pak-sui. Yîn-vi kì-têu yit-pái yu yit-pái phoi-ngia̍k Song-ti; kì-têu ke chhui-ok tông-tô.
[7] Song-chú kóng: Ngài cho-má-ke oi sa-miên ngì-têu? Ngì-têu ke chṳ́-ńg yí-kîn phoi-ngia̍k Ngài hi-pai ká-sṳ̀n. Ngài pûn kì-têu sṳ̍t-páu, kì-têu sa hi-fam kiên-yìm, kûi-khiùn hi-chhìm kî-ńg.
[8] Kì-têu chhiu-chhiong sṳ̍t-to páu-páu ke mâ-é tông hiùng-thèu, fat sê-sâng, tak-sà tông sióng-oi hi koái lìn-sa ke pû-ngiòng.
[9] Ngài kám mò yin-kôi vi liá-têu sṳ chit-fa̍t kì-têu mâ? Chhiong án-ngiòng ke koet-kâ, Ngài kám m̀-sṳ́ chhîn-chhṳ po-fu̍k mâ?
[10] Ngài oi min-lin thi̍t-ngìn kóng: “Ngì-têu chin-ngi̍p Ngài chṳ́-mìn ke phù-thò-yèn, hi fí-fái kì, chúng-he m̀-hó chhiòn-phu tá-fái chhiang-chhiang. Ngì-têu oi chám-thet phù-thò-su ke kî-é, yîn-vi liá-têu m̀-he su̍k Song-chú ke.”
[11] Yî-set-lie̍t-ngìn lâu Yù-thai-ngìn lûng-chúng tui Ngài fî-sòng mò chûng-sîm. Ngài — Song-chú án-ngiòng siên-pu lé.
[12] Song-chú ke chṳ́-mìn m̀ sṳ̀n-ngin Song-chú. Kì-têu kóng: “Song-chú lâu ngài-têu mò koân-he. Ngài-têu m̀-voi tù-tó châi-nan, chan-lon ya-he kî-fông.”
[13] Kì-têu yu kóng: “Siên-tî ke fa tông phong-fûng; m̀-he Song-chú ke tho; ngien kì-têu ke fa sṳ̍t-hien chhai kì-têu chhṳ-kâ sṳ̂n-song.”
[14] Só-yî Chú Song-ti — Van-kiûn ke Ngièn-soi án-ngiòng tui ngài kóng: “Yâ-li-mí â, liá-têu ngìn ki-yèn kóng liá-chúng fa, Ngài oi chiông Ngài ke fa piong chhai ngì khiéu-chûng. Ngài ke fa chhiong fó, kì-têu chhiong chhèu; fó oi chiông kì-têu sêu chhiang-chhiang.”
[15] Song-chú kóng: “Yî-set-lie̍t-ngìn â, Ngài oi sṳ́ yit-ke koet-kâ tui yén-yén ke só-chhai lòi kûng-tá ngì-têu. Liá-ke koet-kâ tông-khiòng, ya yû tông-kiú ke li̍t-sṳ́; kì-têu kóng ke fa ngì-têu thâng m̀-sṳt, ya m̀ liáu-kié.
[16] Kì-têu chhiòn-phu chhiong yúng-kám ke chan-sṳ, kì-têu ke chien-thoi chhiong he choi khôi-khôi ke fùn-mu.
[17] Kì-têu voi sṳ̍t-thet ngì-têu ke ńg-kuk, liòng-sṳ̍t; kì-têu voi chhṳ̀-sí ngì-têu ke chṳ́-ńg, ngì-têu ke ngiù-yòng; kì-têu voi sṳ̍t-chhiang ngì-têu ke phù-thò lâu vù-fâ-kó. Kì-têu ke kiûn-chhui voi chhak-thet ngì-têu só vá-kho ke sàng-pó.”
[18] Song-chú kóng: “Chhiu-he chhai ke-sṳ̀, Ngài ya m̀-voi chiông Ngài ke chṳ́-mìn chhiòn-phu sêu-me̍t.
[19] Yâ-li-mí â, na-he kì-têu mun-hí: ‘Song-chú — ngài-têu ke Song-ti cho-má-ke án-ngiòng tui-thai ngài-têu?’ ngì oi lâu kì-têu kóng, yîn-vi kì-têu lì-khôi Ngài, chhai chhṳ-kâ ke koet-kâ fu̍k-sṳ phe̍t-koet ke sṳ̀n-mìn, só-yî kì-têu voi chhai ngoi-koet fu̍k-sṳ ngoi-koet ngìn.”
[20] Song-chú kóng: “Oi thûng-tî Ngâ-kok ke heu-thoi, chhai Yù-thai siên-pu kóng:
[21] Ngì-têu ngong-tong m̀-tî thèu-thiên ke ngìn â, oi chu-yi thâng! Ngì-têu yû muk-chû chúng-he m̀-voi khon; yû ngí-kûng chúng-he m̀-voi thâng!
[22] Ngài he Song-chú. Ngì-têu cho-má-ke m̀ kin-vi Ngài? Chhai Ngài mien-chhièn, cho-má-ke mò pi̍t-pi̍t-chhat? Ngài yung sâ-thân cho thai-hói yún-yén ke kie-han, thai-hói chhiu m̀-kám chhêu-ko liá kie-han. Hói-súi chhin-chhùng ya m̀-kám phàn-ko; thai-long fân-kún ya m̀-kám ye̍t-ko.
[23] Chúng-he ngì liá-têu ngìn ngang-kiáng yu phoi-ngia̍k! Ngì-têu phoi-ngia̍k Ngài, lì-khôi Ngài.
[24] Sûi-yèn Ngài cheu sṳ̀-chiet su-pûn ngì-têu chhûn-yí chhiû-yí, sṳ́ ngì-têu to-sṳ̀ chhiu yû-hó sû-sṳ̀n, chúng-he ngì-têu chhiùng-lòi m̀-sṳt kin-vi Ngài — Song-chú ngì-têu ke Song-ti.
[25] Ngì-têu ke chhui-ok sṳ́ ngì-têu mò fûng-thiàu yí-sun; ngì-têu ke chhui-ko hoi ngì-têu tet m̀-tó fuk-hi.
[26] “Chhai Ngài chṳ́-mìn ke tông-chûng yû fái-ngìn. Kì-têu sat kúi-kie ham-hoi ngìn, chhiu-chhiong chok tiâu-é ke ngìn ôn lò-mióng.
[27] Kì-têu ke vuk-hâ chhûng-mân yung kúi-cha met-lòi ke tûng-sî, chhiu-chhiong lia̍p-ngìn ke lûng-é chông-mân tiâu-é. Só-yî, kì-têu yû-chhièn yû-sṳ,
[28] fùng-kông mân-mien yu chhin thai-khiêu. Kì-têu fái-sṳ cho-chhin, m̀ vi kû-yì sṳ̂n-yên, m̀ thoi khiùng-khú ngìn chú-chhṳ̀ kûng-tho.
[29] “Só-yî, Ngài — Song-chú oi chhîn-sṳ̂n vi liá-têu sṳ chit-fa̍t kì-têu; Ngài oi sṳ́ án-ngiòng ke koet-kâ su-tó po-yin.
[30] Liá-chak koet-kâ ngióng-pân voi fat-sên án tet-ngìn-kiâng, án khó-vu ke sṳ!
[31] Ke-têu siên-tî só kóng ke lûng-chúng he ká yi-ngièn; ke-têu chi-sṳ̂ chôn-mùn vi chhṳ-kâ châng-khièn tho̍t-li; Ngài ke chṳ́-mìn ya fôn-hí án-ngiòng! To Ngài chit-fa̍t ke-ngit, kì-têu oi ngióng-pân hó nè?”