[1] Yâ-li-mí hàn koân chhai kim-ví-chhui ke kî-liù-só ke sṳ̀, Song-chú thi-ngi pái lâu kì kóng.
[2] Chhóng-chho thai-thi ke he Song-chú, sṳ́ van-yû sṳ̀n-hìn yu tet-tó kien-li̍p ke ya he Song-chú. Kì ke miàng he Song-chú. Kì án-ngiòng kóng:
[3] “Ngì khiù Ngài, Ngài chhiu en ngì; Ngài oi chiông ngì só m̀-tî ke-têu tông-thai yu nàn mìn-pha̍k ke sṳ lâu ngì kóng.
[4] Ngài — Song-chú, Yî-set-lie̍t ke Song-ti kóng: Yâ-lu-sat-lâng sàng-tú ke vuk lâu Yù-thai ke vòng-kiûng, vi-tó tí-tóng thi̍t-ngìn kûng-sàng ke thú-tôi lâu tô-kiam, chhiu pûn-ngìn chhak-thet.
[5] Yû-têu ngìn chhut-sàng hi tui-khong Pâ-pí-lùn-ngìn; Pâ-pí-lùn-ngìn oi chiông Ngài chhai thai fat-khién chṳ̂-ha só chhṳ̀-sí ke ngìn ke sṳ̂n-sṳ̂ tôi-mân liá-têu vuk. Yîn-vi sàng-tú ke ngìn só-cho ke fái-sṳ, Ngài chhiu êm-mien m̀ khon-ku liá-sàng.
[6] Chúng-he, khon â! Ngài oi yî-chhṳ liá-sàng ke ngìn-mìn, sṳ́ kì-têu fî-fu̍k khien-không. Ngài hàn-oi pûn kì-têu hióng-su fò-phìn lâu ôn-chhiòn.
[7] Ngài oi chiông pûn-ngìn chok-chéu ke Yù-thai lâu Yî-set-lie̍t ngìn-mìn tai-chón ku-hiông, chhùng-chṳ́n kâ-yèn;
[8] Ngài oi sé-chhiang kì-têu tet-chhui Ngài só-fam yit-chhiet ke chhui-ko, sa-miên kì-têu phoi-ngia̍k Ngài ke yit-chhiet ke chhui-ok.
[9] Yâ-lu-sat-lâng voi sṳ́ Ngài yû hó miàng-sâng, tai-pûn Ngài khoai-lo̍k, chûn-chhung lâu yùng-kông. Sṳ-kie kok-koet thâng-tó Ngài su-fuk pûn Yâ-lu-sat-lâng ngìn-mìn, sṳ́ liá-sàng chhùng-sîn fàn-yùng ke sṳ̀, chhiòn-phu voi kiâng-to pi̍t-pi̍t-chhat.”
[10] Song-chú án-ngiòng kóng: “Ngì-têu chhiòn-phu kóng liá-te thú-thi voi sàng-cho fông-thi, mò ngìn, ya mò thung-vu̍t. Mò m̀-chho̍k! Yù-thai tak-chho sàng lâu Yâ-lu-sat-lâng ke thai-kiê séu-hong chhiòn-phu voi fông-thet, mò thung-vu̍t, ya mò ngìn he̍t. Chúng-he ngì-têu oi chhai liá-têu só-chhai chai yit-pái thâng-tó
[11] yû fôn-hí khoai-lo̍k ke sâng, sîn-lòng lâu sîn-ngiòng ke sâng. Ngì-têu ya voi thâng-tó ngìn chhai sṳn-thien tú hien kám-ên chi ke kô-sâng; kì-têu voi chhong: ‘Oi kám-chhia Song-chú — Van-kiûn ke Ngièn-soi! Yîn-vi Song-chú he chṳ-san; Kì ke chhṳ̀-oi yún-yén chhòng-chhùn.’ Ngài oi pûn ngì-têu chón-to ku-hiông, chhùng-chṳ́n kâ-yèn. Ngài — Song-chú án-ngiòng siên-pu lé.”
[12] Song-chú — Van-kiûn ke Ngièn-soi án-ngiòng kóng: “Chhai liá-te fông-fi, mò ngìn mò thung-vu̍t ke thú-thi, só-yû ke sàng-sṳ thin-chho̍k voi chai yû mu̍k-chhòng, mu̍k-ngìn sṳ́ yòng-khiùn chhai ke-vi hiû-sit.
[13] Chhai sân-khî ke hiông-chṳ́n, sî-phién kô-ngièn ke chhûn-chông, Yù-thai nàm-phu tak só-chhai, Phien-ngâ-mén thi-khî tak só-chhai, Yâ-lu-sat-lâng chû-vì ke chhûn-chông, lâu Yù-thai-thi tak-chho sàng, mu̍k-ngìn voi chai yit-pái tiám-son kì-têu ke yòng. Ngài — Song-chú án-ngiòng siên-pu lé.”
[14] Song-chú kóng: “Khon â, sṳ̀-chiet voi-to lé, Ngài oi sṳ̍t-hien Ngài tui Yî-set-lie̍t lâu Yù-thai ngìn-mìn hó ke yin-hí.
[15] Ke-sṳ̀, Ngài oi vi Thai-ví hîn-hí chṳn-ngi ke ‘Su-kî’; kì voi chhai liá-phién thú-thi yung kûng-phìn chṳn-ngi lòi thúng-chhṳ koet-kâ.
[16] Ke-sṳ̀, Yù-thai ngìn-mìn yit-thin voi tet-kiu, Yâ-lu-sat-lâng-ngìn voi ôn-kî lo̍k-ngia̍p. Liá-sàng voi pûn-ngìn ôn-cho ‘Song-chú — ngài-têu ke chṳn-ngi’.
[17] Ngài — Song-chú án-ngiòng yin-hí: Thai-ví ke heu-thoi voi yún-yén yû ngìn chhô Yî-set-lie̍t ke vòng-vi;
[18] cho chi-sṳ̂ ke Li-vi-ngìn ya yit-thin voi yû ngìn chhai Ngài mien-chhièn hien sêu-fa-chi, su-chi, ngit-ngit phan-lî hien-chi ke sṳ.”
[19] Song-chú lâu Yâ-li-mí kóng:
[20] “Ngài — Song-chú án-ngiòng kóng: Ngì-têu na-he yû phan-fap fi-thet Ngài lâu ngit-sṳ̀-thèu pin am-pû-thèu li̍p ke yok, sṳ́ ngit-ya mò cheu-sṳ̀ yun-chón,
[21] án-ngiòng, Ngài lâu Ngài ke phu̍k-ngìn Thai-ví li̍p ke yok chang cho-tet fi-thet, sṳ́ kì ke heu-thoi mò-ngìn chhô vòng-vi; hàn-yû Ngài lâu cho chi-sṳ̂ fu̍k-sṳ Ngài ke Li-vi-ngìn li̍p ke yok, chang cho-tet fi-thet.
[22] Ngài oi sṳ́ Ngài phu̍k-ngìn Thai-ví ke heu-thoi lâu cho chi-sṳ̂ fu̍k-sṳ Ngài ke Li-vi-ngìn su-muk chen-kâ, chhiong thiên-táng ke sên-é mò fap-thu son, chhiong hói-sùn ke sâ-é mò fap-thu liòng.”
[23] Song-chú lâu Yâ-li-mí kóng:
[24] “Ngì tî mò? Yû-ngìn án-ngiòng kóng: ‘Song-chú fit-thet chhṳ-kâ kién-sién ke lióng-chak koet-kâ — Yî-set-lie̍t lâu Yù-thai.’ Liá-têu ngìn án-ngiòng méu-sṳ Ngài ke chṳ́-mìn, mò chiông kì-têu khon-cho koet-kâ.
[25] Chúng-he, Ngài — Song-chú án-ngiòng kóng: Ngài na-mò lâu ngit-ya li̍p-yok, mò sat-li̍p thiên-thi ke thin-li̍t,
[26] Ngài chhiu voi khî-chhie̍t Ngâ-kok ke heu-thoi lâu Ngài phu̍k-ngìn Thai-ví ke heu-thoi; mò tui Thai-ví ke heu-thoi sién-li̍p kiûn-vòng, kón-lî Â-pak-lâ-hón, Yî-sat lâu Ngâ-kok ke heu-thoi. Chúng-kóng, Ngài oi lìn-mén kì-têu, pûn kì-têu chón-to ku-hiông, chhùng-chṳ́n kâ-yèn.”