[1] Pâ-pí-lùn-vòng Nì-pu-kap-nì-sat tui Yâ-lu-sat-lâng chiông Yok-ngâ-kin ke lai-é Yù-thai-vòng Yok-ngâ-kîn, Yù-thai ke kôn-yèn, tá-thiet sṳ̂-fu lâu kûng-ngìn chok-to Pâ-pí-lùn hi. Liá-sṳ yî-heu, Song-chú pûn ngài khon-tó sṳn-thien thèu-chhièn pài-tén lióng-làm vù-fâ-kó.
[2] Thi-yit làm chông-mân sîn-chhut ke hó vù-fâ-kó; hàn-yû yit-làm chông-mân sṳ̍t m̀-tet ke fái vù-fâ-kó.
[3] Song-chú mun ngài: “Yâ-li-mí â, ngì khon-tó má-ke?” Ngài en-kóng: “Vù-fâ-kó. Hó ke tông-hó, fái ke tông-fái, fái-to sṳ̍t m̀-tet.”
[4] Chiap-tén Song-chú tui ngài kóng:
[5] “Ngài — Song-chú, Yî-set-lie̍t ke Song-ti oi chiông ke-têu pûn-ngìn chok-hi ke Yù-thai ngìn-mìn, chhiu-he Ngài kiuk kì-têu lì-khôi liá thi-fông to Pâ-pí-lùn hi ke ngìn, khon-cho hó ke vù-fâ-kó, oi hó-hó khoán-thai kì-têu.
[6] Ngài oi thi̍t-phe̍t khon-ku kì-têu, tai kì-têu chón-to liá-te thú-thi. Ngài oi chhùng-kien kì-têu, m̀-he chhak-thet kì-têu; Ngài oi châi-phì kì-têu, m̀-he pâng-thet kì-têu.
[7] Ngài oi sṳ́ kì-têu ke sîm voi liáu-kié, tî Ngài chang he Song-chú. Kì-têu oi cho Ngài ke chṳ́-mìn, Ngài oi cho kì-têu ke Song-ti, yîn-vi kì-têu thin-chho̍k voi yit-sîm yit-yi kûi-hiong Ngài.
[8] “Lun-tó Yù-thai-vòng Sî-tí-kâ, hàn-yû kì chó-yu ke kôn-yèn lâu chhûn-tó ke Yâ-lu-sat-lâng-ngìn, mò-lun he liù chhai liá-vi, ya-he he̍t chhai Âi-khi̍p ke, Ngài — Song-chú oi chiông kì-têu khon-cho fái-to sṳ̍t m̀-tet ke vù-fâ-kó.
[9] Ngài oi sṳ́ kì-têu tù-tó thai châi-nan, pûn sṳ-kie kok-koet ngìn ye̍t-khon ye̍t chho̍k-kiâng. Chhai Ngài kiuk kì-têu hi ke só-chhai, phe̍t-ngìn voi siû-yu̍k, chhṳ́-seu, sâu-nat, chu-chú kì-têu.
[10] Chhai Ngài su-pûn kì-têu lâu kì-têu chú-siên ke thú-thi, Ngài oi yung chan-chên, kî-fông, lâu pot-vûn lòi sêu-me̍t kì-têu.”