[1] Yok-sî-â ke lai-é Sî-tí-kâ cho vòng thúng-chhṳ Yù-thai chhû-khì, Yâ-li-mí tui Song-chú liâng-su liá ke sin-sit:
[2] Song-chú fûn-fu ngài yung phì-tai lâu su-é cho yit-chak ak, koa chhai kiáng-kîn hong.
[3] Chiap-tén, Song-chú fûn-fu ngài, thûng-ko ke-têu lòi Yâ-lu-sat-lâng fóng-mun Sî-tí-kâ-vòng ke thai-sṳ́, chiông ak ke sin-sit chón-pûn Yî-tûng-vòng, Mô-ap-vòng, Â-mùn-vòng, Thai-ngì-vòng, lâu Sî-tun-vòng.
[4] Song-chú fûn-fu ngài min-lin tak-ke thai-sṳ́ chiông Kì ke fa lâu kì-têu ke chú-ngìn kóng: Song-chú — Van-kiûn ke Ngièn-soi, Yî-set-lie̍t ke Song-ti án-ngiòng kóng:
[5] “Ngài yung thai-nèn thai-li̍t ke sú chhóng-chho thai-thi, hàn-yû thi-song ke ngìn-lui lâu só-yû ke thung-vu̍t. Ngài oi chiông thi kâu-pûn Ngài khon-cho chui thó-tong ke ngìn.
[6] Liá-ha Ngài oi chhîn-sṳ̂n chiông liá-têu koet-kâ kâu-pûn Ngài ke phu̍k-ngìn Pâ-pí-lùn-vòng Nì-pu-kap-nì-sat, pûn kì thúng-chhṳ, lièn yâ-chhu ya kâu-pûn kì kón-lî.
[7] Só-yû ke koet-kâ chhiòn-phu oi sṳ-fung kì lâu kì ke lai-é, sûn-é, chhṳ̍t-to kì ke ti-koet sôi-phai. Ke-sṳ̀, kì voi sṳ-fung lie̍t-koet lâu ke-têu thai kiûn-vòng.
[8] “Mò-lun nai-pâng nai-koet, fàm-he m̀-hén fu̍k-sṳ Pâ-pí-lùn-vòng Nì-pu-kap-nì-sat, m̀-hén pà kì kâ chhai kì-têu kiáng-kîn hong ke ak, Ngài chhiu oi yung chan-chên, kî-fông, lâu pot-vûn hìn-fa̍t ke-koet, chhṳ̍t-to Ngài sṳ́ Nì-pu-kap-nì-sat chiông ke-koet vàn-chhiòn sêu-me̍t.
[9] Lun-tó ngì-têu, ngì-têu cho-m̀-tet thâng-sin ngì-têu ke siên-tî, puk-koa ke, kié-mung ke, son-miang ke, lâu hàng sià-su̍t ke fa. Liá-têu ngìn ham ngì-têu m̀-hó fu̍k-sṳ Pâ-pí-lùn-vòng,
[10] khì-sṳ̍t kì-têu hiong ngì-têu kóng ke he ká yi-ngièn, voi hoi ngì-têu pûn-ngìn chok-chéu, yén-lì kâ-hiông; Ngài voi kiuk ngì-têu chéu; ngì-têu voi pûn-ngìn sêu-me̍t.
[11] Chúng-he, mò-lun nai-koet hén pà Pâ-pí-lùn-vòng kâ-pûn kì ke ak, hén fu̍k-chhiùng kì, Ngài chhiu pûn ke-koet ke ngìn-mìn phìn-ôn he̍t chhai pún-thi, kâng-chung chhṳ-kâ ke thú-thi. Ngài — Song-chú án-ngiòng siên-pu lé.”
[12] Ngài ya hiong Yù-thai-vòng Sî-tí-kâ kóng khiung-yong ke fa: “Ngì-têu oi pà Pâ-pí-lùn-vòng kâ-pûn ngì-têu ke ak, fu̍k-sṳ kì lâu kì ke ngìn-mìn; án-ngiòng, ngì-têu chang yû khó-nèn sên-chhùn hâ-hi.
[13] Ngì lâu ngì ke ngìn-mìn ngióng oi-sṳ́ ngiâ-hí chan-chên, kî-fông, lâu pot-vûn lòi sí? Song-chú mìn-mìn kóng-ko, nai-koet m̀-hén fu̍k-sṳ Pâ-pí-lùn-vòng, ke koet-kâ chhiu voi tù-tó liá-têu châi-nan.
[14] Ngì-têu m̀-hó thâng-sin khien ngì-têu m̀-sṳ́ fu̍k-sṳ Pâ-pí-lùn-vòng ke ke-têu siên-tî. Kì-têu he khî-phien ngì-têu ke.
[15] Song-chú chhîn-sṳ̂n kóng-ko, Kì pin-mò phai kì-têu, he kì-têu chia Kì ke miàng kóng ká yi-ngièn. Na-he ngì-têu thâng-sin kì-têu, Song-chú chhiu kiuk-chéu ngì-têu; ngì-têu lâu phien ngì-têu ke siên-tî chhiòn-phu voi me̍t-mòng.”
[16] Yèn-heu, ngài hi lâu chi-sṳ̂ pin ngìn-mìn kóng Song-chú ke fa: “Ngì-têu m̀-hó thâng-sin kóng sṳn-thien ke pó-vu̍t mò kí-kiú voi tui Pâ-pí-lùn pân chón-lòi ke ke-têu siên-tî. Kì-têu he hiong ngì-têu kóng ká yi-ngièn.
[17] Ngì-têu m̀-hó sin kì-têu ke fa! Ngì-têu oi fu̍k-sṳ Pâ-pí-lùn-vòng chang voi sên-chhùn hâ-hi! Liá-sàng ngióng-hó pien-cho fông-phû nè?
[18] Na-he kì-têu he chṳ̂n siên-tî, yû Ngài ke sin-sit, kì-têu chhiu yin-tông hiong Ngài — Song-chú, Van-kiûn ke Ngièn-soi khì-khiù, khiù Ngài m̀-hó pûn ngìn chiông liù chhai sṳn-thien, Yù-thai vòng-kiûng, lâu Yâ-lu-sat-lâng ke pó-vu̍t yun-to Pâ-pí-lùn hi.”
[19] (Pâ-pí-lùn-vòng Nì-pu-kap-nì-sat chiông Yù-thai-vòng Yok-ngâ-kin ke lai-é Yok-ngâ-kîn, lâu Yù-thai, Yâ-lu-sat-lâng ke-têu liâng-chhiu chok-to Pâ-pí-lùn hi ke sṳ̀, liù-hâ sṳn-thien ke thùng-chhû, thùng-hói, thùng-chho, ya chhûn-tó tô-séu khì-thâ ke pó-vu̍t.)
[21] Yû-koân liù chhai Song-chú ke sṳn-thien tú, Yù-thai-vòng ke vòng-kiûng tú, lâu Yâ-lu-sat-lâng sàng-tú ke pó-vu̍t, Song-chú — Van-kiûn ke Ngièn-soi, Yî-set-lie̍t ke Song-ti án-ngiòng kóng:
[22] “Liá-têu tûng-sî chhiòn-phu voi pûn-ngìn pân-to Pâ-pí-lùn, liù chhai ke-vi, chhṳ̍t-to Ngài chiông kì-têu sû chón-lòi ke sṳ̀. Ke-sṳ̀, Ngài oi chiông kì-têu yun chón-lòi, piong-chón ngièn-lòi ke thi-fông. Ngài — Song-chú án-ngiòng siên-pu lé.”