[1] Song-chú tui Yâ-li-mí kóng:
[2] “Ngì oi thâng chhîn-chhú liá khie-yok ke nui-yùng, yèn-heu hiong Yù-thai ngìn-mìn lâu he̍t chhai Yâ-lu-sat-lâng ke ngìn siên-pu.
[3] Oi tui kì-têu kóng, Ngài — Song-chú, Yî-set-lie̍t ke Song-ti án-ngiòng kóng: M̀ chûn-hàng liá-ke khie-yok ke ngìn, chhiu voi su chu-chú.
[4] Ngài tui Âi-khi̍p, tui ke sêu-thiet ke fó-lù chûng chiông ngì-têu ke chú-siên tai chhut-lòi sṳ̀, Ngài lâu kì-têu tá liá-ke khie-yok. Ngài fûn-fu kì-têu fu̍k-chhiùng Ngài, chûn-sú Ngài yit-chhiet ke min-lin. Ngài lâu kì-têu kóng, kì-têu na fu̍k-chhiùng Ngài chhiu-he Ngài ke chṳ́-mìn, Ngài oi cho kì-têu ke Song-ti.
[5] Án-ngiòng, Ngài chhiu sṳ̍t-hien Ngài tui kì-têu ke chú-siên só-fat ke sṳ, chiông liá liù-nen-lâu-me̍t tông-phì ke thú-thi su-pûn kì-têu, chhiu-chhiong kîm-pû-ngit khiung-yong.” Ngài en-kóng: “Song-chú â! Â-mén!”
[6] Song-chú yu tui ngài kóng: “Ngì oi chhai Yù-thai tak sàng-sṳ lâu Yâ-lu-sat-lâng ke thai-kiê séu-hong, hiong ngìn-mìn siên-pu liá yit-chhiet ke fa, ham kì-têu oi thâng-chhiùng yu chûn-hàng liá-ke khie-yok.
[7] Chhṳ-chhiùng Ngài chiông ngì-têu ke chú-siên tai-chhut Âi-khi̍p ke-ngit chhṳ̍t-to kîm-pû-ngit, Ngài yit-pái yu yit-pái kín-kie kì-têu kóng: ‘Ngì-têu oi thâng-chhiùng Ngài ke fa.’
[8] Chúng-he kì-têu m̀-thâng ya m̀-tap Ngài, fán-chón ngang-kiáng cheu chhṳ-kâ ke fái sîm-sṳ̂ hi-hàng. Ngài fûn-fu kì-têu chûn-sú liá-ke khie-yok, chúng-he kì-têu m̀ hi-hàng. Só-yî, Ngài cheu liá khie-yok só-yû ke kûi-thin chit-fa̍t kì-têu.”
[9] Song-chú yu tui ngài kóng: “Yù-thai ngìn-mìn lâu he̍t chhai Yâ-lu-sat-lâng ke ngìn thùng-mèu phoi-ngia̍k Ngài.
[10] Kì-têu yu to-chón hi fam chú-siên só-fam ke chhui, m̀ thâng-chhiùng Ngài ke fa, hi-pai phe̍t ke sṳ̀n-mìn. Yî-set-lie̍t lâu Yù-thai ke ngìn-mìn chhiòn-phu pho-fái Ngài lâu kì-têu chú-siên só-li̍p ke khie-yok.
[11] Só-yî, Ngài — Song-chú án-ngiòng kóng: Ngài thin-chho̍k oi kong châi-nan pûn kì-têu; liá he kì-têu mò fap-thu chéu-sám ke. Sûi-yèn kì-têu hiong Ngài ôi-khiù, Ngài yit-thin m̀-thâng.
[12] Ke-sṳ̀, Yù-thai lâu Yâ-lu-sat-lâng ke ngìn voi hi khiù kì-têu sêu-hiông fu̍k-sṳ ko ke sṳ̀n-mìn. Chúng-he ke-têu sṳ̀n-mìn chhai châi-nan lìm-to ke sṳ̀ vàn-chhiòn mò phan-fap pông-chhu kì-têu.
[13] Yù-thai-ngìn ke sṳ̀n-mìn lâu kì-têu ke sàng-sṳ phiàng-tô; Yâ-lu-sat-lâng-ngìn vi-tó ke tông kien-seu ke Pâ-li̍t só-hí sêu-hiông ke chi-thàn ya lâu kì-têu ke kiê-lu phiàng-tô.
[14] Yâ-li-mí â, ngì m̀-hó vi liá-têu ngìn khì-tó, ya m̀-hó vi kì-têu thai-sâng ôi-khiù; yîn-vi kì-têu tù-tó châi-nan ke sṳ̀ hiong Ngài khiù pông-chhu, Ngài yit-thin m̀-thâng.”
[15] Song-chú kóng: “Ngài só-siak ke chṳ́-mìn ki-yèn chhui-thai ok-khi̍t, hàn-yû má-ke chṳ̂-kiet to Ngài ke sṳn-thien lòi nè? Kì-têu láu-tó hí-ngien, hien sên-ngì chhiu khó-yî sêu-châi he-mò? Chhiu cho-tet hióng-su khoai-lo̍k he-mò?
[16] Ngài sṳt chiông kì-têu ôn-to ‘Hó ke Kám-lám-su’, kó-chṳ́ tá-to kiet-kiet, su-sṳ̂n tông-chiâng, chúng-he liá-ha Ngài oi yung thai fûng-chhâi lòi áu-thôn kì ke su-khoá, hióng lùi-kûng lòi-sêu kì.
[17] “Ngài — Song-chú, Van-kiûn ke Ngièn-soi châi-chung liá-ke kám-lám-su, chúng-he liá-ha Ngài oi kong châi-nan kûng-kit kì; yîn-vi Yî-set-lie̍t-ngìn lâu Yù-thai-ngìn lûng-chúng cho fái-sṳ, hiong Pâ-li̍t sêu-hiông, ngiâ Ngài fat-khién.”
[18] Ke-sṳ̀ Song-chú chṳ́-tiám ngài, chiông thi̍t-ngìn ke yîm-mèu chṳ́-pûn ngài khon, ngài chang tî kì-têu oi chhṳ̀ ngài.
[19] Ngài chhiong yit-chak vûn-sùn ke se yòng-kú pûn-ngìn khiên-to thù-chái-chhòng, chúng-he ngài m̀-tî kì-têu ke yîm-mèu. Kì-têu kóng: “Ngài-têu oi chiông liá-thèu su lâu kó-chṳ́, lièn thèu pin kîn pâng-thet. Lòi â, ngài-têu lòi chiông kì chhṳ̀-thet, sṳ́ kì ke miàng sêu-sṳt, mò-ngìn ki-tet kì.”
[20] Só-yî ngài khì-tó kóng: “Song-chú — Van-kiûn ke Ngièn-soi â, Ngì he kûng-chṳn ke sṳ́m-phan-kôn; Ngì kam-chhat ngìn ke sîm-sṳ̂ yi-ngiam. Ngài chiông ngài ke on-khien kâu chhai Ngì sú-chûng; khiù Ngì pûn ngài khon-tó Ngì vi ngài sṳ̂n-yên.”
[21] Song-chú án-ngiòng kóng: “Ke-têu oi sû ngì miang ke Â-nâ-thut-ngìn vî-hia̍p ngì, ham ngì m̀-hó chai fung Song-chú ke miàng kóng yi-ngièn, chang m̀-voi sí chhai kì-têu ke sú-thèu.
[22] Só-yî Ngài — Song-chú, Van-kiûn ke Ngièn-soi án-ngiòng kóng: Khon â, Ngài oi chit-fa̍t kì-têu! Kì-têu ke heu-sâng-ngìn voi sí chhai chan-chhòng, kì-têu ke se-ngìn-è voi yîn-vi kî-fông ngo-sí.
[23] Ngài yí-kîn sién-thin sṳ̀-kiên kong châi-nan chhai Â-nâ-thut-ngìn sṳ̂n-song; ke-sṳ̀, kì-têu voi sí-to mò chhûn pan-sà.”