[1] Song-chú lâu Yâ-li-mí kóng voi cho thiên-hôn. Kì kóng:
[2] Yù-thai chhin pî-ôi, sàng-sṳ lâng-lo̍k. Ngìn-mìn chhô chhai thi-song ôi-sông; Yâ-lu-sat-lâng sê-thiên ve-thi thai-kieu.
[3] Yû-chhièn ngìn phai phu̍k-ngìn hi tá-súi; kì-têu to tún-súi-fut chúng-he chhìm mò súi, chhiu tai-tén khûng súi-kon-é chón-lòi. Kì-têu miâng-tén thèu-nà, kám-kok chhin sṳt-mong, m̀-tî ngióng-pân chang hó.
[4] Thiên m̀ lo̍k-súi, thi châu-to lie̍t-thet; kâng-chung ngìn nám-tén thèu-nà, sṳt-mong to mò-kat mò-sat.
[5] Yâ-thi ke lu̍k-mà voi fit-thet chang kiung ke se lu̍k-é, yîn-vi mò chhó hó-sṳ̍t.
[6] Yâ-lì khî chhai kông-kông ke sân-táng, chhiong yâ-kiéu án-ngiòng choi pak-pak kín-théu thai-hi; yîn-vi mò chhó hó-sṳ̍t, kì-têu tú-kî to muk-chû fâ-fâ.
[7] Ngài ke chṳ́-mìn hiong Ngài fû-khiù: “Song-chú â, ngài-têu ke chhui cho-chṳn lòi-ko ngài-têu, chúng-he yîn-vi Ngì ke miàng, liá-ha hàn-he khiù Ngì sṳ̂-hàng chṳ́n-kiu. Ngài-têu sòng-sòng fam-chhui lì-khôi Ngì; ngài-têu khok-sṳ̍t tet-chhui Ngì.
[8] Ngì he Yî-set-lie̍t vì-yit ke hî-mong, he ngài-têu tù-tó châi-nan sṳ̀ ke kiu-chú. Ngì chhai ngài-têu tông-chûng cho-má-ke chhiong sâng-fun-ngìn? Chhiong ko-lu ke lî-hak ngi̍p-lòi hiet yit-ya thin-thin?
[9] Cho-má-ke Ngì chhiong ngìn chho̍k-kiâng to pot-tok-ngok, chhiong mò nèn-li̍t kiu ngìn ke chan-sṳ? Chúng-he, Song-chú â, ngài-têu tî, Ngì khok-sṳ̍t yû lâu ngài-têu thùng-chhai! Ngài-têu he Ngì ke chṳ́-mìn; khiù Ngì m̀-hó fit-thet ngài-têu.”
[10] Song-chú án-ngiòng kóng: “Liá-têu ngìn tông-hau lon-hàng, sùi chhṳ-kâ ke yi-sṳ liù-long. Só-yî, Ngài tông-nâu kì-têu; Ngài oi ki-tet kì-têu ke chhui-ko, chit-fa̍t kì-têu ke chhui-ok.”
[11] Song-chú tui ngài kóng: “Ngì m̀-sṳ́ vi liá-têu ngìn khiù fuk-hi.
[12] Chhiu-son kì-têu kim-sṳ̍t, Ngài ya m̀-thâng kì-têu ke khiù-ham; chhiu-son kì-têu hien sêu-fa-chi lâu su-chi, Ngài ya m̀ chiap-su. Ngài fán-chón oi yung chan-chên, kî-fông, lâu pot-vûn lòi sêu-me̍t kì-têu.”
[13] Ngài chhiu kóng: “Ái! Chṳ-kô ke Song-chú â, ke-têu siên-tî yi-ngièn kóng m̀-voi yû chan-chên, m̀-voi yû kî-fông. Kì-têu kóng, Ngì yin-hí oi pûn ngài-têu chhai chhṳ-kâ ke thú-thi song hióng-su thai-phìn.”
[14] Chúng-he Song-chú en-kóng: “Ke-têu siên-tî chia Ngài ke miàng kóng fâ-liâu. Khì-sṳ̍t, Ngài pin-mò phai kì-têu, ya mò min-lin kì-têu, lièn hiong kì-têu kóng-ko yit-ki fa ya mò. Kì-têu ke yi-siong he hî-ká ke; kì-têu ke puk-koa he mò-háu ke; kì-têu ke yi-ngièn he kì-têu chhṳ-kâ ke ngong-sióng.
[15] Só-yî, Ngài — Song-chú án-ngiòng lâu ngì kóng: Ngài oi tui-fu ke-têu m̀-he Ngài phai ke ká siên-tî; kì-têu chia Ngài ke miàng yi-ngièn liá thi-fông m̀-voi yû chan-chên, m̀-voi yû kî-fông. Chúng-he Ngài oi yung chan-chên lâu kî-fông lòi sêu-me̍t ke-têu siên-tî.
[16] Ke-têu thâng kì-têu kóng yi-ngièn ke ngìn ya voi su-tó khiung-yong ke kiet-khiu̍k. Kì-têu ke sṳ̂n-sṳ̂ lâu kì-têu pû-ngiòng chṳ́-ńg ke sṳ̂n-sṳ̂, chhiòn-phu voi pûn-ngìn fit chhai Yâ-lu-sat-lâng ke kiê-lu, mò-ngìn mài-chong. Ngài oi kì-têu vi chhṳ-kâ ke chhui-ok su-tó po-yin.”
[17] Song-chú fûn-fu ngài hiong ngìn-mìn kóng-hí ngài ke yù-sông: Ngài ke muk-chṳp ngit-ya kín-liù! Ngài kieu mò-thìn! Yîn-vi ngài só siak ke thùng-pâu chho̍k-sông; kì-têu su chhin-thai ke tá-kit.
[18] Ngài to yâ-ngoi, khon-tó pûn tô-é chhṳ̀-sí ke sṳ̂n-sṳ̂; ngài ngi̍p-to sàng-tú, khon-tó ngo-to pan sâng-sí ke ngìn-mìn. Siên-tî lâu chi-sṳ̂ chhai koet-nui chhut-chhut ngi̍p-ngi̍p cheu-sòng kûng-chok, chúng-he m̀-tî chhṳ-kâ mò-hàn má-ke.
[19] Song-chú â, Ngì kám vàn-chhiòn fit-thet Yù-thai he-mò? Ngì kám chhin-nâu Siak-ôn ke ngìn-mìn? Ngì cho-má-ke tá ngài-têu, tá-to mò-hó yî? Ngài-têu hî-mong phìn-ôn, chúng-he khon m̀-tó hó kông-kín; ngài-têu hî-mong tet-tó yî-chhṳ, fán-chón tù-tó chho̍k-kiâng.
[20] Song-chú â, ngài-têu khok-sṳ̍t yû tet-chhui Ngì. Ngài-têu sṳ̀n-ngin chhṳ-kâ ke chhui-ko, ya sṳ̀n-ngin ngài-têu chú-siên ke chhui-ok.
[21] Khiù Ngì ki-tet Ngì chhṳ-kâ ke yin-hí, m̀-hó fit-thet ngài-têu; m̀-hó pûn ngìn khon-khiâng Ngì yùng-kông ke pó-chho — Yâ-lu-sat-lâng; khiù Ngì m̀-hó fi-thet Ngì lâu ngài-têu só-li̍p ke yok.
[22] Lie̍t-koet hî-khûng ke ngiéu-siong kám voi sṳ́ thiên lo̍k-súi? Thiên-khûng chhṳ-kâ voi kong kâm-lìm mò? Song-chú — ngài-têu ke Song-ti â, yû nèn-li̍t cho liá-têu sṳ ke, kám m̀-he Ngì thin-thin! Ngài-têu ke hî-mong chhai Ngì, yîn-vi liá yit-chhiet chṳ́-yû Ngì chang voi cho.