[1] Phien-ngâ-mén-ngìn â, kiak-kiak lì-khôi Yâ-lu-sat-lâng thò-miang ô! Ngì-têu oi chhai Thì-kô-â phùn yòng-kok kín-ko, chhai Pak-Ha̍p-kî-lìm tiám-chho̍k fûng-fó! Yîn-vi voi yû thai châi-nan lâu thai fí-me̍t tui pet-fông lòi lé.
[2] Siak-ôn-sàng sûi-yèn chhiong se-moi-é chhin-chiâng yu vûn-yù, Ngài thin-chho̍k oi fí-me̍t kì!
[3] Lie̍t-koet ke kiûn-vòng voi tai-liâng kì-têu ke kiûn-chhui, chhai sàng ke chû-vì cham-thi ôn-yàng, chhîn-chhiong mu̍k-ngìn tai-liâng kì-têu ke yòng-khiùn to ke-vi lòi chhióng chhó sṳ̍t.
[4] Kì-têu voi min-lin: “Chún-phi kûng-tá! Chhai tông-chu-thèu fat-thung kûng-sàng!” Heu-lòi kì-têu yu kóng: “Chhám lé, ngit-thèu ke yáng-è thô tông-chhòng lé, ngit-thèu voi lo̍k-sân lé.
[5] Chúng-he am-pû-thèu ngài-têu me oi kûng-sàng, fí-fái kì ke sàng-pó.”
[6] Song-chú — Van-kiûn ke Ngièn-soi min-lin lie̍t-koet ke kiûn-vòng chám su-é, hí thú-tôi lòi vì-kûng Yâ-lu-sat-lâng. Kì kóng: “Liá-chak sàng chhûng-mân phau-li̍t, Ngài oi chit-fa̍t kì.
[7] Chhiu-chhiong chiáng yit-chhṳ̍t yúng-chhut chhièn-súi, liá-chak sàng ya yit-chhṳ̍t chen-kâ chhui-ok. Ngài thâng-tó sàng-tú fat-chhut phau-li̍t fí-me̍t ke sâng; Ngài ya sùi-sṳ̀ khon-tó phiang-thung lâu sông-hoi.
[8] Yâ-lu-sat-lâng-ngìn â, ngì-têu oi tui liá-têu khú-nan tet-tó kau-hiun. Na-mò, Ngài oi fit-thet ngì-têu, sṳ́ ngì-têu ke sàng fông-fi, mò-ngìn he̍t.”
[9] Song-chú — Van-kiûn ke Ngièn-soi án-ngiòng kóng: “Thi̍t-ngìn voi lòi-chok chhûn-tó ke Yî-set-lie̍t-ngìn chéu, chhiu-chhiong chak phù-thò ke ngìn chak liáu yu chak, chiông só-yû ke phù-thò chak chhiang-chhiang. Só-yî, ngì oi pá-ak kî-fi, chhin-liong chhióng-kiu chhûn-tó ke ngìn!”
[10] Ngài en-kóng: “Ngài hiong kì-têu chhòn Ngì kóng ke fa, kín-ko kì-têu, yû má-ngìn ngien-yi chiap-su nè? Kì-têu set-tén ngí-kûng, m̀-hén chiap-su Ngì ke fa. Kì-têu mò fôn-hí Ngì fûn-fu ngài kóng ke fa, ngin-vì ngài he vú-yu̍k kì-têu.
[11] Song-chú â, Ngì ke thai fat-khién ya chhûng-mân chhai ngài sṳ̂n-song, ngài ngiûn m̀-he̍t lé!” Só-yî Song-chú lâu ngài kóng: “Chiông Ngài ke thai fat-khién tó chhai kiê-thèu hong-mî ke se-ngìn-è lâu sṳ̀n-khiùn kiet-tóng ke heu-sâng-ngìn sṳ̂n-song. Kûng-phò voi khiung-ha pûn-ngìn chok-chéu, lièn su-ngièn tông-kô ke ló-ngìn-kâ ya he khiung-yong.
[12] Kì-têu ke vuk-è lièn thùng kì-têu ke thièn-thi, pû-ngiòng chhiòn-phu voi kûi phe̍t-ngìn. Ngài oi chhûn-sú chit-fa̍t liá thi-fông ke ngìn-mìn;
[13] yîn-vi kì-têu mò-lun thi-vi kô-tâi chhiòn-phu thâm put-ngi ke chhièn-chhòi, lièn siên-tî lâu chi-sṳ̂ ya cha-khî ngìn-mìn.
[14] Ngài chṳ́-mìn ke chho̍k-sông, kì-têu ya mò ngin-chṳ̂n yî-chhṳ. Kì-têu kóng: ‘Phìn-ôn! Phìn-ôn!’ khì-sṳ̍t mò phìn-ôn.
[15] Kì-têu cho liá án tet-ngìn-nâu ke sṳ yin-kôi tî kien-seu, chúng-he kì-têu m̀-tî kien-seu ya m̀-voi mien-fùng. Só-yî, kì-têu voi lâu phe̍t-ngìn khiung-yong tiet-tó. Ngài chit-fa̍t kì-têu ke sṳ̀, kì-têu chhiu voi vang-to tap-tap. Ngài — Song-chú án-ngiòng siên-pu lé.”
[16] Song-chú tui Kì ke chṳ́-mìn án-ngiòng kóng: “Ngì-têu oi khî chhai sṳ̍p-sṳ lu-héu hi-khon. Chhai ke-têu khiu-lu chûng, khon nai-thiàu he chui-hó ke lu. Hàng ke-thiàu lu, ngì-têu chhiu voi yû phìn-ôn.” Chúng-he kì-têu en-kóng: “Mò-oi! Ngài-têu mò-oi hàng ke-thiàu lu!”
[17] Song-chú hàn phai sú-mong-chá pûn kì-têu, ham kì-têu oi chu-yi thâng kín-po ke yòng-kok, chúng-he kì-têu kóng: “Ngài-têu mò-oi thâng!”
[18] Só-yî, Song-chú kóng: “Lie̍t-koet â, ngì-têu oi thâng! Chung-ngìn â, oi tî kì-têu voi tù-tó má-ke sṳ!
[19] Thai-thi â, oi thâng! Ngài oi kong châi-fo pûn Ngài ke chṳ́-mìn, chhiu-he kì-têu kúi-kie tô-tôn só kiet ke kó-chṳ́; yîn-vi kì-têu khî-chhie̍t Ngài ke kau-hiun, m̀ thâng-chhiùng Ngài ke fa.
[20] Kì-têu hien-pûn Ngài Sṳ-pâ ke nen-hiông, tai-pûn Ngài yén-fông ke chhông-phù. Ngài mò kak-yi! Ngài m̀ chiap-su kì-têu ke sêu-fa-chi, ya mò fôn-hí kì-têu ke chi-vu̍t.
[21] Só-yî, Ngài — Song-chú án-ngiòng siên-pu: Ngài oi chiông pan-kiok-sa̍k piong chhai liá-têu ngìn mien-chhièn, pûn kì-têu pan-tó. Fu-chṳ́, lièn lìn-sa, chhîn-yû ya chhiòn-phu oi me̍t-mòng.”
[22] Song-chú án-ngiòng kóng: “Khon â, yû yit-ke mìn-chhu̍k tui pet-fông lòi; chhai yén-fông yû yit-chak khiòng-koet chún-phi lòi siông-chhṳ̀.
[23] Kì-têu yung chien yung tô chông-phi chhṳ-kâ; kì-têu tông chhàn-ngiûn, mò lìn-mén ke sîm. Kì-têu khì-mâ ke sâng chhiong hói-long ho-ho-kún. Kì-têu chún-phi hó oi lòi kûng-kit Siak-ôn-sàng.”
[24] Yâ-lu-sat-lâng-ngìn kóng: “Ngài-têu thâng-tó chan-chên ke fûng-sâng, sú-kiok chhiu ngiôn-thet. Ngài-têu fî-sòng thung-khú, chhiong sán-fu ke chhṳn-thung.
[25] Ngài-têu m̀-kám to yâ-ngoi, ya m̀-kám sông kiê-lu; yîn-vi tak só-chhai yû khià-tô tai-kiam ke thi̍t-ngìn, si chû-vì tû án tet-ngìn-kiâng.
[26] Thùng-pâu â, oi chok mà-sâm, chhai fó-fôi tú chan-lòi chan-hi. Oi tông pî-ôi, chhiong sóng-sṳt tân-tên-chṳ́ án-ngiòng lòi kân-khú to thai-kieu, yîn-vi ke fí-me̍t-chá voi fut-yèn-kiên lòi kûng-kit ngài-têu.”
[27] Song-chú tui Yâ-li-mí kóng: “Ngài oi sṳ́ ngì cho Ngài chṳ́-mìn ke lien-kîm sṳ̂-fu, sṳ́ ngì tî ngióng-pân sṳ-ngiam kì-têu ke hàng-vì.
[28] Kì-têu chhiòn-phu he ngang-kiáng ke phan-thù, chhiong thùng-thiet án-ngang. Kì-têu tak só-chhai hi pân-nung sṳ-fî, só-cho ke fî-sòng phai-fái.
[29] Fûng-siông chhin-chhôi, lù-fó tông-mâng, yèn-thiet ya voi yùng-fa. Chúng-he Ngài ke chṳ́-mìn su-tó án-tô sṳ-lien hàn-he vóng-yèn, chok-ok ke ngìn hàn-he màng chhù-thet.
[30] Ngìn voi chiông kì-têu khon-cho fit-thet ke ngiùn-châ, yîn-vi Ngài — Song-chú yí-kîn chiông kì-têu vok-thet.”