[1] Song-chú án-ngiòng kóng: “Yî-set-lie̍t-ngìn â, na-he ngì-têu hén fì-thèu, chhiu to-chón Ngài liá-vi lòi! Na-he ngì-têu hén tui Ngài mien-chhièn chhù-thet Ngài só-nâu ke ngiéu-siong, mò sâm-sîm lióng-yi,
[2] ngì-têu chhiu voi yû-hó yung sṳ̀n-sṳ̍t, kûng-phìn, kûng-ngi ke thai-thu chṳ́-tén Ngài — yún-sên Song-chú ke miàng fat-sṳ. Án-ngiòng van-koet chhiòn-phu voi yîn-vi Ngài tet-tó fuk-hi, ya voi lòi yùng-yeu Ngài.”
[3] Song-chú tui Yù-thai-ngìn lâu Yâ-lu-sat-lâng-ngìn án-ngiòng kóng: “Ngì-têu oi khôi-khién mò lài-ko ke thú-thi, m̀-hó chhai net-teu tú ve-chúng.
[4] Yù-thai lâu Yâ-lu-sat-lâng ke ngìn-mìn â, ngì-têu ke sîm-lìn oi su kot-lî, chhù-thet sîm-tú ke lá-sap, chiông chhṳ-kâ hien-pûn Ngài — ngì-têu ke Song-chú. Na-mò, ngì-têu ke fái hàng-vì voi ngiâ Ngài fat-fó, mò-ngìn nèn tá-vû.”
[5] Oi hiong chhiòn-koet phùn yòng-kok, fat-chhut kín-po, oi tui Yù-thai lâu Yâ-lu-sat-lâng-ngìn thai-sâng hêm: Si̍p-ha̍p hí-lòi, kiak-kiak chéu-ngi̍p fòng-ví-sàng hi!
[6] Oi chiông hi Siak-ôn ke lu-phêu tun hí-lòi! M̀-hó kín-thô, oi kiak-kiak thò-miang! Song-chú oi kong thai châi-fo; thai fí-me̍t voi tui pet-fông lìm-to.
[7] Ke fí-me̍t van-koet ke yí-kîn tui kì ke pún-koet chhut-fat, chhiu-chhiong sṳ̂-é chéu-chhut sân-lìm. Kì voi sṳ́ Yù-thai ke thú-thi fông-thet, sàng-chṳ́n pho-fái to mò-ngìn he̍t.
[8] Só-yî, ngì-têu oi chok mà-sâm, kín-hêm kín-kieu, yîn-vi Song-chú tui ngài-têu ke fat-khién hàn-màng sêu.
[9] Song-chú kóng: “Ke-sṳ̀, kiûn-vòng lâu kôn-chóng voi sṳt-thet yúng-hi; chi-sṳ̂ voi thai chho̍k-kiâng; siên-tî ya voi pot-tok-ngok.”
[10] Ngài kóng: “Hái! Chṳ-kô ke Song-chú â, Ngì chṳn-kîn khî-phien liá-têu ngìn lâu Yâ-lu-sat-lâng! Ngì kóng voi yû phìn-ôn, khì-sṳ̍t tô-kiam chṳ́-tén kì-têu ke hèu-lièn.”
[11] To ke-sṳ̀, Song-chú voi tui liá-têu ngìn lâu Yâ-lu-sat-lâng kóng: “Yû tông-sêu ke fûng tui khóng-yâ kông-kông ke sân-táng hiong ngì-têu chhôi-lòi, m̀-he vi-tó poi-kuk, ya m̀-he oi chiông phang-é chhôi-chhiang,
[12] he Ngài chiông ke khiòng-lie̍t ke fûng chhôi ko-lòi! He Ngài chhṳ-kâ oi sṳ́m-phan Ngài ke chṳ́-mìn.”
[13] Khon â! Thi̍t-ngìn chhiong vû-yùn khièm ko-lòi; kì ke chan-chhâ chhiong liùng-kién-fûng so tén-lòi, kì ke chan-mâ pí ên-tiâu kha-kiak! Ngài-têu chhám lé! Ngài-têu mò-miang lé!
[14] Yâ-lu-sat-lâng â, oi sé-thet sîm-chûng ke chhui-ok, ngì chhiu voi tet-kiu. Fái sîm-su̍t liù chhai ngì ke sîm-tú oi to kí-sṳ̀ nè?
[15] Thâng â, yû sṳ́-chá tui pet-phién Tan kî-chhu̍k ke thi-khî yit-chhṳ̍t hiong-nàm to Yî-fap-lièn sân-khî lòi po fái sêu-sit.
[16] Kì-têu hiong kok-koet kóng, ya thì-siáng Yâ-lu-sat-lâng: “Yû thi̍t-ngìn tui yén-yén ke só-chhai lòi. Kì-têu thai-sâng sê, lòi kûng-tá Yù-thai tak-chak sàng-sṳ.
[17] Kì-têu voi pâu-vì Yâ-lu-sat-lâng, chhiong khon-sú ke ngìn kam-sṳ thièn-yèn.” Liá he yîn-vi Yù-thai ke ngìn-mìn phoi-ngia̍k Ngài. Ngài — Song-chú án-ngiòng siên-pu lé.
[18] Yù-thai â, ngì ke só-hàng só-cho pûn ngì chhṳ-kâ ngiâ-lòi án-thai ke châi-fo. Ngì ke chhui hoi ngì su-khú, chhiuk-chhôn ngì ke sîm!
[19] Ngài ke sîm â! Ngài ke sîm â! Ngài ngióng-voi án kân-khú? Ngài ke sîm-kôn fàn-chhau, mò phan-fap tiâm-tiâm m̀ kóng-fa, yîn-vi ngài thâng-tó yòng-kok ke hióng-sâng lâu siông-chhṳ̀ ke sâng.
[20] Châi-nan put-thôn; chhiòn-koet fông-fi. Ngài ke chong-phùng fut-yèn-kiên vang-thet, chong-phùng ke pu-liàm yit-ha-é chhiu lie̍t-thet.
[21] Ngài khon-tó kiûn-khì, thâng-tó yòng-kok ke sâng, oi to kí-sṳ̀ nè?
[22] Song-chú kóng: “Ngài ke chṳ́-mìn ngong-tong; kì-têu m̀ ngin-sṳt Ngài. Kì-têu chhiong vù-tî ke se-ngìn-è, mò pan-si̍t chṳ-fi. Kì-têu tông voi cho fái-sṳ, m̀-tî ngióng-pân cho hó-sṳ.”
[23] Ngài khon thi, thi he khûng-khûng mò sṳ̀n-hìn; ngài khon thiên, thiên ya mò kông.
[24] Ngài khon sân, thai-sân kín-chûn, se-sân ya yèu-lòi yèu-hi.
[25] Ngài khon m̀-tó ngìn-yáng; lièn thiên-táng ke tiâu-é ya chhiòn-phu pî-chéu.
[26] Ngài khon-tó hó-thièn pien fông-thi; sàng-sṳ chhiòn-phu vang-to chhiong thú-tôi, yîn-vi Song-chú thai fat-khién.
[27] Song-chú án-ngiòng kóng: “Chhiòn-thi yit-thin voi fông-liòng, chúng-he Ngài m̀-voi chha̍t-tái fí-me̍t.
[28] Thi voi pî-sông, thiên voi pien-vû. Ngài yí-kîn kóng lé, yí-kîn thin-chho̍k lé, chhie̍t-tui m̀-voi heu-fí, ya m̀-voi kói-pien.”
[29] Siên-tî kóng: Tak sàng-sṳ ke ngìn yit thâng-tó khì-pîn lâu chien-sú ke sâng, chhiòn-phu chhin-miang thò-nan. Yû-têu chéu-ngi̍p su-lìm; yû-têu phà-to sa̍k-phung tú khong. Ngìn chéu chhiang-chhiang, sàng-sṳ khûng-khûng!
[30] Yâ-lu-sat-lâng â, ngì fai-thet lé! Ngì ngióng oi-sṳ́ chok kô-kui ke fùng-sâm? Ngióng oi-sṳ́ tai chû-pó kîm-hi? Ngióng oi-sṳ́ kò-fún va̍k-mì nè? Ngì tá-pan án-chiâng yû má-ke yung nè? Ngì ke chhìn-lòng méu-sṳ ngì, hàn sióng-oi sû ngì ke miang nè!
[31] Ngài thâng-tó chhiong sên-sán ke fu-ngìn-kâ chhṳn-thung ke hêm-sâng, chhiong kiung thèu-thôi án-ngiòng chhin-sê. Ngièn-lòi he Siak-ôn ke kieu-sâng; kì kín théu-thai-hi, chhûn-khôi sûng-sú, kóng: “Ái! Ngài kîm chhiu chhám lé! Kì-têu oi lòi chhṳ̀ ngài! Ngài kiâng-to khiòng-khiòng voi fûn-thet lé.”